☰ 1 JONE 4
4
Sipitisa koopa epepanya leamo doko
1 Mona* setenge paluma, sambo potopesa longo paka dupa isa yuu soo pelyamo dupanya pao katapelyamino dokonya nyakamame sipitisa dupa pitaka tungi pyala nayalapape. Sipitisa dupa Gotenyape lao makande pyoo kanjepape. 2 Jisasa* Kataisa baa yonge katao ipateana lao lao panenge sipitisa doko pitaka Gotenya. Pii lao panelyamino dokome nyakamame Gotenya Sipitisa doko, doko lamo lao kandelyamino. 3 Jisasa* lao panala naenge sipitisa ongo pitaka Gotenya daa. Sipitisa doko Kataisanya yandapipi doko. Wamba nyakamame baa ipatana lapae siamino doko indupa yuunya ipao katapelyamo. 4 Wane* paluma, nyakama Gotenya kalyamino. Nyakama-pipa pakatae kalyamino Gote doko baa andake. Isa yuu koo dakenya mona setenge doko baa angi mende daa. Ongonya nyakamame sambo potopesa dupa ita minatelyamino. 5 Dupa* isa yuu dakenya endakali dokonyana dupame isa yuu dakenyaka lelyaminopa yuunya endakali dupame singima. 6 Naima* Gotenya kalyamano. Gote lao masingi endakali dokome naimanya pii singi. Gotenya endakali joo nakatenge dokome naimanya pii nasingi. Naimanya pii singipi nasingipi lao naimame kandatala Sipitisa dakeme pii kiningi lenge lamo, sipitisa dokome sambo lenge lamo lao masingi.
Auu kaenge tenge doko Gote
7 Mona* setenge paluma, endakali dupa auu kaenge mana Goteme sakatasiamo tenge dokonya naima auu kayaloo pyoo katamana. Endakali auu kayamaingi doko pitakame Gotenya mandipae joo katapala Gote lao masingima. 8 Goteme* endakali dupa auu kaenge. Endakali auu nakaenge dokome Gote masala naenge. 9 Goteme* baanya Ikiningi mendai iki doko-kisa naima lete katasalanya isa yuunya epena leamo dokome baame naima auu kaenge doko panea. 10 Naimame* Gote auu kayama dokome auu kaenge mana doko panea, daa. Goteme naima auu kayapala naimanya koo dupa kunanya nepakalanya baanya Ikiningi doko kundi joo epena leamo dokome auu kaenge mana doko panea. 11 Mona* setenge paluma, Goteme dopa pyoo naima auu kayamo dokonya naimalapo auu kayaloo pyoo katapenge. 12 Wambapi* indupapi endakali mendeme Gote nakandenge. Naima auu kayaloo pyoo kalyamano kandao doko, Gote naima-pipa pakatae kalyamopa baanya auu kaenge doko naima-kisa sulu soo singi.
13 Baame* baanya Sipitisa naima diamo ongonya naima baa-pipa pakatae katapumanopa baa naima-pipa pakatae kalyamanona lao masilyamano. 14 Takange* dokome Ikiningi doko isa yuunya endakali dupa pyoo nyala epena leamo doko naimame kandatala lao panelyamano. 15 Jisasa* baa Gotenya Ikiningina lao lao panenge endakali doko Gote-pipa pakatae kalyamopa Gote baa-pipa pakatae katenge. 16 Goteme* naima auu kaelyamo doko naimame kandatala masoo minao kalyamano. Goteme endakali dupa auu kaenge. Auu kayamaingi endakali doko Gote-pipa pakatae kalyamopa Gote baa endakali doko-pipa pakatae katenge. 17 Goteme* endakali yapatamo gii dokopa naima paka nakayao katatama lao Jisasa kalyamoli pyoo naima isa yuu dakenya kalyamano dokonya-kaita baanya auu kaenge doko naima-kisa sulu soo silyamo. 18 Goteme* naima auu kayapumopa paka nakaelyamano. Kini, Goteme naima auu kayalakao kaelyamopa naimanya paka kaenge doko watao pingi. Doko, paka kaenge doko koo pingi dokonya yanu. Paka kaenge endakali doko-kisa Gotenya auu kaenge doko sulu soo nasingi. 19 Goteme* naima wambao auu kayamo tenge ongonya naimame endakali auu kayao kalyamanoaka. 20 Endakali* mendeme Gote auu kaelyona latala endakali yango doko imbu kayamaitamo kandao doko, baa sambo lenge akali joo katata. Endakali yango lengeme kandenge doko auu nakayatamo kandao doko, baame Gote lengeme nakandenge doko kapa pao auu nakayata. 21 Naimame* baa-kisa mana nyiamano doko dapa: Gote auu kaenge endakali dokome endakali yango doko auu kayapengeaka.
* 4:1 Mt 7:15; 24:24; 1 Ko 12:10; 1 Te 5:21; 1 Ti 4:1-14; 1 Jo 2:18; 2 Jo 7; Ju 4 * 4:2 1 Ko 12:3 * 4:3 2 Te 2:4; 1 Jo 2:18; 2 Jo 7 * 4:4 Mt 12:29; 1 Jo 3:20; 5:4-5 * 4:5 Jo 15:19 * 4:6 Jo 8:47; 14:17; 1 Jo 3:10 * 4:7 1 Te 4:9; 1 Jo 2:29 * 4:8 1 Jo 4:16 * 4:9 Jen 22:12; Mt 21:27; Jo 3:16 * 4:10 Dit 7:8; Lo 3:25; 5:8,10; 8:31; 1 Jo 2:2 * 4:11 Mt 18:33 * 4:12 Jo 1:18; 6:46; 1 Jo 2:5-6; 4:17 * 4:13 Lo 5:5; 8:9; 2 Ko 1:22; 1 Jo 3:24 * 4:14 Jo 3:17; 4:42 * 4:15 1 Jo 5:5 * 4:16 1 Jo 4:7-8 * 4:17 Lo 8:15; Je 2:13; 1 Jo 2:5-6,28; 3:2-3; 4:12 * 4:18 2 Ti 1:7 * 4:19 1 Jo 4:9-10 * 4:20 1 Pi 1:8; 1 Jo 2:4 * 4:21 Mt 5:44-45; 22:36-40; Mk 12:29-31; Jo 14:15,21; 15:17
☰