26
Jisasa pyao kumasemana lao kambuiyamino doko
(Mk 14:1-2; Lu 22:1-2; Jo 11:45-53)
1-2 Jisasame pii manapi dokaita pitaka lamaiyoo etapala, baanya disaipele dupa lamaiyoo, “Koto lapoma sepatamopa Napinya Kayamo Gii ipata doko nyakamame masilyamino. Dokopa endakali mendapuame Endakalinya Ikiningi doko ita pokonya pyao yukuina lao akali mendeme dokaitanya kingilyaka maitana,” lea.
3 Gii undinaka pitisa mupapi Jutamanya isingi akalipi dupa, pitisa mupa Kayapasa lenge dokonya andaka kambu piami-pyaa.
4 Dopa petala dokaitame waa katao Jisasa anjetala pyao kumasemana lao kambuiyami-pyaa.
5 Dopa piaminoaka doko, dee dupame lao pituu, “Aopyoo latala endakali dupame pyao pilya pyana pitamina, gii epe dokonya dopa napimanalena,” leami-pyaa.
Enda mendeme Jisasanya aiyomba kai pyakamaiyamo doko
(Mk 14:3-9; Jo 12:1-18)
6 Jisasa baa yuu taono Betani dokonya akali kopetali Saimone lenge dokonya andaka petea.
7 Dokopa enda mendeme wele penge yakane mendenya wele tunduma pipaeme tumbatae muni longome sambenge mende minao Jisasa peteasa epea. Dopa petala baame wele doko aiyombanya kai lao kai pyakamaiya.
8 Dopa piamo doko disaipele dupame kandatala imbu kayao, “Aipuma wele dake mee maa yangelya kanjemape!
9 Wele dake endakalimi sambapiminopa yole andake nyepala endakali tipya dupa maipenge jipyalina,” leami.
10 Dopa leamino doko Jisasame sepala dokaita lamaiyoo, “Aipuma nyakamame enda dake kenda pisilyamipi? Baame namba-kisa kalai epe wakane mende pyakalamo.
11 Endakali tipya dupa koteaka lao nyakama-pipa katengemaka doko, namba nyakama-pipa koteaka lao nakatatama.
12 Enda dakeme wele dake nambanya yongenya kai lao kai pyakalamo dokome namba malu pina lao depa lalamo.
13 Nambame nyakama kiningi langilyona, Wai Pii Epe doko yuu dupa pitakanya lamaitaminoli pyoo, endakali dupame enda dake masina lao baame pyomo doko lao tayatamiakana,” Jisasame lea.
Jutasame Jisasa enge nyiamo doko
(Mk 14:10-11; Lu 22:3-6)
14-15 Gii dokopa disaipele kingi ita mende-kisa dee lapoma dupanya mende Jutasa Isaketiote lenge doko pitisa mupa dupa kateamisa pupala baame dokaita pisoo, “Nambame Jisasa nyakama laitaka pitoo nyakamame namba aki mende ditamipi?” lea-pyaa. Dokopa dokaitame baa muni silipa kingi ita tepoma maiyami-pyaa.
16 Gii dokopa tee pyao baame Jisasa dokaita laitaka pyaanya kaitini mende kutao katea-pyaa.
Napinya Kayamo Nee neamino doko
(Mk 14:12-21; Lu 22:7-14,21-23; Jo 13:21-30)
17 Betesanya iisa napalyoo nenge gii mupa dokonya disaipele dupame Jisasa kateasa ipupala baa lamaiyoo, “Napinya Kayamo Nee doko emba natale andusa naimame depa lakamili lao masilipi?” leami.
18 Dopa leaminopa baame dokaita lamaiyoo, “Nyakamame yuu taono Jetusaleme dokonya pupala akali mende kanjaminona doko dapa lamaiyepape: ‘Mana Lenge Akali dokome, “Nambanya gii doko tengesa petelyamona,” laamo. “Napinya Kayamo Nee doko nambame nambanya disaipele dupa-pipa embanya andaka natoo,” laamona,’ lao lamaiyepape,” lea.
19 Dokopa disaipele dupame Jisasame leamoli petala Napinya Kayamo Nee doko depa leami.
20 Yuu kualanya piamopa Jisasa baa disaipele kingi ita-kisa dee lapoma dutupa-pipa nee nao peteami.
21 Nao pituu baame dokaita lamaiyoo, “Nyakamanya mendeme namba enge nyipimina yandapipi dupa laitaka pyaaminona lao nyakama kiningi langilyona,” lea.
22 Dopa leamopa dokaitame mona etete kenda kayapala mendai mendai lawame baa pisoo, “Kamongo, embame leeno doko, namba kandao leepe?” laa laa peami.
23 Dopa leaminopa Jisasame yanu pyao, “Nambapa disanya nee poyao nyilyambano akali dokome namba yandapipi dupa laitaka pyaapomo.
24 Kini, Endakalinya Ikiningi dokonya lao Gotenya pii pepa pyapae singi dokonya lapae silyamoli pyoo, baa kumalapomo. Dopaka doko, Endakalinya Ikiningi doko enge nyilyamo akali doko koyata iki lamo! Akali doko endangimi manja nayali kandao baa yaka jipyalina,” lea.
25 Dopa leamopa baa enge nyiamo akali Jutasa dokome yanu pyao, “Mana Lenge Akali, embame leeno doko, nambame lao leepe?” lea. Dopa leamopa Jisasame baa lamaiyoo, “Emba tangeme latelenona,” lea.
Jisasame baanya nee doko disaipele dupa maiyamo doko
(Mk 14:22-26; Lu 22:15-20; 1 Ko 11:23-25)
26 Dupa-pipa nee nao pituu Jisasame betesa mende nyepala Gote lao yaka pilino latala konjia. Konjepala baanya disaipele dupa maiyoo pituu, “Dake nambanya yonge dokona, nyoo nalapa,” lea.
27 Dee baame kapo penge mende nyepala yaka pilino latala dokaita maiyoo pituu, “Nyakama pitakame nyoo nalapa.
28 Dake nambanya taiyoko dokona, koo dupa kunanya nepakalanya kai lekelyo dokome endakali dupa pitakanya Goteme pii lao seteamo doko angi injisilyamo.
29 Dee nambame nyakama langilyona, indupa pituu nambame getepe ipange dake nala nayawaka katao tenda nambanya Takangeme isingi dokonya, nyakama-pipa awapa getepe ipange enenge doko natamano gii dokonya tuu latona,” Jisasame lea.
30 Dopa lateamopa dokaitame wee mende latao pituu kamanda pyakalyetala Olipimanda dokonya peami.
Jisasame Pita kandao embame namba nakandengena laapeno leamo doko
(Mk 14:27-31; Lu 22:31-34; Jo 13:36-38)
31 Dokopa Jisasame dokaita lamaiyoo, “Indupa kuka gii dakepa nyakama pitakame namba yakinatala lombapae salamino. Doko, Gotenya pii pepa pyapae singi dokonya, ‘Sipisipi setao katenge doko nambame pyatopa, sipisipi ambo doko polao wakale puu puu pyoo patamina,’ lapae silyamo.
32 Dopaka doko, Goteme namba dee sakatasetatamopa nyakama nyoo maita pyatala Galili yuu dokonya wambatona,” lea.
33 Dokopa Pitame Jisasa lamaiyoo, “Yangi dupa pitakame emba yakinatala lombapae setamino kandao, nambame dopa napyaapo etete daana,” lea.
34 Dopa leamopa Jisasame baa lamaiyoo, “Nambame emba kiningi langilyona, indupa kuka gii dakenya yaka pauli pii ene laanya pitamopa, paa tepomasa embame namba nakandengena laapenona,” lea.
35 Dee Pitame yanu pyao, “Namba embapa awapa kumatambano doko kapakana, nambame emba nakandengena etete laa nayalapona,” lea. Dopa leamopa disaipele dupa pitakame dopaka leami.
Jisasame Gesemani pao loma siamo doko
(Mk 14:32-42; Lu 22:39-46)
36 Dokopa Jisasa baanya disaipele dupa-pipa yuu Gesemani lenge dokonya peami. Pupala baame dupa lamaiyoo, “Namba omosa loma sala pelyona nyakama asa pilyepa,” lea.
37-38 Dopa latala baame Pitapi Sepete ikiningi dolapopi laminao pea. Pupala baa mona etete kenda kayapala dokaita lamaiyoo, “Nambanya mona doko etete kenda petala kumapenge julumuna, nyakama asa kandao katamana kalyepape!” lea-pyaa.
39 Dopa latala baa kuki umbisale pao yuunya tombauli sepala loma soo pituu, “Nambanya Takange, embame namba-kisa kenda pipae silyamo dake nyoo nepakapenge jia kandeno doko, nyoo nepakape! Dopaka doko, nambame masilyoli napinya, embame masetenoli pipi,” lea-pyaa.
40 Dopa lao loma setala ipao disaipele tepoma dutupa kandeamopa luu palyasiamisa baame Pita lamaiyoo, “Anematupa, aipa petala gii kuki iki dutupanya nyakamame namba-pipa kapa pao kandao isoo nakatalamipi?
41 Makande pingi dupanya nyakama pao koyatamane lao kandao isoo loma soo kalyepape. Moname pyuani kaelyamoaka doko, yongeme papa tambuingina,” lea-pyaa.
42 Dopa latala Jisasame dee paa lapo pyoo pao loma soo pituu, “Nambanya Takange, nambame kenda pipae dake kayala nayao nyepengeaka jia kandeno doko, embame masetenoli pipi,” lea-pyaa.
43 Dopa latala dee ipao disaipele dutupa kandeamopa lemongati kayapala luu paliuu kateami-pyaa.
44 Jisasame dutupa yakinatala dee paa tepo pyoo loma sala pupala pii wamba leamo dutupaka lao loma sia-pyaa.
45-46 Loma setala baame ipao disaipele dutupa lamaiyoo, “Nyakama mee luaka paliuu koto nyilyamipi? Kandeleno! Gii doko ipatelyamo. Akali mendeme Endakalinya Ikiningi doko koo pingi endakali dupa laitaka pyaapomona, mona nyakama sakatalapa. Namba enge nyipumu akali doko ipatelyamona, kanjepa!” lea-pyaa.
Jutasame Jisasa dokaita laitaka piamo doko
(Mk 14:43-50; Lu 22:47-53; Jo 18:3-12)
47 Jisasame dopa lao kateamopaka baanya disaipele kingi ita-kisa dee lapoma dutupanya mende Jutasa lenge doko epea. Baa-pipa awapa endakali kambu andake mendeme konjuapi kolyepepi dupa minao, pitisa mupapi Jutamanya isingi akalipi dupame pena leaminopa epeami.
48 Jisasa enge nyiamo akali dokome endakali kambu doko wambao lamaiyoo, “Nambame akali mende nunu pio kondeno doko, baana, nyakamame minalapape!” lea-pyaa.
49 Dopa lamaitala ipao baa Jisasa kateasa tolao pupala, “Mana Lenge Akali, emba asa katalepe?” latala baa nunu pia.
50 Dopa piamopa Jisasame baa lamaiyoo, “Kaimia, embame angi pyaanya ipate doko yapa pii!” lea. Dokopa dokaitame ipao baa minatala anjiami.
51 Dopa piaminopa Jisasa-pipa awapa kateamino dupanya mendeme baanya konjua doko kolanyetala, pitisa mupa dokonya kendemane mendenya kale doko taka lanya nepea.
52 Dopa piamopa Jisasame baa lamaiyoo, “Embanya konjua doko palenge andanda dokonya mandi! Konjua minao yanda pingi dupa pitaka, konjuameaka kumingi.
53 Nambame nambanya Takangeme namba nisina lao wii lapupa baame gii dokopaka enjele tata kingi ita-kisa dee lapoma ita minao etete longo epena lapyalina lao embame masala naelepe?
54 Dopaka doko, nambame dopa pipuli kandao, Gotenya pii pepa pyapae singi dokonya dopaka pitana lapae silyamo doko aipa petala angi jipyalipi?” Jisasame lea.
55 Dopa latala dokopa baame endakali kambu doko lamaiyoo, “Nyakamame akali pake nao makongao paenge mende anjala epele lao konjuapi kolyepepi dupa minao namba anjala epelyamipi? Nambame koteaka lao losuu anda andake dokonya endakali dupa mana lamaiyoo kateo dokopa nyakamame namba anjala nayami.
56 Dopaka doko, potopesa dupame pii pepa piami dupa angi jina lao dutupa pitaka pilyamona,” lea.
Dokopa disaipele dupa pitakame Jisasa yakinatala paka peami.
Jisasa kosimi leamino doko
(Mk 14:53-65; Lu 22:54-55,63-71; Jo 18:13-14,19-24)
57 Jisasa anjiamino akali dupame baa laminao pitisa mupa Kayapasa kateasa peaminopa, mana setapae masingi akalipi isingi akalipi dupa ipao dokonya kambu piami-pyaa.
58 Dokopa Pitame Jisasa watao tependale joo pea-pyaa. Pupala pitisa mupa dokonya anda kamapisa kolamatala aipa pilyamipi lao kandatoo latala lome kambu isoo katenge dupa-pipa petea-pyaa.
59 Pitisa mupapi kanjole dupa pitakapimi Jisasa pyao kumasemana latala akali mendapuame baa-kisa sambo pii setao kosimi lena lao kutiami-pyaa.
60-61 Dokopa akali longo ipupala Jisasa-kisa sambo pii setao kosimi leami-pyaa. Dopa piaminopaka doko, baa pyao kumasepenge tenge mende kandao nanyiami-pyaa. Dee ete pyoo akali lapoma ipupala lao pituu, “Akali dakeme dapa lea: ‘Gotenya losuu anda andake doko kapa pao lakyepala, yuu gii tepoma pito,’ leana,” leambi-pyaa.
62 Dokopa pitisa mupa dokome toya katapala Jisasa lamaiyoo, “Pii emba kandao lelyambino dake embame yanu napilino doko, aipa pyoo lelyambipi?” lea-pyaa.
63 Dopa leamoaka doko, Jisasa ema napia-pyaa. Dokopa pitisa mupa dokome dee baa lamaiyoo, “Nambame emba pii mende pisilyona embame Gote lete katenge doko lao masetala angi langipi. Emba Gote Ikiningi, Kataisa dokope?” lea-pyaa.
64 Dopa leamopa Jisasame baa lamaiyoo, “Embame lateleno. Dopaka doko, nambame nyakama dapa langilyo: indupa pituu tenda tuu lao Endakalinya Ikiningi doko Gote etete pupu lapae dokonya kingi tolae dokonya katao kaitinya kopa ketae dokonya ipatamo nyakamame kandatamina,” lea-pyaa.
65 Dopa leamosa pitisa mupa dokome baa tangenya yonge pee dupa minao lapyepala lao pituu, “Baame Gote kilya kandao lelyamo. Aipuma naimame endakali mendapuanya pii deaka nyetamape? Epapu baame Gote kilya kandao pii lelyamo doko nyakamame sepelyamino!
66 Sepala nyakamame aipa lao masilyamipi?” lea-pyaa. Dopa leamopa dupame baanya pii yanu pyakamaiyoo, “Pyao kumasepenge julumuna,” leami-pyaa.
67-68 Dopa latala dupame baanya lengelyaapinya sopakalimi pyapala kii momangame piami-pyaa. Dee mendapuame baa pyao pituu, “Kataisa, akali dokome pilyamo lao embame laa!” leami-pyaa.
Pitame namba Jisasa nakandengena leamo doko
(Mk 14:66-72; Lu 22:56-62; Jo 18:15-18,25-27)
69 Pita anda kamapisa peteamopa pitisa mupa dokonya kalai pyakamaiyoo petenge enda dupanya mendeme baa peteamo dosa ipupala lao pituu, “Emba apata akali Galili tange Jisasa dokopa awapa katengembana,” lea-pyaa.
70 Dopaka doko, Pitame endakali dupa pitakanya enombasa tanga lao lao pituu, “Embame leeno doko namba nakandengena,” lea-pyaa.
71 Dopa latala baa pao lome kambu dosa peteamopa dee kalai pingi enda waka mendeme kandatala endakali dosa kateami dupa lamaiyoo, “Baa Nasatete tange Jisasa dokopa awapa katengembana,” lea-pyaa.
72 Dokopa Pitame deaka tanga lao, “Namba akali doko etete nakandenge mauwana,” lea-pyaa.
73 Dee kuki maitakawale akali dosa kateami dupame ipupala Pita kandao, “Embanya pii dokome panalumuna, kiningi etete emba akali dupanya mendeaka lamona,” leami-pyaa.
74 Dopa lateaminopa Pitame lao pituu, “Namba akali doko nakandenge mauwana, sambo lato kandao doko, Goteme namba pinana,” lea-pyaa. Dopa lalu piamopa yaka pauli pii mende lea-pyaa.
75 Wamba Jisasame Pita kandao, “Yaka pauli pii ene laanya pitamopa embame paa tepomasa namba nakandengena laapeno,” leamo doko Pitame masia-pyaa. Masetala kamaka pao ee lao yamataka lea-pyaa.