15
Getepe tenge doko Jisasa
1 Dee Jisasame lao pituu, “Getepe tenge angi doko namba. Getepe ee isingi doko nambanya Takange doko.
2 Nambanya wangya dupanya dii manja naenge doko pitaka baame kepao nepenge. Dii mandenge wangya doko pitakame dii epao mandena lao baame wasoo auu pisingi.
3 Nambame pii langingi dupame nyakama wasoo auu petelyamo.
4 Namba nyakama-pipa pakatae katatona nyakama namba-pipa pakatae kalyepape. Getepe wangya mende getepe tenge dokonya nakatatamo dokome kapa pao dii mende baa tangeme manja nayata. Dokaita joo nyakama namba-pipa pakatae kalya nayatamino doko dii mende manja nayatami.
5 “Getepe tenge doko namba. Wangya dupa nyakama. Endakali mende namba-pipa pakatae katelyamopa namba baa-pipa pakatae katelyo endakali dokome dii longo lao mandenge. Doko, nyakamame namba yakinatamino doko, nyakamame kapa pao opale mende napitami.
6 Endakali mende namba-pipa pakatae nakatatamo doko, getepe wangya kepao netesa nepatae sapupelyamopa nyoo elyambu petala itatenya soo yangengesa tao molyingili pita.
7 Nyakama namba-pipa pakatae katataminopa nambanya pii dupa nyakama-kisa salakao setamo kandao doko, nyakamame opale mende tee latamino doko lataminoli pyoo nyakama-kisa pita.
8 Nyakamame dii longo lao mandyuu nambanya disaipele joo katamino dokome nambanya Takange doko lalyetelyamino.
9 Takange dokome namba auu kaengeli pyoo nambame apata nyakama auu kaelyoaka. Dopana, nyakama nambanya auu kaenge dokonya kalyepape.
10 Nambame nambanya Takangenya mana setapae dupa watao minatala baanya auu kaenge dokonya katenge. Dopaka pyoo nyakamame nambanya mana setapae dupa watao minatamino kandao doko, nyakama nambanya auu kaenge dokonya katatami.
11 “Nambame nyakama pii langingi dupa, nambanya mona yaepenge doko nyakama-kisa setamopa nyakama etete mona yaepao kalyepale lao langingi.
12 Nambanya mana setapae doko dapa: nambame nyakama auu kaelyoli pyoo, nyakamame nyakama tangelapo mende auu kaya kaya pyoo kalyepape.
13 Endakali mendeme baanya kaita miningi dupa nisoo kumilyamo mana dokome auu kaenge mana waka dupa pitaka ita miningi.
14 Nambame nyakama pyepa lato dupa pitamino kandao doko, nyakama nambanya kaita miningi joo katatami.
15 Nambame nyakama kendemanena dee nalapenge. Doko, kendemane dokome baanya akali andake dokome pilyamo doko nakandenge. Dopaka doko, nambame nyakama nambanya kaita miningina leo. Doko, nambame nambanya Takange-kisa pii sio dupa pitaka nyakama langio.
16 Nyakamame namba yapao nanyiami. Nambame nyakama yapao nyio. Nambame nyakama yapao nyoo katasio doko, nyakamame pupala dii manjepale lao pio. Dopana, nyakamame koteaka lao dii mandyuu katao namba lao masetala opale mende nambanya Takange-kisa tee latamino doko baame nyakama dita.
17 Nambame nyakama dapa pyepape lelyo: nyakamame mende auu kaya kaya pyoo kalyepape,” lea.
Yuunya endakali dupame yandapipi jetamina Jisasame leamo doko
18 Jisasame lao pituu, “Yuunya endakali dupame nyakama yandapipi jiami kandeno doko, wambao dupame namba yandapipi jingima doko masalapape.
19 Nyakama yuunya endakali pili kandao doko, dupame nyakama tatana lao auu kayapimili. Dopaka doko, nyakama yuunya endakali daa. Nambame nyakama yuunya endakali dupanya kaina dokonya yapao nyio tenge dokonya dupame nyakama yandapipi jetami.
20 Nambame nyakama pii langio datupa masalapape: kendemane mendeme baanya akali andake doko ita naminingi. Dupame namba watao piami tamo kandao doko, nyakama apata watao pyatamiaka. Dupame nambanya pii doko watao miniami tamo kandao doko, nyakamanya pii doko apata watao minatamiaka.
21 Dopaka doko, namba puu leamo doko dupame nakandengema dokonya, nyakamame namba watao payataminosa dupame mana dutupa pitaka nyakama-kisa minatami.
22 Nambame ipupala dupa pii lamaiya nayoli kandao doko, dupa-kisa koo nasipyali. Dopaka doko, indupa dupame nyakamanya koo dokonya pii mende lapenge nanjilyamo.
23 Namba yandapipi jetamo endakali dokome nambanya Takange doko apata yandapipi jetaka.
24 Kalai tata endakali waka dupame napiami nambame dupanya kainanya pilyo dupa napipuli kandao doko, dupa-kisa koo nasipyali. Dopaka doko, indupa dupame kandatala nambapa nambanya Takangepa nalimba lapota yandapipi jilyamino.
25 Gotenya pii pepa pyapae itaki pilyamino dokonya, ‘Namba kandao mee yandapipi jetamina,’ lapae singi pii doko angi jina lao dupame pipenge pilyamino.
26 “Nyakama nisingi doko Takange-kisa katao ipatamo dokopa, nambame Takange-kisa katao nyakama-kisa epena lato. Epena lato doko baa kiningi lenge Sipitisana, dokome nambanya lao nyakama pii langita.
27 Dokopa nyakamame apata pii lamaitamiaka. Doko, nyakama namba-pipa tee pyao kateamino doko kalyaminona,” lea.