15
Jisasa anjoo soo Pailate kateasa peamino doko
(Mt 27:1-2,11-14; Lu 23:1-5; Jo 18:28-38)
1 Dokopa Pitisa mupa dupapi, Jutamanya isingi akali dupapi, mana setapae masingi akali dupapi, kanjole dupa pitakapi dutupa yongama wamba kambuiyami-pyaa. Lao kambutala Jisasa anjetala laminao pao Pailate maiyami-pyaa.
2 Dopa piaminopa Pailateme baa pisoo, “Emba Jutamanya Kiŋi dokope?” lea-pyaa. Dopa leamopa baame Pailatenya pii yanu pyakamaiyoo, “Embame latelenona,” lea-pyaa.
3 Pitisa mupa dupame baa-kisa tenge longo seteami-pyaa.
4 Dokopa Pailateme baa dee pisoo, “Kandeleno, dakaitame emba-kisa tenge longo lao setelyamino doko, embame piipi mende yanu pyao nalelepe?” lea-pyaa.
5 Dopa leamopa Jisasame dee pii mende yanu pyao nalea-pyaa. Dopa piamopa Pailate baa etete mona andea-pyaa.
Jisasa pyao kumasina Pailateme leamo doko
(Mt 27:15-26; Lu 23:13-25; Jo 18:39–19:16)
6 Ee kana dii lao Napinya Kayamo Gii epe doko epelyali pyoo, Pailateme endakali anjetae palelyami dupanya mendai mende endakali dupame mokekena lelyamili pyoo mokata pyakamaingi-pyaa.
7 Gii dokopa akali Batapasa lenge mendepi endakali mendapua-pipame kapomane yanda pimaiyoo endakali mendapua pyao kumasetala anjetae paleami-pyaa.
8 Endakali kambu dupame ipupala Pailateme pandi pyekengeli pyekena lao tee leami-pyaa.
9 Dopa leaminopa Pailateme dokaita pisoo, “Nambame nyakamanya Kiŋi doko mokakapili lao masilyamipi?” lea-pyaa.
10 Pitisa mupa dupame Jisasa tilya maitala baa maiyamino doko masetala dopa lea-pyaa.
11 Dopa leamoaka doko, pitisa mupa dupame akali Batapasa doko mokekena lamana lao endakali kambu dupanya mona mende pali-pali pyakamaiyami-pyaa.
12 Dopa piaminopa Pailateme dokaita deaka pisoo, “Nyakama Jutamanya Kiŋi lengema dake nambame aipa pyakawape?” lea-pyaa.
13 Dopa leamopa dupame deaka puu lao lao, “Ita pokonya pyao yuka!” leami-pyaa.
14 Dopa leaminoaka doko, Pailateme dokaita lamaiyoo, “Baame koo aki mende piape?” lea-pyaa. Dopa leamopa dokaitame eteteaka puu lao lao, “Baa pyao yuka!” leami-pyaa.
15 Pailateme endakali kambu dupanya mona epe palisakamaitoo lao masetala Batapasa doko mokakamaiya-pyaa. Dopa petala yanda singi dupame Jisasa konjamepyapala pyao yukuina lao dokaita maiya-pyaa.
Yanda singi dupame Jisasa minakasoo lamba leamino doko
(Mt 27:27-31; Jo 19:2-3)
16 Dokopa yanda singi dupame Jisasa laminao kapomane isingi akali andake petenge anda dokonya kolandatala yanda singi tata doko pitaka ipao kambu pina leami-pyaa.
17 Dupame yonge pee wene pyapaele mende baanya petakamaitala ikililyambu kende mendapua nyoo langapu petala Jisasanya aiyombanya pyakamaiyami-pyaa.
18 Dupame baa minakasoo lalyoo, “Jutamanya Kiŋi, emba auu pyoo katape!” leami-pyaa.
19 Dupame kyoo konjame aiyombanya pyapa sopakalimi pyapa petala baa minakasoo luma lakao baa tama piami-pyaa.
20 Dupame baa minakasoo etapala dokopa yonge pee wene pyapaele wamba pyakamaiyamino doko lyokao nyepala baanya dupa tange pyakamaiyami-pyaa. Dopa petala baa pyao yukualanya laminao peami-pyaa.
Jisasa ita pokonya pyao yukuiyamino doko
(Mt 27:32-44; Lu 23:26-43; Jo 19:17-27)
21 Dokopa akali Saimone lenge doko kamalyatena katao yuu taono dokonya paanya epeamopa yanda singi dupame kaitinisa kandanyetala Jisasanya ita poko doko sakamaina leami-pyaa. Akali doko yuu taono Saitini tange Alekesandapa Lupasapanya takange-pyaa.
22 Dokopa dupame Jisasa laminao yuu kenge Golokota lenge dokonya pao pyakameami-pyaa. Kenge Golokota doko kapilyoo Matenakulimanda lengema.
23 Yuu dokonya pupala dupame baa tanda kayatame lao waene mende matasini-pipa pyasilya pyasena petala Jisasa nena lao maiyami-pyaa. Dopa piaminoaka doko, nanenya kaya-pyaa.
24 Dokopa dupame Jisasa ita pokonya pyao yukuiyami-pyaa. Yanda singi dupanya apimi Jisasanya yonge pee dupanya mende nyetape lao kana yakane dupa pyasoo male pyooita miniamino akali dupame mokosoo nyiami-pyaa.
25 Yongama niki popo pyaa gii ongonya Jisasa pyao yukuiyami-pyaa.
26 Jisasa-kisa tenge seteami pii doko, “Jutamanya Kiŋi dokona,” lao pepa pyatae katea-pyaa.
27 Baa-pipa awapa dee akali pake nao makongao paenge lapoma apata pyao yukuiyami-pyaa. Mende doko baanya kingi tolae-kaita, mende doko koya-kaita yukuiyami-pyaa.
28 [Dopa piamino dokome pii pepa pyapae singi dokonya, “Mana setapae nepenge endakali dupa-pipa baa pyasoo itaki pyatamina,” lapae singi doko angi jia-pyaa.]
29 Jisasa pyao yukuotae kateamo dokonya-kaita endakali payamino dupame Jisasa kilya kandao aiyomba ema-ema pyoo dapa leami-pyaa: “ ‘Losuu anda andake doko lakyepala yuu gii tepoma pitona,’ leeno akali dake!
30 Embame emba tangeme pupu latala ita poko doko yakinatala isa ipu!” lao kaa kaa leami-pyaa.
31 Mendai dopaka pyoo, akali pitisa mupapi mana setapae masingi akalipi dupame baa lamba lao nyakamalapo lao pituu, “Baame endakali waka dupa nisiamoaka doko, baa tange kapa pao nisala naelyamo.
32 Kataisa doko, naima Isataele dupanya Kiŋi doko, epapu ita poko doko yakinatala isa epena. Dopa pitamopa naimame kandatala baa lao masoo minamanalena,” leami-pyaa. Akali lapoma baa-pipa awapa yukuotae kateambino dolapome apata baa kandao pii koo leambiaka-pyaa.
Jisasa kumiamo doko
(Mt 27:45-56; Lu 23:44-49; Jo 19:28-30)
33 Kotaka andawai pungupungu dokonya pituu, yuu doko pitaka kuiyatala kuiyatayaka katao pao alemande kiloko tepo lea-pyaa.
34 Kiloko tepo dokonya Jisasame etete puu lao lao, “Eli, Eli, lema sapakatani?” lea-pyaa. Dopa leamo doko kapilyoo, “Nambanya Gote, nambanya Gote, embame namba aipuma yakinelepe?” lea-pyaa.
35 Dopa leamo doko endakali dosa kateamino dupanya mendapuame sepala lao pituu, “Ilainja lao wii lelyamona salapape,” leami-pyaa.
36 Dopa latala akali mendeme alo pyao pao koma jepaemende waene kaa pipae mendenya poyatala itakali mendenya tuku petala Jisasa nena lao makapusakamaiya-pyaa. Dopa petala baame lao pituu, “Ilainjame baa kondao nyala epelyape lao kandamana malisetalapa,” lea-pyaa.
37 Dokopa Jisasame eteteaka puu lao ae latala baa kumia-pyaa.
38 Dokopa losuu anda andake dokonya lapalapa pyatu doko ketae ulusa pituu kanguoo yuunya tuu latala lapo pyoloo pia-pyaa.
39 Yanda singi amii isingi akali Jisasanya enomba-kaita kateamo dokome Jisasa dopa pyoo kumiamo doko kandatala, “Kiningi etete, akali dake Gote Ikiningi lamona,” lea-pyaa.
40 Enda mendapuame kuki tependale pituu kandatae peteami-pyaa. Dutupanya mende doko Matia Makatala tange dokopi, dee Jemesa muu dokopa Josisapanya endangi Matia dokopi, dee Salomipi dutupame kandatae peteami-pyaa.
41 Wamba Jisasa Galili yuu dokonya kateamo dokopa enda dutupame baa watao pupala baa nisiami-pyaa. Dee enda longo mendapua Jisasa-pipa awapa Jetusaleme lalyoo peamino dupa dosa kateamiaka-pyaa.
Jisasa malu piamino doko
(Mt 27:57-61; Lu 23:50-55; Jo 19:38-42)
42 Yuu doko kualanya pia-pyaa. Yuu gii doko Sambasanya opale depa lenge kalai gii yuungi mende-pyaa.
43 Dopa pingi dokonyana Josepe Atimatia tange kanjole kenge epe singi mende epea-pyaa. Baame Gotenya isingi doko malisoo katengeaka-pyaa. Baame paka nakayao Pailate peteamo dokonya pupala Jisasa dina lao tee lea-pyaa.
44 Dopa leamopa Pailate dokome baa yapa kumalame lumu lao mona andea-pyaa. Dopa petala yanda singi amii isingi doko epena latala, “Baa kumatalape?” lao pisia-pyaa.
45 Yanda singi isingi dokome Jisasa kini kumatalamona lao lamaitiamo dokopa Josepeme kondao nyina lea-pyaa.
46 Dokopa Josepeme lapalapa epe kyoto mende sambapala pao Jisasa kondao isa nyepala lapalapa dokome ambo pia-pyaa. Dopa petala malu pipenge kananda mende tumbinya seteami dokonya setapala kana mende kapilya mina-mina pyoo minao pao malu kambu doko piti pia-pyaa.
47 Enda Matia Makatala tange dokopa Matia Josisa endangi dokopame Josepeme Jisasa seteamo panda doko kandeambi-pyaa.