4
Goteme auu kaena lao paenge mana dupa
Kaimia* paluma, naimame pii dake etao lelyamano: nyakamame tolao payapengepi Goteme auu kaenge dupa pipengepi dupa naima-kisa mana nyiaminoli pyoo nyakamame pingima. Indupa naimame Kamongo Jisasanya kenge doko lao nyakamame epao dopa pyepale lao kyoto joo tee lelyamano. Doko, naimame Kamongo Jisasanya pupu lapae dokome nyakama langiamano mana pii dupa pitaka nyakamame masilyamino. Doko* nyakamame endakalipi nyele-nyele paenge mana doko maita maitala epe tolao katamili lao Goteme masilyamo. Nyakamanya* akali mendai mendai lawame enda lanyepala mana etete epe minao andanda semaiyoo pilyanya enda lanyetoana lao masetae kalyepape. Gote* lao masala naenge netesa akali dupame mona sakatao mee nyowanimi kumao enda nyingimali pyoo nanyalapape. Pii* lelyo dokonya akali nyakamanya mendeme endakali yango doko kandao luiyamaiyoo minakasala nayalapape. Doko naimame wambao langyokondape pyoo langiamanoli pyoo, Kamongo dokome koo dopale dupanya yanu pingina lao langilyamano. Doko,* Goteme naima mana aii pyapae dupa minalapale lao ipupa laa naya. Mana etete epe dupa minalapale lao ipupa lea. Tenge* ongonya minao mana dutupa maita mailyamo endakali dokome endakali yango mende kandao maita maiya naenya, Goteme baanya Oli Sipitisa nyakama dilyamo doko kandao maita mailyamo.
Nyakama* kaiminingi dupa auu kayao kalyepape lao pii mendapua pepa pyapenge tenge nasilyamo. Doko nyakama tangelapo mende auu kaya kaya pyoo kalyepale lao Goteme nyakama mana langitilyamo. 10 Kini,* nyakamame Masetonia yuu doko pitakanya masoo miningi kaiminingi dupa pitaka auu kaelyamino. Kaimia paluma, nyakamame dee epao dopa pyepale lao naimame nyakama kyoto joo langilyamano. 11 Nyakamame* ema napyoo andiki pyoo katao, pyakane nakatao, kingimi kalai pyoo katao pimua laka lao masoo pyoo kalyepape. 12 Nyakamame* netesa endakali dupanya enombanya auu pyoo katamana latala, nyakama-kisa mende daa jala naena lao dopa pyepape.
Kamongo dokome naima sakataseta
13 Kaimia* paluma, nyakamame endakali isa palipiamino dupa kandao masala naenge endakali joo nakatapimi laka lao masilyamano. Naima Gotepa lete etete tole katatamana lao masoo malisala naenge endakali dupame pingimali pyoo, nyakamame mona kenda nakayapimi laka lao masilyamano. 14 Doko,* Jisasa kumapala dee sakateana lao masoo minao paelyamanoli pyoo, Jisasa lao masoo minao isa palipiamino endakali dupa Goteme Jisasa-pipa tole pyao laminao ipatana lao masoo minilyamanoaka.
15 Kamongo* dokome leamoliaka pyoo naimame nyakama dapa langilyamano: Kamongo doko dee ipatamo dokopa naima kumala nayao lenge tao katatamano dupame endakali isa palipiamino dupa nyoo maita pyatala wambala nayatama etete daa. 16 Kamongo* doko tangeme kaiti doko yakinatala isa ipatamo dokopa baame mona ipupa lao puu lao lao, enjele isingi dokome wii lao, Gotenya beto doko lao pita. Dokopa Kataisa lao masoo minao kumiamino endakali dupa wambao sakatatami. 17 Dokopa* naima kumala nayao saka katatamano dupapi wamba kumiami endakali dupapimi Kamongo doko ketae kandanyalapale lao kopa dupanya yapa nyimina ketae pata. Dopa pitamopa naima koteaka lao Kamongo dokopa tole katatama. 18 Dopana, nyakamame pii dutupa lao mende mona yaepasa yaepasa pyoo kalyepape.
* 4:1 Lo 12:1-2; 1 Ko 11:2; 1 Te 2:13; 2 Te 3:16 * 4:3 1 Te 5:23; Ip 10:10; 1 Pi 1:16 * 4:4 1 Ko 7:2; Ep 1:4; 1 Pi 3:7 * 4:5 Wee 79:6; Jet 10:25 * 4:6 Dit 32:35; Wee 94:1-2 * 4:7 Jo 17:19; 2 Te 2:13-14; 1 Pi 1:15-16 * 4:8 Ese 36:27; 37:14; Lu 10:16; 2 Ko 1:22; 2 Te 2:13 * 4:9 Ais 54:13; Jet 31:33-34; Jo 6:45; 13:34; 1 Jo 4:7 * 4:10 2 Te 1:3; 3:4 * 4:11 Ap 18:3; Ep 4:28; 1 Te 2:9; 2 Te 3:8,12 * 4:12 1 Ko 5:12-13; Kl 4:5 * 4:13 Ep 2:12; Kl 1:27 * 4:14 Lo 1:4; 8:11; 10:9; 14:9; 1 Ko 15:3-4,12; 2 Ko 4:14 * 4:15 1 Ko 15:51-52 * 4:16 Mt 24:30-31; 2 Te 1:7-8; 2:1-2 * 4:17 Jo 12:26