21
Kiŋi dupa pengemali pyoo Jisasa Jetusaleme pao pyakameamo doko
(Mk 11:1-11; Lu 19:28-40; Jo 12:12-19)
1-2 Dokaita Jetusaleme tengesale pao pituu, Olipimanda yuu dokonya taono Betepasi dokonya peami. Pao pituu dokopa Jisasame disaipele lapoma wambao pena lao lamaiyoo, “Yuu taono yakane nyalambonya enomba-kaita omo silyamo ongonya pupala, mena dongi mende anjetae yakane apata katatambinopa, nyalambome pupae kanjambinona, liangao minao ipupape.
3 Endakali mendeme nyalambo kandao pii mende lea kandeno doko, nyalambome baa lamaiyoo, ‘Kamongo dokome kalai mende dongi dalapome pipenge jilyamona,’ laapape. Dopa latambinopa yapa pealapomona,” lea.
4 Dopa piamo dokome akali potopesa mendeme pii mende dapa leamo doko angi jia:
5 “Nyakamame Sayone tange dupa dapa lamaiyepape:
Indupa nyakamanya kiŋi doko nyakama katamisa epelyamo kanjepa.
Endakali andanda semaiyoo katenge doko dongi maita dokonya pituu epelyamo.
Baa dongi mendenya yakane dokonya maitanya pituu epelyamona,” lea-pyaa.
6 Disaipele dolapome pupala Jisasame leamoli piambi-pyaa.
7 Dopa petala dolapome dongi matakai dokonya yakane doko kateta minao epeambi. Ipupala nyalambonya yonge pee ketae pingi dolapo dongi maita dolaponya ketae seteambinopa, Jisasa dongi yakane dokonya pyakalyetala pituu pea.
8 Peamopa endakali kambu andake mendeme nyakamanya yonge pee ketae pingi dupa kaitini dokonya kuiyoo seteami. Yangi dupame ita yoko dupa yandao kaitini dokonya kuiyoo setami.
9 Dee endakali dupa wambata maita pyata pyoo pao pituu puu lao dapa lao wee leami:
“Dapiti Yumbange, embame pyoo nyoo katape!
Akali epelyamo dake auu pisetaena Kamongo Goteme epena lapumopa epelyamo!
Etete Ketae Kaitinya Katenge, embame pyoo nyoo katapena,” leami.
10 Jisasa Jetusaleme pyakameamopa Jetusaleme tange dupa pitakame walu latala lao pituu, “Akali dake apipi?” leami.
11 Dopa leaminopa endakali awapa peamino dupame, “Baa Jisasa lenge Galili yuu taono Nasatete tange potopesa dokona,” leami.
Jisasa losuu anda andake dokonya peamo doko
(Mk 11:15-19; Lu 19:45-48; Jo 2:13-22)
12 Jisasa baa losuu anda andake katenge kame dokonya pupala topo setao peteamino endakali dupapi sambao kateamino endakali dupapi dupa watao pyapala, muni aloo pingi akali dupanya tepolo tokopi yaka maileome topo nyingi akali dupanya petenge tokopi dupa lokalyinya nepea.
13 Dopa petala baame dokaita lamaiyoo, “Gotenya pii pepa pyapae singi dokonya, ‘Nambanya anda doko kandao endakalimi loma singi andana latamina,’ lapae silyamo. Dopaka doko, nyakamame anda dake pake nao makongao paenge endakali dupa yalo pingi kananda injisilyaminona,” lea.
14 Endakali lenge mondapi moko koopi dupa Jisasa kateasa losuu anda andake kame dokonya epeaminopa baame dupa mee injisia.
15 Dopa piamopa pitisa mupapi mana setapae masingi akalipi dupame Jisasanya kalai pupu lapae piamo dupa kandata, dee wane kole dupame losuu anda andake kame dokonya katao, “Dapiti Yumbange, embame pyoo nyoo katape!” lao wee leamino doko sepa petala imbumi kumiami.
16 Dopa petala dokaitame baa lamaiyoo, “Wane dupame pii lelyamino doko embame silipi?” leami. Dokopa Jisasame dokaita lamaiyoo, “Kini, nambame silyona, pii mende dapa lapae silyamo: ‘Embame wane koopi ŋaŋapi dupanya nengekaita lumbakamainopa dupame emba lalyokondape piamina,’ lapae silyamo doko nyakamame itaki pyala nayamipi?” lea.
17 Dopa latala baame dokaita yakinatala Jetusaleme dokonya kamalyatena pao yuu taono Betani dokonya palea.
Jisasame piki ita mende sapuina leamo doko
(Mk 11:12-14,20-24)
18 Jisasa yongama wamba dee Jetusaleme pilyoo pituu baa lopo kaya.
19 Lopo kayapala baame piki ita mende kaitini lembasa kateamo kandatala dokonya pea. Peamoaka doko, dii mende kutao nakandao yoko iki pyoo kateamo kandea. Dokopa baame piki ita doko kandao, “Embame tanga tangapi dii mende dee namanditi, etete daana!” lea. Dopa lalu piamopa piki ita doko sapuiya.
20 Dopa piamo doko disaipele dupame kandao mona andapala lao pituu, “Piki ita dake aipa petala pupae lao sapuilyape?” leami.
21 Dokopa Jisasame dokaitanya pii yanu pyakamaiyoo, “Nambame nyakama kiningi langilyona, nyakamame masoo minao katao mona lapo palya nayatamino kandao doko, nambame piki ita dake pilyoli pyoo nyakamame kapa pao pitami. Nyakamame doko iki pyaa nayao dee yuu manda dake kandao, sakatalala solowata pete andake dokonya mangena latamino kandao doko, lataminoli pita.
22 Nyakamame masoo minao loma soo tee latamino dupa pitaka nyetamina,” Jisasame lea.
Kalai datupa apimi emba diape lao pisiamino doko
(Mk 11:27-33; Lu 20:1-8)
23 Jisasa losuu anda andake dokonya pilyetala endakali dupa mana lamaiyoo kateamopa, pitisa mupapi Jutamanya isingi akalipi dupame baa kateasa ipupala lao pituu, “Embame apinya pii minao kalai datupa pilipi? Apimi kalai datupa emba-kisa seteape?” leami.
24 Dokopa Jisasame dokaitanya pii yanu pyakamaiyoo, “Nambame nyakama pii mende pisilyoakana, nyakamame yanu pyakatamino kandao doko, nambame kalai datupa dokonya pii minao pilyona lao nyakama langitoaka.
25 Joneme kaimbu pyakamaiyamo doko apimi pina leape? Goteme pina leape, pande endakalimi pina leamipi?” lea. Dokopa dokaitame pii doko sepala nyakamalapo lao pituu, “Naimame, ‘Goteme pina leana,’ latamano kandao doko, ‘Aipuma nyakamame Jonenya pii doko masoo minala nayamipi?’ lata.
26 Dee, ‘Endakalimi pina leamina,’ latamano kandao doko, endakali pitakame Jone doko akali potopesana lao masingima dokonya paka pyaumuna,” lao nyakamalapo leami.
27 Dopa latala dokaitame Jisasanya pii yanu pyakamaiyoo, “Naimame masala naelyamanona,” leami. Dokopa Jisasame dokaita lamaiyoo, “Doko tamo doko, nambame kalai pilyo datupa pii leamo doko nyakama langya nayatoakana,” lea.
Wane lapoma makande pyoo kongali pii leamo doko
28 Dee Jisasame lao pituu, “Akali mendenya wane lapoma kateambi-pyaana salapape! Dolaponya takange dokome ipao wane mupa doko lamaiyoo, ‘Emba indupa getepe ee dokonya kalai pyaa puu,’ lea-pyaa.
29 Dopa leamopa wane dokome yanu pyao, ‘Namba daana,’ lea-pyaa. Dopa leamoaka doko, maitakao mona aloo petala pea-pyaa.
30 Takange dokome wane mende doko kateasa pao dopaka lamaiya-pyaa. Dopa lamaiyamopa, ‘Apane, yaka lumu,’ leamoaka doko, angi napea-pyaa.
31 Dopa latala wane dolaponya andukumi takangenya masiamoli pia lusilyamape?” lao Jisasame dokaita pisia. Dopa lao pisiamopa endakali dupame lao pituu, “Wane mupa dokome lumuna,” leami. Dopa leaminopa Jisasame dokaita lamaiyoo, “Dee nambame nyakama kiningi langilyona, takisa nyingi akalipi kepo kolao paenge endapi dupame nyakama nyoo maita pyatala Goteme isina lao kalyanya ipao wambelyamino.
32 Doko aipumape? Jone Kaimbu Pingi doko nyakama kateamisa ipupala mana tolatae doko laitaka peteamoaka doko, nyakamame baa masala nayami. Dopaka doko, takisa nyingi akalipi kepo kolao paenge endapi dupame masiami. Dopa piamino doko nyakamame kandatala mona aloo petala baa masala nayamina,” Jisasame lea.
Getepe ee mende isoo kateamina lao kongali pii doko
(Mk 12:1-12; Lu 20:9-19)
33 Jisasame, “Dee kongali pii mende lelyona, salapape,” latala lao pituu, “Akali yuu andake singi mende katea-pyaa. Akali dokome getepe ee mende kakopatala pokea-pyaa. Pokatala baame getepe ee dokonya getepe dii lyao indyalanya yuli mende lakea-pyaa. Dee isoo pititamo anda ketae mende piaka-pyaa. Dopa petala akali mendapuame ee doko isakao katena latala, baa yuu londati mendakaita pao katea-pyaa.
34 Dopa petala yuu mende getepe wambu pingi gii doko ipateamopa baame baanya kendemane mendapuame ee isakamaingi akali dupa kateamisa pupala, getepe dii mendapua lyao peekena lao nyakala pena lea-pyaa.
35 Peaminopa ee isakamaingi akali dupame baanya kendemane dupa minatala, mende pyao indyepala mende kumi pyao kumasoo, mende kaname pyao takyoo piami-pyaa.
36 Dopa peteaminopa akali ee tange dokome dee kendemane mendatupa pena lea-pyaa. Wamba pena leamoli pyoo pena laa nayao dee longole pena lea-pyaa. Dopa piamopa ee isakamaingi dupame wamba piaminoliaka piami-pyaa.
37 Dee etao doko baame baanya ikiningi doko dokaita kateamisa pena lao pituu, ‘Dupame nambanya ikiningi doko andanda semaitamina,’ lao masetala pena lea-pyaa.
38 Dopa leamoaka doko, ee isakamaingi dutupame wane doko epeamo kandatala nyakamalapo lao pituu, ‘Wane dakeme takangenya moya nyepengena, yapa pyao kumasema! Pyao kumasetala baanya ee moya nyepenge dake naima nyetamana,’ leami-pyaa.
39 Dopa latala dokaitame baa minatala ee dokonya kamalyatena soo pyandatala pyao kumasiami-pyaa.
40 “Dopana akali ee tange dokome ipupala ee isakamaingi dupa aipa pitape?” lea.
41 Dopa leamopa dupame baa lamaiyoo, “Akali koo dokaita tanda maiyoo pyao kumaseta. Dopa petala baame getepe ee doko akali waka mendapuame isakao katena latamopa, wambu pingi gii dokonya dupame getepe dii lyao maiyakamaitamina,” leami.
42 Dokopa Jisasame dokaita lamaiyoo, “Nyakamame Gotenya pii pepa pyapae singi dake itaki pyatala nayamipi?
‘Anda pingi akali dupame anda pingina daa latala nepeamino doko pingina mupa jetea.
Kamongome dopa pipumu doko,
naimame kandamanopa auu etete pilyamona,’ lapae silyamo.
43 Dopana, nambame nyakama dapa langilyo: Goteme nyakama dee isala nayao baame isingi dokonya dii manditamino endakali dupa iseta.
44 [Endakali mendeme kana doko-ketae lombao sepala baa indyuu tale pita. Dee kana dokome endakali mende pyao takyembatamo kandao doko, endakali doko etete kunguma jetana,” lea.]
45 Dopa lao Jisasame pii kongali leamo dupa pitisa mupapi Patasipi dupame sepala, “Naima kandao lalumu,” lao masiami.
46 Dopa lao masetala baa anjemana lao kaita kutiaminoaka doko, endakali kambu kateamino dupame Jisasa baa potopesana lao masiaminosa paka kayami.