Wamba endakali dupame Gote-kisa koo petala alu piaminopa Goteme dupa kii tamao nyetona lao lalu lao leamo pii dutupa pepa wambatae Olotesamene dokonya latae siamopa Sakatayame nyoo lea-pyaa (Lu 1:68-79). Kenge Olotesamene lenge dokonya tenge doko Goteme baanya pii wambao lanya seteamo doko kandao lenge. Pii dokonya Goteme dopa pitona lao lalu lao lanya seteamo dupa angi injisetana lao piamo dupa pepa Olotesamene dokonya pyapae silyamo. Maitakao Goteme baanya Ikiningi Jisasa Kataisa dokome endakali pitaka pyoo nyala epena leamo dokome pii lalu lao lanya seteamo doko etete angi injisia-pyaa. Dopa piamo pii enenge doko kandao kenge Nutesamene lenge (Lu 22:20).

Eŋa Nutesamene Baipolo dakenya kandatenopa pii wakale wakale pyatae singi dupanya andake pyoo konjepae itaki yaki dupa etete pumbutalakao pumbutao dapa pyoo 2 pyatae katata. Pepa pyatae kaina upanya mendasa pii yakane pyoo konjepae itaki yaki dupa dapa pyoo pyatae katata v 10. Pii andake pyoo konjepaepi yakane pyoo konjepaepi itaki yaki dupame pii kutao kandapenge dupa iki laitaka petae katenge. Dee mendasa Gitiki pii lao yakane pyoo konjepae mendapua Eŋa lao konjalanya lekeleke tapala dapa pyoo pyatae katata v 5-6. Dopa petae dupa 5 ongonya pituu 6 ongonya tuu lao itaki pyapengena lao pingima.

Pii pepa pyatae mendapuanya kongali apale v a,b,d mende petae katatamopa pepa yoko mendai ongonyaka ana nete osa kongali mendai v a,b,d ongoaka petae katatamopa pii kuki mendatupa pyatae kalyamo utupame tenge opa petaena lao lao panata.

Nutesamene Baipolo tee pyao pepanya piaminopa Gitiki pii lao piami-pyaa. Nutesamene doko kandao buku wakale wakale longo pyoo akali mendapuame pepanya pyao pituu pii mendapua alo peta, waipa seta, kayata pyoo pepanya piami-pyaa. Pii mendapuanya kame kuki apale [|] mende petae katea kandeno ongo, masingi akali mendapuame Nutesamene pii etete tee pyao pepanya piamino dupame piamipi napiamipi lao masala naengena lao laitaka pita.

Nutesamene Baipolo angenya kaina upanya pii aiyomba mendapua pyatae katatamo dupa etete pumbutao dapa pyoo pyatae katata: Matiame Jisasa Kataisa mandeamo doko. Pii aiyomba ongo pitaka Baipolonya pii daa. Dupame pii lyaa mendapua kutao kanjale lao emba laitaka petae kalyamo. Pii aiyomba pundipundi ongonya pii waka mendasa pyatae singi mendenya konjepae andakepi yakanepi itaki yaki pyatae kalyamo utupa pii mendai opaleaka mendapua kanjale lao pyatae katata.

Pepa yoko dupanya ana nete osa pii konjepae andakepi yakanepi itaki yaki mendapua etete pumbutao apa pyoo 3:14 pyatae katata. Dokonya maitasa pii konjepae andakepi yakanepi itaki yaki mendapua pyatae katao buku waka mendapua kenge pyatae katatamo dutupame pii yakane pyoo konjepae indupa itaki pyateno utupa nisepenge mendatupa kutao kanjale lao pyatae katata.

Pii aiyomba pundipundi ongonyapi dee pepa yoko ongonya ana nete ongonyapi buku dupanya kenge dupa dapa pyoo kongali petae katata: Mt, Mk, Lu, Jo. Nutesamene ongonya buku kenge dupa letaa lapomame iki kongali petae katata.

Olotesamene ongonya buku kenge dupa letaa tepomame apa pyoo kongali petae katata: Jen, Eke, Lep, ongonya muu pyowapi londe pyowapi apa pyoo pyatae katata:

Eŋa Nutesamene Baipolo dakenya pikisaa mendapua wasetae kalyamo. Pikisaa dupame Jisasa kateamo gii dokopa Juta endakalipi Loma endakali dupapi dupanya mana miniamipi mendapua laitaka petae kalyamo. Pikisaa dupame pii dupa masetale lao laitaka petae kalyamo.

Nutesamene angenya maitasa-kaita pii lyaa lapoma pyatae seta. Olapome Baipolo angenya tenge mendapua emba mana nyoo masatale lao nisalanya seta. 1. Pii lyaa mende Opale kenge enenge mendapuanya tenge dupa lapae silyamo. Kenge enenge dupa pumbutalakao pumbutao pyatae silyamo. Dupanya mendapua aposelepi, disaipelepi, Mesayapi opale dupa akipi lao embame kutatene lao pepa pyatae silyamo dupanya kandao mana nyepe.

2. Pii lyaa mende Pii mendapua watambao kandapenge dupa lapae silyamo. Embame Nutesamene dokonya pii mende kutao kandatoo lao masii kandeno doko, kenge dupa pumbutalakao pumbutao dapa pyoo pyatae kalyamo kandape: enjele, kundi. Pumbutalakao pumbutao kenge pyatae kalyamo dupanya pundipundi dosa Nutesamene dokonya buku waka mendapuanya andake pyoo konjepaepi yakane pyoo konjepaepi itaki yaki dupa pyatae katata. Embame dupa kandateno kandao doko, epapu kandeleno kenge dupaka laitaka pita.

Indupa naimame Eŋa Nutesamene Baipolo dake minao mona yaepapenge. Dopaka doko, tenda endakali mendapuame Baipolo kapilyingi mana dokome dee kapilyetamiaka. Endakali tenda katatamino dupanya pii latamino dupa-pipa kapa lao dee kapi-lyokondape pitamiaka.

Polome pepa piamo dupa & &
Loma & Lo & 368
1 Kotina & 1 Ko & 404
2 Kotina & 2 Ko & 437
Galasia & Ga & 459
Epesasa & Ep & 473
Pilipae & Pl & 485
Kolosi & Kl & 494
1 Tesalonaika & 1 Te & 503
2 Tesalonaika & 2 Te & 512
1 Timoti & 1 Ti & 516
2 Timoti & 2 Ti & 526
Taitasa & Ta & 533
Pilimone & Pm & 538
Sosanya pepa pyao pyasiamino dupa & &
Iputu & Ip & 540
Jemesa & Je & 566
1 Pita & 1 Pi & 575
2 Pita & 2 Pi & 585
1 Jone & 1 Jo & 591
2 Jone & 2 Jo & 599
3 Jone & 3 Jo & 601
Juti & Ju & 603
Tanga pipenge dupa Kataisame Jone-kisa panasiamo dupa & Pa & 606