5
Naima* mokao nyepae joo kalyepale lao Kataisame naima mokao nyia! Tenge ongonya minao nyakama kyoto joo katao endakali mendapuame nyakama dee kendemane injisoo anjina lao kayala nayalapape!
Kitisene endakali dupa mokao nyepae joo katenge doko
Kandeleno!* Namba Polome pii dake nyakama langilyo: endakali mendapuame akali nyakamanya elya pingi kambu kaketekena lao kayami kandeno doko, Kataisame nyakama kukipi mende nisala nayata! Akali elya pingi kambu kaketekena kaelyamino dupa pitaka kandao nambame pii dake dee lao panelyo: dopa pitamo akali dokome mana setapae dupanya pii dupa pitaka watao minina! Akali* nyakama mana setapae dupanya-kaita Goteme tolataena lapya laka lao masilyamino dupame Kataisa yakinatelyamino! Goteme nyakama mona epe palelyamopa katenge doko kayapala lombapae sepelyamino! Dopaka* doko, Oli Sipitisa dokome naima sakatasipumopa naimame masoo minao Goteme naima tolataena latamo doko putiti kayao malisoo kalyamano. Kataisa* Jisasapa pakatae katao akali elya pingi kambu kepengepi kepala naengepi doko angi mende daa. Baa lao masoo minao katao auu kayao kalai pitamano doko iki angi.
Wamba* nyakama auu pyoo payamino doko indupa apimi nyakamanya kaita lyokamosa nyakamame kiningi pii doko watao minala naelyamipi? Mana* doko nyakama ipupa lelyamo Gote dokome dopa pyepa nalelyamo! Betesa* andasingi iisa dokonya betesa wasalanya kuki nyoo katataesa, betesa doko pitakanya tayao andasingi doko nyakamame masalapape. 10 Naima* Kamongo doko-kisa mendai joo kalyamano tenge dokonya minao nyakamame pii waka mendenya-kaita watao minala nayatamina lao nambame masokondape pyoo masilyo. Akali apimi nyakama minao kyakasilyape lao nambame masala naelyoaka doko, baame baanya kopeta pilyamo dokonya yanu doko baa tange-kisa seta. 11 Kaimia* paluma, akalinya elya pingi kambu kaketena lawaka nambame endakali dupa mana lamaipuli kandao doko, aipuma dupame namba watao pyalanya lapimilipi? Kini, nambame dopa pina lao lamaipuli kandao doko, endakali dupame Kataisa ita pokonya kumiamo dokonya pii doko tanga nalapimili. 12 Nyakama* minao kyakasilyamino akali dupame nyakama tangenya elya pingi lakapo doko etete nyipimi laka lao masilyo!
13 Oo* kaimia paluma! Goteme nyakama mokao nyepae joo kalyepale lao wii latea! Dopaka doko, nyakamame mokao nyepae joo katao nyakamanya moname koo pyuani kayatamino dupa pyaa naenya, kendemane endakali joo katao auu kayao mende nisa nisa pyoo kalyepape! 14 Mana* setapae dupanya pii dupa pitakame pii mendai dakenyaka iki tenge paliuu lapae silyamo: “Embame emba tange auu kaengeli pyoo endakali yango doko auu kayao katape!” 15 Kini dopaka pyoo, nyakamame mena yanapi joo mende nengeme nalya nana pyoo nao katatamino kandao doko, angi mende pyao naa naa pitamina kandao kalyepape!
Oli Sipitisanya dii mandenge dokopa monanya koo dokopa
16 Nambame* dapa lao lelyo: nyakamame Oli Sipitisa dokome latamoli pyoo payao kalyepape. Dopa pitamino dokome moname koo pipu laka lao masingi dokonya etete watao napitami. 17 Moname* pipuli lao masingi dokome Oli Sipitisame pipimili lao masingi doko tanga lenge. Oli Sipitisame pipimili lao masingi dokome moname pipuli lao masingi doko tanga lengeaka. Dopa pyoo dolapo yanda pilyabinopa nyakamame pimana lao masilyamino doko kapa pao napingi. 18 Nyakama* Oli Sipitisa dokome latamoli pyoo payao katatamino kandao doko, mana setapae dupame nyakama isala nayata. 19-21 Mona** koo dokome pingi dupa panao silyamo. Dupanya mendatupa datupa: endakalipi nyele-nyele paenge dokopi, elya pingi napipenge pingi dokopi, luiyawaka paenge dokopi, sambo gote dupa lao tama pingi dokopi, timango minao paengepi, nemangopi tomakaepi minao paenge dokopi, imbu kayamaingi dupapi, laiya lenge dokopi, tilya nyingi dokopi, yapa imbu kaenge dupapi, naima tange andake jipuma laka lao masingi dupapi, wakale masa masa pingi dokopi, saa laloo pingi dupapi, tata mendeme tata mendenya opale mende nyipuma laka lao masetala mona koo palengema dupapi, bia akipi nao ae lalya lana pingi dupapi, dee kalai dopale dupa yongenya pingi. Nambame wamba nyakama kandao isoo kalyepape langioli pyoo indupa deaka langilyo: akali mana dopale minilyamino dupa pitaka Goteme isingi panda dokonya nakatatami.
22-23 Dopaka* doko, Oli Sipitisa dokome dii dapa pyoo mandenge: auu kaenge dokopi, mona etete yaepenge dokopi, mona lyuu lenge dokopi, dupa mandenge. Dee yapa maka nakaenge dokopi, kondo kaenge dokopi, epe injingi dokopi, lelyamoli pingi dokopi, andiki pyoo katenge dokopi, tangeme tange auu pyoo isoo katenge dokopi dutupa baame naima-kisa sakatasingi. Mana dopale dupa mana setapae dupanya mendeme nee nanyingi. 24 Kataisa* Jisasanya endakali dupame nyakamanya mona koo dokopi, moname nyipu laka lao masingi dokopi, koo dupa pipu laka lao masingi dokopi dupa ita pokonya kumaseteami. 25 Oli* Sipitisame naima lete katasilyamo dokonya naima baame latamoli pyoo payamana! 26 Naima* luiyala nayao mende imbu kayasa kayasa napyoo mende tilya nyaa nyaa napimana.
* 5:1 Mt 11:29; Jo 8:32,36; Ap 15:10; Ga 2:4 * 5:2 Ga 2:1 * 5:4 Ga 3:10; Je 2:10 * 5:5 Lo 8:23,25 * 5:6 1 Ko 7:19; 13:13; Ga 6:15; Je 2:4 * 5:7 1 Ko 9:24; Pl 2:16 * 5:8 Ga 1:6 * 5:9 1 Ko 5:6 * 5:10 1 Ko 3:17; 2 Ko 11:15; Ga 1:17; Pl 2:1-5 * 5:11 1 Ko 1:23 * 5:12 Pl 3:2 * 5:13 Lo 6:15; 1 Pi 2:16; Ju 4 * 5:14 Lep 19:18; Mt 5:43; Lo 13:8-10 * 5:16 Lo 8:5-6; Ga 5:25 * 5:17 Lo 7:15-23; Je 4:1; 1 Pi 2:11 * 5:18 Lo 6:14; 8:14 * 5:19-21 Mt 7:17; 1 Ko 6:9-10; Je 1:21 * 5:19-21 Lo 1:29-32; Ep 5:3-5 * 5:22-23 1 Ko 13:4-7; 2 Ko 6:6; Ep 5:8-9; 1 Ti 4:12 * 5:24 Lo 6:6; Kl 3:5; 1 Ti 1:9-10 * 5:25 Lo 8:14 * 5:26 Pl 2:3