5
Jisasame akali mendenya enjele koo watao pyakamaiyamo doko
(Mt 8:28-34; Lu 8:26-39)
1 Dokopa dokaita endaki pete dokonya omotena pupala Getasa tangemanya yuu dokonya peami-pyaa.
2 Jisasa baa sipi doko yakinatala peamopa akali enjele koo paleta mendeme endakali malu kananda dupanya katao ipao baa kandanyulu pia-pyaa.
3 Baa endakali malu dupanya palenge-pyaa. Endakali mendaipi mendeme kapa pao baa anjala naengema-pyaa. Nili kendepi kapa daaka-pyaa.
4 Paa longosa dupame baa kingipi mokopi dupa ŋili kendepi anengapupi dupame anjeta pilyaminopa anengapu dupa pindanya nepatala ŋili kende dupa takyoo nepenge-pyaa. Dopa pilyamopa endakali mendaipi mendeme kapa pao baa minao tambo lasapenge nanjingi-pyaa.
5 Kuka kotakapi koteaka lao baa endakali malupi yuu mandapi dupanyaka paliuu katenge-pyaa. Baame puu lao ae lao katao baanya yonge doko tange kaname konjeta pingi-pyaa.
6 Jisasa londatili kateamopa baame kandatala alo pyao ipupala baa kateamo dosa luma lakea-pyaa.
7 Dopa petala baame puu lao ae latala, “Jisasa emba Gote Etete Ketae Katenge dokonya Ikiningi, embame namba aipa pitipi? Nambame Gotenya kenge doko lao embame namba tanda andake nandipoko,” lea-pyaa.
8 Doko, Jisasame baa lamaiyoo, “Enjele koo, embame akali dake yakinatala kamanda ipu,” leamosa dopa lea-pyaa.
9 Dokopa Jisasame baa pisoo, “Emba kenge apipi?” lea-pyaa. Dopa leamopa akali dokome yanu pyao, “Naima longo dokonya nambanya kenge Longo lengena,” lea-pyaa.
10 Dopa latala Jisasame enjele koo dutupame yuu dake yakinatala pena laa naena lao baame kongo lea-pyaa.
11 Mena elyambu mende yuu manda kilikili dokonya nao kateami-pyaa.
12 Dokopa enjele koo dupame Jisasa kandao, “Naima mena dupanya koko landa pyamana dupa kalyamino dokonya pupa lapoko,” leami-pyaa.
13 Dopa leaminopa Jisasame pena kaya-pyaa. Dokopa enjele koo dupame akali doko yakinatala mena dupa-kisa pao landa piami-pyaa. Dopa peteaminopa mena elyambu doko alo pyao pao papatale mendenya pyakatala endaki pete dokonya tumbitambi napala kumiami-pyaa. Mena dupa taosene lapoma jowapi mende-pyaa.
14 Dopa piamopa mena setao katenge akali dupa paka pupala yuu taono dokonyapi mee yuupi dupanya pao lamaiyami-pyaa. Dokopa endakali dupame piamo doko kanja epeami-pyaa.
15 Dupa Jisasa kateamo dokonya ipupala kandeaminopa wamba enjele koo longo paleta katenge akali doko indupa yonge pee dupa pyoo mona paliuu peteamo kandatala paka kayami-pyaa.
16 Piamo doko lengeme kandeamino endakali dupame enjele koo paleta akali doko-kisa piamo dokonya lawapi dee mena dupanya lawapi endakali epeamino dupa lamaiyami-pyaa.
17 Dokopa dupame Jisasa baa nyakamanya yuu doko yakinatala pena lao kongo leami-pyaa.
18 Dopa leaminopa baa sipi ongonya pyakalyiamopa wamba enjele koo paleta kateamo dokome baa apata buaako lea-pyaa.
19 Dopa leamopa Jisasame ongonya ŋee nalea-pyaa. Nee nalenya baa lamaiyoo, “Embame embanya andaka emba palu dupa katatamisa puu. Pupala Kamongo dokome embanya pyakalamo dupapi dee emba kondo kayalamo dokopi dutupa dupa lamaipina,” lea-pyaa.
20 Dopa leamopa akali dokome pupala baa-kisa Jisasame piamo dupa pitaka Dekapolisa yuu dokonya panao lamaiya-pyaa. Dopa piamopa endakali dupa pitakame sepala mona andeami-pyaa.
Jaitasa wanengepa Jisasanya yonge peenya watandeamo enda dokopa
(Mt 9:18-26; Lu 8:40-56)
21 Jisasa baa sipi dokonya pituu endaki pete dokonya yangitena dee pilyia-pyaa. Endaki pete lemba dokonya endakali kambu andake mendeme ipao baa kateasa limbiami-pyaa.
22 Dokopa Jutamanya losuu anda isingi akali dupanya mende Jaitasa lenge doko epea-pyaa. Ipao Jisasa kandatala baanya moko kateamo dosa tombauli sepala, kyoto joo dapa lao Jisasa-kisa tee lea-pyaa: “Nambanya wanenge doko kumalanya pilyamona, baa mee jetala saka pena embame ipao baa kingimi watandatalena,” lea-pyaa.
23 Dopa leamopa Jisasa baa-pipa awapa peambi-pyaa.
24 Dopa piaminopa endakali longome baa watao pupala katao tambukiniami-pyaa.
25 Enda mende ee kana kingi ita mende-kisa dee lapoma dupanya andaka nao paliti-paliti singi mende katea-pyaa.
26 Enda dokome dokosaa longo dupa-kisa tanda longo nao muni akipi dupa pitaka nepeamoaka doko, kuki yaka nanjoo etete koyamopa petea-pyaa.
27 Enda dokome Jisasanya lao pii doko sepala endakali kambu dokonya Jisasanya maita-kaita ipupala baanya yonge pee dokonya kingimi watandea-pyaa.
28 Enda dokome, “Nambame baanya yonge peenya iki watandato kandao doko, nambanya yaina doko mee jakalapomona,” lao masetala dopa pia-pyaa.
29 Kinina dokopa lee mendai enda dokonya andaka nao paliti-paliti singi doko yatu lea-pyaa. Dopa piamopa enda dokome baanya yaina doko etalumu lao masia-pyaa.
30 Dokopa awapa Jisasame baanya pupu lapae mendapua puumu lao sepala endakali kambu kateamino dupa kandapilyetala, “Apimi nambanya yonge peenya kingimi watandelyape?” lea-pyaa.
31 Baanya disaipele dupame yanu pyao, “Emba katao tambukinelyamino endakali kambu doko emba tangeme kandao pituu embame, ‘Apimi namba kingimi watandelyape?’ leepe?” leami-pyaa.
32 Dopa leaminopa apimi pyaape lao kanjanya Jisasame kandayoko lea-pyaa.
33 Dopa piamopa enda dokome baa-kisa piamo dutupa pitaka masetala paka kayao walu lao ipao Jisasanya moko kateamo dosa tombauli sepala baame piamo dupa pitaka panao baa lamaiya-pyaa.
34 Dokopa baame enda doko lamaiyoo, “Wanaku, embame masoo minapino dokome emba mee injisetelyamo. Embanya yaina doko mee jilyamona emba mona yaepatala puu,” lea-pyaa.
35 Dopa lao kateamopa Jutamanya losuu anda isingi akali dokonya andaka katao akali mendapuame ipupala, “Embanya wanaku doko kumatalamona, aipa lao Mana Lenge Akali doko minao dee kenda pisetepe?” leami-pyaa.
36 Dopa leamino doko Jisasame soo nasili petala losuu anda isingi akali doko lamaiyoo, “Embame paka nakaenya masoo minao katape,” lea-pyaa.
37 Dopa latala baame endakali pitaka baa watao naepena latala Pitapi, Jemesapi, Jemesa kaiminingi Jonepi dutupa-pipa iki peami-pyaa.
38 Pao losuu anda isingi akali dokonya andaka kolandeami-pyaa. Jisasame kandeamopa endakali dupame pii longo lao ee lao yako lao kateamino kandea-pyaa.
39 Dopa petala baame andaka kolandatala dokaita lamaiyoo, “Aipuma nyakama pii longo lao ee lao kalyamipi? Wanaku doko kumala nayalamo. Baa luu palelyamona,” lea-pyaa.
40 Dopa leamopa endakali dupame baa kilya kandao gii kayami-pyaa. Dopaka doko, baame dokaita pitaka watao kamanda pyalyetala wanaku dokonya endangi takangepapi dee baa-pipa tole payamino dutupapi dutupa-pipa iki wanaku kumapae doko siamo palo dokonya peami-pyaa.
41 Pupala wanaku dokonya kinginya minatala baa lamaiyoo, “Talita kumu,” lea-pyaa. Pii doko kapilyoo, “Wanaku, emba nambame sakata lelyona,” lea-pyaa.
42 Dopa leamo dokopa wanaku doko sakatatala paya-pyaa. Dopa piamopa dupame doko kandatala etete walu lao mona andeami-pyaa. Wanaku doko ee kana kingi ita mende-kisa dee lapoma patae-pyaa.
43 Dokopa Jisasame dokaita lamaiyoo, “Endakali mendeme doko setana lamaiya nayalapape,” lao etete kyoto joo lamaiya-pyaa. Dopa latala, “Nyakamame nee mendapua nena maiyepa,” lea-pyaa.