6
Jisasame akali taosene yuungi nee maiyamo doko
(Mt 14:13-21; Mk 6:30-44; Lu 9:10-17)
1 Dopa latala maitakao Jisasa baa endaki Galili pete kenge mende Taipitiasa lengema dokonya omotena pea.
2 Baame endakali yaina pyapae dupa mee injisiamo kandeamino dokonya, endakali kambu etete longome baa watao payao kateami.
3 Dopa piaminopa Jisasa baa yuu manda mendenya pupala baanya disaipele dupa-pipa dokonya petea.
4 Jutamanya Napinya Kayamo Gii epe doko tengesa pia.
5 Jisasame kandayoko latala kandeamopa endakali kambu etete longo baa peteasa epeami. Epeamino kandatala baame Pilipa lamaiyoo, “Endakali dakaita nee nena anja sambakamaiyamape?” lea.
6 Baame dopa leamo doko pitamo dupa tange masoo pituu, Pilipa makande pyoo lea.
7 Pilipame yanu pyao, “Naimame muni kina andate lapomapi mendeme nee sambatamanopapi endakali dakaita pitakame kuki kuki lawapi kapa napapome lamona,” lea.
8-9 Baanya disaipele dupanya mende Endutu lenge Saimone Pita kaiminingi dokome baa lamaiyoo, “Wane mende pilyamo angenya betesa bali diimi wasepae yuungi wapaka lapoma pyoo silyamo. Dopaka doko, dutupame endakali longo dakenya aipa petala kapa patape?” lea.
10 Dokopa Jisasame baanya disaipele dokaita lamaiyoo, “Endakali dupa nyoo isa pisalapa,” lea. Panda dosa tanu longo kateamopa endakali dupa isa peteami. Akali dupa taosene yuungi jowapi mende.
11 Dokopa Jisasame betesa dutupa nyepala Gote lao yaka pilino latala endakali peteamino dupa mokosoo maiya. Mendai dopaka pyoo wapaka dolapo mokosoo maiya. Kakana soo nena lao mokosoo maiya.
12 Dupame nao tiaka kayateamino dokopa baame baanya disaipele dupa lamaiyoo, “Nee konjepae mendapua mee soo patana nyakamame kakana seta dupa nyoo mau pyalapa,” lea.
13 Dokopa dupame napeaminopa betesa bali diimi wasepae yuungi dutupanya konjepae kakana siamo dupa nyoo mau pyatala baseketa mandi kingi ita-kisa dee lapomanya mandyuu tumbasiami.
14 Dopa pyoo Jisasame kongali piamo doko endakali dupame kandatala, “Kiningi, dake isa yuunya ipatana lengema Potopesadoko lamona,” leami.
15 Endakali dupame ipao Jisasa baa minatala kiŋi joo katena laanya piamino kandatala baa iki yuu manda dokonya dee pea.
Jisasa endaki ketae moko katao payamo doko
(Mt 14:22-23; Mk 6:45-52)
16 Yuu kuala epeamopa Jisasanya disaipele dupa lanao endaki pete dokonya paanya peami.
17 Pao sipi mendenya pitipao pituu endaki dokonya omotena Kapaneame peami. Yuu kuiyoo iminjiamopa dokaita peteamisa Jisasa ipatala naya.
18 Dokopa poo andake mende latala endaki doko buli pia.
19 Dokaita sipinya pituu kilomita yuungi tokangepi mende joo peaminopa Jisasa endaki pete dokonya moko katao sipi dokonya tengesa epeamo kandatala pakame kumiami.
20 Dopa piaminopa baame dokaita lamaiyoo, “Nambana paka nakayalapape,” lea.
21 Dokopa dupame baa sipinya lanyipuma laka lao masiami. Dopa piaminopa sipinya pituu mona lao masiamino yuu dokonya lee mendai pao pyakameami.
Endakali dupame Jisasa kutiamino doko
22 Taita dopa pyoo endaki pete dokonya omotena kateamino endakali kambu dupame kuaka sipi waka mende nasipumopa mendai iki sipya. Dokonya Jisasa baa baanya disaipele dupa-pipa awapa pyakalyetala napupyana baanya disaipele dupa iki pupimina lao masiami-pyaa.
23 Sipi waka Taipitiasa tange mendapua ipao Kamongome betesa nyepala yaka pilino lateamopa neamino panda dosa tengesa ipao sia-pyaa.
24 Dokopa endakali kambu dupame Jisasapi dee baanya disaipele dupapi kalyamipi lao kandeaminopa nakateaminya sipi dupanya pyakalyetala pituu Jisasa kutao Kapaneame epeami.
Jisasa baa betesa lete etete katenge doko
25 Endaki pete dokonya yangitena Jisasa kateamo kandatala dupame baa lamaiyoo, “Mana Lenge Akali, emba gii aipa pyoo ae ipupipi?” leami.
26 Jisasame yanu pyao lamaiyoo, “Nambame nyakama etete kiningi langilyona, nambame kongali kalai yale pipupa kandapimino dokonya nyakamame namba kutao naepelyamino. Daa nyakama betesa nao tiaka kayapimino dokonya namba kutao epelyamino.
27 Nyakamame nee koyao tamuingi doko nyalanya kutao nakalyepape. Lete etete katasepenge nee doko kutao nyoo kalyepape. Nee doko Endakalinya Ikiningi dokome nyakama dita. Doko, Takange Gote dokome dopa pina lao kapana leana,” lea.
28 Dupame yanu pyao baa lamaiyoo, “Naimame Gotenya kalai dupa aipa pyoo pitamape?” leami.
29 Jisasame yanu pyao dokaita lamaiyoo, “Gotenya kalai doko dapa: baame pena leamopa epeamo akali doko lao nyakamame masoo minalapape,” lea.
30 Dupame baa lamaiyoo, “Naimame kandatala emba lao masoo minamana, embame aki kongali mende pitipi? Embame aipa pitipi?
31 Naimanya yumbange dupame endakali napalenge yuu dokonya nee kenge manaa lenge doko neami. Pii pepa pyapae singi dokonya, ‘Baame kaitinya-tae betesa doko dupa nena lao maiya-pyaana,’ lapae silyamona,” leami.
32 Jisasame dokaita lamaiyoo, “Nambame nyakama etete kiningi langilyona, Moseseme nyakama kaitinya-tae betesa nandia. Nambanya Takange dokome kaitinya-tae betesa angi doko nyakama dingi.
33 Gotenya betesa doko kaiti-kisa katao isa yuunya endakali dupa lete katasala epelyamo dakena,” lea.
34 Dokopa dokaitame baa lamaiyoo, “Kamongo, koteaka lao betesa doko naima dipi,” leami.
35 Jisasame dokaita lamaiyoo, “Lete katasingi betesa doko namba. Endakali mende namba-kisa ipatamo doko kukipi mende lopo nakayata. Endakali mendeme namba lao masoo minatamo doko kukipi mende endaki dee nanu nakayata.
36 Dopaka doko, nambame nyakama langitapupa nyakamame namba kandatapimiboaka doko, namba masoo minala naelyamino.
37 Takangeme endakali namba ditamo dupa pitaka namba-kisa ipatami. Namba-kisa ipatamo endakali doko nambame kukipi watao pyala nayato.
38 Doko, namba kaiti-kisa katao isa epeo doko, namba tangenya masotoli pyaanya naepeo. Daa, namba puu leamo dokonya masingili pyaanya epeo.
39 Namba puu leamo dokome pipili lao masingi doko dapa: baame namba endakali diamo doko pitakanya mende nambame yakinala naenya, yuu etatamo gii dokopa pitaka malunya sakatasipi laka lao masingi.
40 Nambanya Takangenya masingi doko dapa: Ikiningi doko kandatala baa lao masoo minatamo endakali doko pitaka lete etete katapimi laka lao masingi. Dee yuu gii etatamo dokopa nambame endakali doko malunya sakatasipi laka lao masingiakana,” lea.
41 Baame lao pituu, “Kaiti-kisa katao isa epeamo betesa doko nambana,” leamosa Juta dupame baa kandao mumu leami.
42 Dupame lao pituu, “Akali dake Josepe ikiningi Jisasa daa kandamuape? Baanya endangi takangepa dolapo naima nakandengepe? Indupa baame aipa petala baa kaiti-kisa katao isa epeona lelya kanjemape?” leami.
43 Dokopa Jisasame yanu pyao, “Nyakamame mumu nalalapa.
44 Endakali mende tangeme kapa pao namba-kisa naepenge. Namba puu leamo Takange dokome endakali mende pyalya lao nyilyamo kandao doko, baa namba-kisa epenge. Dee nambame baa yuu etatamo gii dokopa sakatasoto.
45 Pii mende potopesa dupame pepa piami dokonya pyapae silyamo doko, ‘Goteme endakali doko pitaka mana lamaitana,’ lapae silyamo. Takangenya pii sepala baanya mana nyingi endakali dupa pitaka namba-kisa epengema.
46 Endakali mendaipi mendeme Takange kanja naya. Gotepa tole katao epeamo akali dokome iki Takange kandea.
47 “Nambame nyakama etete kiningi langilyona, masoo minatamo endakali doko lete etete katata.
48 Lete katasingi betesa doko namba.
49 Nyakamanya yumbange dupame nee kenge manaa lenge doko endakali napalenge yuu dokonya neamino doko napala kumiami-pyaa.
50 Dopaka doko, betesa dake kaitinya katao isa epeana, doko natamo endakali doko kumala nayata.
51 Kaitinya katao isa epeamo lete etete katasingi betesa doko namba. Endakali mendeme betesa doko natamo kandao doko, baa lete etete katata. Betesa nambame maito doko nambanya yonge doko maito. Yuunya endakali dupa lete katena lao maitona,” Jisasame lea.
52 Dopa leamopa Juta dupame nyakamalapo pii yanda pyoloo pyoo, “Akali dakeme baanya yonge doko naima nalapale lao aipa petala kapa pao ditape?” leami.
53 Jisasame dokaita lamaiyoo, “Nambame nyakama etete kiningi langilyona, nyakamame Endakalinya Ikiningi dokonya yonge doko nanao baanya taiyoko doko nanao pitamino kandao doko, lete katenge doko nyakama-kisa naseta.
54 Nambanya yonge doko nao taiyoko doko nao pitamo endakali doko lete etete katata. Yuu gii etatamo dokopa nambame baa sakatasoto.
55 Doko, nambanya yonge doko nee angi. Dee nambanya taiyoko doko endaki angi.
56 Nambanya yonge doko nao taiyoko doko nao pitamo endakali doko namba-kisa katatamopa namba baa-kisa katato.
57 Takange lete katenge dokome namba puu leamo Takange doko mambele namba apata lete kalyo. Mendai dopaka pyoo namba natamo endakali doko namba mambele lete katata.
58 Kaiti-kisa katao isa epeamo betesa doko dake. Betesa dake wamba yumbange dupame napala kumiamino dopale daa. Betesa dake natamo endakali doko lete etete katatana,” lea.
59 Baame Kapaneame yuu dokonya Jutamanya losuu anda dokonya mana lamaiyoo katao pituu, pii dutupa lea.
Lete etete katasingi pii doko
60 Baanya disaipele dupanya longo dupame pii dutupa sepala lao pituu, “Pii dutupa kenda pyumuna apimi kapa pao sakamaitape?” leami.
61 Jisasame baanya disaipele dupame pii dutupanya mumu lelyamino lao masetala dokaita lamaiyoo, “Pii dutupame nyakamanya masingi kenda pisilyape?
62 Endakalinya Ikiningi doko wamba kateamo yuu dokonya pyakalyetamopa kandatamino kandao doko, aipa pitami laape?
63 Sipitisa dokome iki endakali lete katasingi. Yongeme mende napingi. Pii nambame nyakama langilyo dupa mambele Sipitisa doko ipupala baame nyakama lete katasipumopa nyakama lete kalyamino.
64 Dopaka doko, nyakamanya mendapuame masoo minala naelyaminona,” lea. Doko, wamba tee piamo dokopa Jisasame masoo minala nayamino endakali dupapi baa enge nyetamo akali dokopi dupa masia.
65 Baame dee lao pituu, “Tenge dokonya nambame nyakama langilyona, endakali mende Takangeme kyoto injisala nayatamo kandao doko, kapa pao namba-kisa naipatana,” lea.
66 Jisasame pii dutupa lateamosa baanya disaipele dupanya longo dupame baa yakinatala peami. Baa-pipa dee tole napayami.
67 Dokopa Jisasame akali kingi ita-kisa dee lapoma dutupa lamaiyoo, “Nyakama apata kayapala mona lao masilyamipi?” lea.
68 Saimone Pitame yanu pyao, “Kamongo, emba-kisa lete etete katasingi pii dupa silyamo doko, naima api-kisa patamape?
69 Naimame emba Gotenya akali epe etete dokona lao masoo minawapi kandawapi etelyamanona,” lea.
70 Jisasame dokaitanya pii yanu pyakamaiyoo, “Nambame nyakama kingi ita-kisa dee lapoma yapao nyiona nyakamanya mende enjele koo jeta aipape?” lea.
71 Baame Saimone Isaketiote ikiningi Jutasa kandao lea. Jutasa doko akali kingi ita-kisa dee lapoma dutupanya mendeaka doko, baame Jisasa enge nyia.