19
Enda watao pingi dokonya lao Jisasame mana lamaiyamo doko
(Mk 10:1-12; Lu 16:18)
1 Jisasame pii dutupa lamaiyoo etapala, Galili yuu doko yakinatala Jutia yuu dokonya endaki Jotane yangitena pea.
2 Dokopa endakali kambu longome baa watao peaminopa baame endakali dokaitanya yaina dupa yuu dokonya mee jakamaiya.
3 Dopa piamopa Patasi mendapuame ipupala baa minao makande pyoo lao pituu, “Enda watao pingi tenge dupanya mendenya-kaita akali mendeme baanya enda doko pena lao watao pyatamopa naimanya mana setapae dupanya kapa patape napatape?” leami.
4 Dopa leaminopa baame yanu pyao, “Nyakamame pii dake itaki napiamipi? ‘Tee piamo dokopa Pyoo Injiamo dokome endapa akalipa lao wasia-pyaa.’
5 Dopa petala baame lao pituu, ‘Tenge dokonya akalimi baanya endangi takangepa yakinatala, baanya etanengepa kopatala dolapo yonge mendai joo pititambina,’ lea-pyaa.
6 Dopana dolapo lapoma joo napetenya, yonge mendai joo pititambi. Goteme nyoo pyasetae doko endakalimi wakale pyoloo napipengena,” Jisasame lea.
7 Dopa leamopa Patasi dupame baa lamaiyoo, “ ‘Akali mendeme baanya enda doko watao pyao pituu, watao pingi pepa mende maitala watao pyapengena,’ lao Moseseme mana setekea-pyoomo doko aipuma setea laape?” leami.
8 Dokopa Jisasame dokaitanya pii yanu pyao, “Nyakama tuu-tuu piaminosa enda watenge kaita doko Moseseme nyakamanya setekeamoaka doko, wamba tee piamo dokopa mana doko nasia-pyaa.
9 Dopana nambame nyakama dapa langilyo: akali mendenya etanenge dokome kepo kolala nayatamopa, baame mee watao pyapala enda waka mende lanyetamo kandao doko, akali dokome kepo kolatana,” lea.
10 Dopa leamopa baanya disaipele dupame baa lamaiyoo, “Enda akalipa tole pyao petenge mana doko dopale tamo kandao doko, akalimi enda lanyala nayao katataminopa auu pitana,” leami.
11 Dopa leaminopa baame dokaita lamaiyoo, “Endakali pitakame kapa pao dopa napitami. Goteme endakali mendapua mana doko maiyamo dupame iki pitami.
12 Akali mendapua enda nanyepenge jepae mandeami dupame enda nanyoo mee katengema. Mendapua lakapo nyepae dupame kapa pao enda lanyala naengema. Dee mendapuame Kaitinya Katenge dokome isingi doko lao masetala enda lanyala naengemaka. Mana doko kapa pao watao minatamo dokome mininana,” Jisasame lea.
Wane wanakupi dupa-kisa Jisasame kingi seteamo doko
(Mk 10:13-16; Lu 18:15-17)
13 Gii dokopa endakali mendapuame wane wanakupi koo dupa-kisa Jisasame kingi setapala sekena lao laminao epeami. Dopaka doko, disaipele dupame dokaita pyalanya leami.
14 Dokopa Jisasame dokaita lamaiyoo, “Wane wanakupi koo dupa epekena kaita lyokala nayakalapa! Kaitinya Katenge dokome wane wanakupi dapale joo kalyamino endakali dupa isoo kalyamona,” lea.
15 Dopa latala baame dokaita-kisa kingi setapala yuu doko yakinatala pea.
Akali kamongo mende
(Mk 10:17-31; Lu 18:18-30)
16 Yuu mendepa akali mende Jisasa kateasa ipupala lao pituu, “Mana Lenge Akali, tenda namba lete etete katatopa lao mana epe aki mende minawape?” lea.
17 Dopa leamopa Jisasame baa lamaiyoo, “Aipuma embame aki mana mende epepe lao namba kandao pisilipi? Mendai iki baa epe. Emba lete etete kalyanya masii kandeno doko, mana setapae dupa watao minape!” lea.
18 Dopa lateamopa akali dokome baa pisoo, “Mana setapae dupa andutupape?” lea. Dokopa Jisasame baa lamaiyoo, “ ‘Embame endakali pyao kumasala nayape. Embame kepo kolala nayape. Embame pake nala nayape. Embame endakali mende minakasalanya sambo laa nayape.
19 Embanya endangi takangepa dolapo andanda semaiyoo katape. Dee embame emba tange auu kaengeli pyoo endakali yango dupa auu kayao katapena,’ ” Jisasame lea.
20 Dokopa akali dokome pii yanu pyao, “Mana setapae dutupa pitaka nambame watao minio doko mee minawaka kalyona, dee aki mende nambame pipenge jilyape?” lea.
21 Dopa leamopa Jisasame baa lamaiyoo, “Emba tolalakao tolatae katatoo lao maseteno kandao doko, emba pupala embanya oapi dupame muni nyepala endakali tipya dupa maipi. Dopa pitinopa embanya epe etete dupa kaitinya sakatana, embame namba watao ipupi,” lea.
22 Dopa leamopa akali dokome sepala baanya oapi etete longo singi dokonyana, mona etete kenda kayao yakinatala pea.
23 Dokopa Jisasame disaipele dupa lamaiyoo, “Nambame nyakama kiningi langilyona, kamongo mendeme baa Kaitinya Katenge dokome isina lao kalyanya lekeleke tata.
24 Dee mendeaka nyakama langilyona, mena kamele mendeme kepo tii mendenya kolandalanya lekeleke tapyaliaka doko, kamongo mendeme baa Goteme isina lao kalyanya etete lekeleke tapyalina,” lea.
25 Dokopa disaipele dupame pii dutupa soo etete walu latala lao pituu, “Dopa tamo kandao doko, api kapa pao pyoo nyepae katatape?” leami.
26 Dopa leaminopa Jisasame dokaita kandatae soo yanu pyao, “Endakalimi kapa pao dopa napipengeaka doko, Goteme dupa pitaka kapa pao pingina,” lea.
27 Dokopa Pitame baa lamaiyoo, “Kandeleno, naimame dupa pitaka yakinatala emba watao paelyamano dokonya tenda naimame aki mende nyetamape?” lea.
28 Dopa leamopa Jisasame dokaita lamaiyoo, “Nambame nyakama kiningi langilyona, tenda dupa pitaka enenge jetamo gii dokopa Endakalinya Ikiningi doko etete kamongao kiŋi petenge toko dokonya pitita. Gii dokopa nyakama namba watao paelyamino dupame Isataele tata kingi ita mende-kisa dee lapoma dupanya pii tolasakamaiyanya kiŋi petenge toko kingi ita mende-kisa dee lapoma dupanya pititamiaka.
29 Dee namba lao masetala anda tamopi, kaiminingi tamopi, pimalenge tamopi, takange tamopi, endangi tamopi, wane tamopi, ee tamopi dupa yakineamino endakali dupa pitakame dupanya yanu etete longo waa palyoo nyepala dee lete etete katatamiaka.
30 Dopaka doko, enomba nyoo katenge endakali longo dupa maita-kaita katatami. Maita-kaita katenge longo dupa enomba nyoo katatamina,” Jisasame dopa lea.