12
Matiame wele tunduma pipae mendeme Jisasanya moko kai pyakamaiyamo doko
(Mt 26:6-13; Mk 14:3-9)
1 Napinya Kayamo Gii doko ene ipanya yuu gii tokange siamopa Jisas baa Betani yuu dokonya pea. Betani yuu dokonya Jisasame malunya sakatena leamo alaki Lasatasa doko katea.
2 Yuu doo tange mendapuame Jisasanya nee yangakamaiyami. Matame nee mokosiamopa, Lasatasa baa Jisasa mau-pipa awapa peteami.
3 Dopa piaminopa, Matiame wele tunduma pipae nalata lenge etete angi muni longome sambenge penge yakanemende nyepala Jisasanya moko kai pyakamaiya. Dopa petala baanya aiyomba itimi Jisasanya mokonya tombe kunao nepakamaiya. Wele dokonya tunduma epe dokome anda doko tumbia.
4-5 Dopaka doko, baanya disaipele dupanya mende Jutasa Isaketiote lenge baa enge nyalanya piamo akali dokome lao pituu, “Naimame wele dakeme endakali dupa-kisa topo pyao muni kina andate tepomapi mende nyepala, endakali tipya dupa maima naenya aopuma pilyamape?” lea.
6 Baame dopa leamo doko endakali tipya dupa lao masetala laa naya. Daa baa waa nenge akali dokonyana, baame muni bokosa isingi dokonya muni setalyamino dupa baame waa nyingi.
7 Dokopa Jisasame lao pituu, “Enda dokome pina kayalapa. Baame wele doko setao pituu namba malu pitamino gii doko kandao nyeta.
8 Endakali tipya dupa koteaka lao nyakama-pipa katengema. Dopaka doko, namba nyakama-pipa koteaka lao nakatatamana,” lea.
Lasatasa pyao kumasemana lao pii lao kambuiyamino doko
9 Juta endakali kambu andake mende Jisasa Betani kalyamo lapae sepala, kanjanya pyoo epeami. Dokaitame Jisasa iki kanja ipa naenya, Lasatasa baa Jisasame wamba malunya sakatena leamo doko apataka kanjanya epeami.
10 Pitisa mupa dupame Lasatasa apataka pyao kumasemana lao pii lao kambuiyami.
11 Tenge doko Lasatasa mambele Juta longo dupame pao Jisasa lao masoo miniaminosa dopa piami.
Jisasa Jetusaleme kiŋi dupa pengemali pyoo peamo doko
(Mt 21:1-11; Mk 11:1-11; Lu 19:28-40)
12 Taita dopa pyoo Napinya Kayamo Gii epe doko kanjanya endakali kambu andake Jetusaleme ipao kateamino dupame Jisasa epelyamo lapae doko siami-pyaa.
13 Sepala kodaitame ita pame yoko dupa nyoo soo, Jisasa kaitinisa kandanyemana latala epeami-pyaa. Ipao pituu, dokaitame puu lao lao pituu,
“Embame pyoo nyoo katape!
Akali epelyamo dake auu pisetaena,
Kamongo Goteme epena lapumopa epelyamo!
Baa Isataelemanya Kiŋi dokona!” leami.
14-15 Pii pepa pyapea singili pyoo, Jisasame mena dongi mende kandao nyepala dokonya ketae petea. Pii pepa pyapae singi dokonya,
“Taono Sayone, emba paka nakayape.
Embanya Kiŋi doko epelyamo kanda.
Baa dongi yakane mendenya kisa pituu epelyamona,” lapae singi.
16 Piamo dutupanya tenge doko baanya disaipele dupame wambakao masala nayami. Dopaka doko, maitakao Jisasa kenge andake nyiamo dokopa baa kandao lapae sia lamo lao kandeami. Dee baa-kisa piamo dupa masiamiaka.
17 Lasatasa malu petae kateamo doko Jisasame epena latala malunya sakatasiamopa awapa katao kandeamino endakali kambu dokome dopa piamo doko lao tayami.
18 Endakali kambu dokome Jisasame kongali doko piana lapae siamino dokonya, kaitinisa kandanyalanya epeami.
19 Dokopa Patasi dupame nyakamalapo mende lamai lamai pyoo, “Kanjepa! Yuunya endakali paliuu pelyamo ongo pitakame baa watao pelyaminona, naimame mende pitamanopa kapa napyapomona,” leami.
Gitiki mendapuame Jisasa kandamana lao masiamino doko
20 Napinya Kayamo Gii epe dokonya endakalipi dupame Gote tama pyaanya Jetusaleme peamino dokonya kainanya Gitiki endakali mendapua apata peamiaka.
21 Gitiki dokaitame Pilipa kateasa pupala baa lamaiyoo, “Akali Andake, naimame Jisasa kandapuma laka lao masilyamanona,” leami. (Pilipa doko Galili yuu dokonya yuu taono Betesaita tange.)
22 Dopa lateaminopa Pilipame pao Endutu lamaitala Endutupa Pilipapame pao Jisasa lamaiyambi.
23 Dokopa Jisasame dolapo lamaiyoo, “Endakalinya Ikiningi doko kenge andake nyepenge gii doko ipatelyamo.
24 Nambame nyakama etete kiningi langilyona, wiisa dii mende isa kopo latala tambala naelyamo kandao doko, baa iki singi. Dopaka doko, baa tambelyamo kandao doko, langa latala dii longo mandenge.
25 Endakali mendeme baanya lete katenge doko auu kayatamo kandao doko, baanya lete katenge doko alu pita. Dee endakali mendeme baanya isa yuunya lete katenge doko maita maitamo kandao doko, baame baanya lete katenge doko auu pyoo isoo pao lete etete katenge doko kandao nyetamo gii dokonya tuu lata.
26 Endakali mendeme namba lao masetala kalai pitamo dokome namba watao paena. Namba katato yuu dokonya nambanya kalai akali doko tange tole katatamba. Namba lao masetala kalai pitamo endakali doko nambanya Takangeme lalyetana,” lea.
Jisasame baa kumapenge dokonya leamo doko
27 Dopa latala dee Jisasame lao pituu, “Indupa namba mona etete kenda kaelyo. Dopaka doko, nambame aipa lawape? ‘Apane, embame namba-kisa kenda pipae epelyamo doko nyoo nepaka,’ lawape? Daa, dopa nalato. Namba epeo doko tenge dokonya epeona nambanya gii doko ipatelyamo.
28 Apane, embame embanya kenge doko andake jina lape,” lea. Dopa lateamopa pii lapae mende kaiti-kisa katao epeamo dokome, “Nambame nambanya kenge doko andake jina latelyona, dee dopaka pyoo andake jina latona,” lea.
29 Dokopa endakali kambu dosa kateamino dupame sepala lao pituu, “Kaiti kalyumuna,” leami. Dopa leaminopa yangi dupame, “Enjele mendeme baa pii lamaiyumuna,” leami.
30 Dokopa Jisasame dokaita lamaiyoo, “Pii lalamo doko nambame satale lao nalalamo. Daa, nyakamame salapale lao lalamo.
31 Indupa Goteme isa yuunya endakali dupa mokosalanya pilyamo. Indupa baame isa yuu dakenya isingi doko watao pyalanya pilyamo.
32 Endakali dupame namba yuunya minalyatamino dokopa nambame endakali dupa pitaka namba tengesa pyalya lao nyotona,” lea.
33 Baame dopa leamo doko, baa dopa pyoo kumatona lao makande pyoo lea.
34 Dopa lateamopa endakali kambu dokome baanya pii yanu pyakamaiyoo, “Kataisa doko baa tenda tendapi katawaka katatana lapae doko Gotenya pii pepa pyapae dupanya naimame siamana, dee aipa petala Endakalinya Ikiningi doko minalyapengena leepe? Endakalinya Ikiningi doko apipi?” leami.
35 Dopa leaminopa Jisasame dokaita lamaiyoo, “Gii kuki mende tii pipae doko nyakamanya kainanya mee kalyapomo. Iminjetae doko nyakama-kisa naepena lao tii pingi doko kalyamo dokonya payalapape. Endakali mende iminjetaenya pelyamo dokome baa anja pelyopa lao masala nayao penge.
36 Tii pingi doko nyakama-pipa kalyamo dokopa nyakama tii pingi dokonya wane jalapalena baa lao masoo minalapapena,” lea. Jisasame pii dutupa latala, baame dokaita yakinatala baa yalo pyoo pea.
Endakali dupame Jisasa lao masoo minala nayamino doko
37 Jisasame kongali longo piamopa dupame kandeaminoaka doko, baa lao masoo minala nayami.
38 Dopa piamino dokome potopesa Aisayame pii leamo dake angi jia: “Kamongo, naimame pii lamaiyamano doko apimi masoo miniape? Kamongome baanya pupu lapae doko api-kisa paneape?” lea-pyaana lapae silyamo.
39-40 Aisayame dee lao pituu, dupame kapa pao baa lao masoo minala nayapengema tenge doko dapa: “Goteme dokaitanya lenge minao iminjetala, mona minao kana injisia. Dupame lengeme nakandena lawapi, moname masala naena lawapi, dee nambame dupa auu pisatale lao namba tengesa pilyala naena lawapi piana,” lea-pyaa.
41 Aisayame dopa leamo doko Kataisanya tii pipae doko kandatala baa kandao lea-pyaa.
42 Dopa leamoaka doko, isingi akali longo mendapuame apata baa lao masoo miniami. Dopa piaminoaka doko, Patasi dupame Jutamanya losuu anda dokonya watao pyatamini latala masoo miningi doko lao panala nayami.
43 Dupame nyakama Goteme lalyina lao epao auu nakaenya, endakalimi lalyina lao epao auu kayami.
Jisasanya pii lapae dokome endakali dupa mokoseta
44 Jisasame puu lao lao pituu, “Endakali mendeme namba lao masoo minatamo dokome namba masoo minala nayata. Namba puu leamo doko baame masoo minata.
45 Dee namba kandatamo endakali dokome namba puu leamo doko kandata.
46 Namba lao masoo minatamo endakali doko pitaka iminjetae dokonya nakatena lao namba tii pipae joo isa yuunya epeo.
47 Dee endakali mendeme nambanya pii dupa sepala watao minala naelyamo kandao doko, nambame baa-kisa tenge setala naenge. Namba epeo doko, yuunya endakali dupa-kisa tenge setalanya naepeo. Daa, nambame yuunya endakali dupa pyoo nyalanya epeo.
48 Endakali mendeme namba maita ditala nambanya pii dupa nanyetamo endakali doko-kisa tenge setao kalyamo. Pii nambame lamaiyo dokome yuu etatamo gii dokopa baa-kisa tenge setata.
49 Doko, nambame pii lenge doko namba tangeme masoo laa naenge. Daa, namba puu leamo Takange dokome nambame pii lapenge dupa lape leamoli pyoo lenge.
50 Nambame pii lape leamo doko lete etete katengena lao nambame masilyo. Dopana, nambame pii lelyo dupa Takangeme namba langiamoli pyoo lengena,” Jisasame lea.