13
Pii etao leamo dupapi lasa leamo dupapi
Indupa* nambame paa tepo pyoo nyakama kanja ipanya pilyo. “Endakali mendeme mende-kisa tenge mende silyamona latamo doko, endakali lapomapi tepomapi mendeme kiningina lao laitaka pipenge.” Wamba namba paa lapo pyoo ipao nyakama-pipa kateamano dokopa nambame endakali koo pyoo kateamino dupapi endakali yangi dupa pitakapi pii mende langio. Dopa pio doko indupa namba waka katao deaka langilyona, namba dee ipato dokopa nyakama mee kalyepale lao kayala nayato. Kataisame nambanya nengekaita dokonya pii lengepe nalengepe lao mende kandapuma laka lao masilyamino dokonya nambame dopa pito. Kataisame nyakama kandao opale pilyamo dupanya baa tambo lapae joo nakatenge. Daa, baame nyakamanya kaina dokonya pupu lao kalai pingi. Doko,* wamba baa tambo lapae joo kateamopa endakali dupame baa pyao yukuiyaminoaka doko, indupa baa Gotenya pupu lapae dokome lete kalyamo. Naima apata baapa pakatala tambo lapae kalyamanoaka doko, naimame opale nyakama-kisa pitamano dupa pitaka Gotenya pupu lapae dokome baa-pipa lete katao pitama.
Nyakamame* masoo miningi doko minao kalyamape daape lao nyakamame nyakama tange makande pyoo kalyepape. Nyakamame nyakama tange yapao kalyepape. Kataisa Jisasa baa nyakama-kisa kalyamo doko masala naelyamipi? Daa tamo doko, nyakama pakuatala lombapae sepelyamino. Dee* nyakamame naima kandao pakuatala lombapae nasilyamino lao masipimi laka lao nambame masilyo. Nyakamame mana koopi mende naminalapale lao naimame Gote lao loma silyamano. Naimame dopa pilyamano doko, naima akali angi wambu pipae joo kalyamanona lao nyakama laitaka pyaanya dopa napilyamano. Daa, nyakamame mana epe minao katapimi laka lao masetala pilyamano. Dee naima akali pakuatala lombapae sepaele joo katatamano doko yaka. Doko,* naimame kiningi pii doko kenda pisepenge opalepi mende kapa pao napipenge. Daa, naimame kiningi pii doko nisepenge dupaka pipenge. Naima akali tambo lapae joo katelyamanopa nyakama kyoto joo katelyamino kandao doko, naima mona yaepao katenge. Dee Goteme nyakama etete kapa pisina lao naimame loma singiaka. 10 Namba* waka katao dopa lao nyakamanya pepa pyao peekelyo doko, namba ipato dokopa nambame Kamongonya pii minao nyakama epao pyalanya nalatopa lao pilyo. Doko, Kamongome namba pii diamo doko nyakama minao koyasatale lao daa, nyakama kyoto injisatale lao dia.
11 Kaimia* paluma, nambame pii dake etao lelyo: nyakama mona epe palyoo kalyepape. Nyakamame nyakamanya mana doko tolasalapape. Nyakamame nambanya pii doko watao minalapape. Nyakama masingi mendai palyoo mona setao kalyepape. Dopa pyoo katataminopa auu kaengepi mona lyuu lengepi sakatasingi Gote doko nyakama-pipa katata.
12 Nyakamame* nyakama tangelapo mende auu pyoo katena laa laa pyoo, Gotenya endakali dupame pipengeli pyoo mende kopyoo nunu pii pii pyoo kalyepape.
Gotenya endakali dupa pitakame nyakama kandao auu pyoo kalyepape lelyamino.
13-14 Kamongo* Jisasa Kataisame nyakama pitaka kandao mona epe palena; Goteme nyakama auu kaena; Oli Sipitisame nyakama-pipa tole pyao katena.
* 13:1 Dit 17:6; 19:15; Mt 18:16; 2 Ko 12:14; 1 Ti 5:19 * 13:4 Lo 1:4; 6:8; 8:11; 1 Ko 1:25; Pl 2:7-8 * 13:5 1 Ko 11:28 * 13:6 1 Ko 13:6 * 13:8 Ap 4:20; 1 Ko 13:6 * 13:10 Jet 1:10; 2 Ko 2:3; 10:8 * 13:11 Lo 15:33; Pl 3:1 * 13:12 Lo 16:16; 1 Ko 16:20 * 13:13-14 1 Ko 2:10; Ep 2:18; 4:6; Pl 2:1