3
Kamongo doko ipata
1-2 Mona setenge paluma, indupa nambame nyakamanya pepa dake lapo pyoo pyao peekelyo. Nambame wamba pii dapale lao pio dupa dee masipimi laka lao masilyo. Dopana potopesa etete epe dupame wamba pii lao panasiamino dupapi, Kamongo-kisa Pyoo Nyingi Akali dokonya mana dupa nyakamanya aposele dupa-kisa panasiamo dupapi, dupa deaka masalapale lao nambame nyakamanya mona kaimala napingi doko sakatasekelyo.
3-4 Nyakamame dake wambao masepenge: yuu gii etao dokopa lamba lenge akali dupame nyakamanya nyipu laka lao masingi koo dupa watao minao sakatatala lamba lao lao pituu, “Baa dee pilyoo ipato leape? Ongo, baa naepelyamo doko anja kalyape? Wamba Goteme yuupi kaitipi wapuiyamopa mana makandepi oapi dupa pitaka siamoliaka pyoo soo ipao naimanya yumbange dupa isa palipiamino dokonya tuu latala, indupapi dopaka pyoo silyamona,” latami.
5 Dupame datupa masala nayamana lao masilyamino: wamba waka Goteme kaiti doko sina leamopa sia-pyaa. Goteme leamoli pyoo endaki dokome yuu doko wasepae pyakalyetala sia-pyaa.
6 Maitakao Goteme endaki andake lyoo epena leamopa endaki dokome yuu wamba siamo doko koya-pyaa.
7 Dopaka doko, yuupi kaitipi indupa silyamo dupa Goteme leamoli pyoo auu pyoo soo itatenya paanya silyamo. Baame yuupi kaitipi dupa koyatala naena lao minatae katao endakali yapatamopa baa watao minala naenge dupa koyatamino gii dokonya tuu lata.
8 Mona setenge paluma, nyakamame dake kame sala nayalapape: Kamongo dokome yuu gii mendai mende ee kana tausene mendena lao masingi. Dee ee kana tausene mende yuu gii mendaina lao masingiaka.
9 Kamongo dokome mende pitona latelyamo doko moo lao angi injisingina lao endakali mendapuame masingimaka doko, moo lao napingi. Baame nyakama kandao yapa maka nakayapala mende alu napipimi laka lao masetala endakali pitaka mona kapilyipimi laka lao masilyamo.
Yuupi kaitipi dupa etatana leamo doko
10 Dopaka doko, Kamongonya gii doko pake nenge endakali mende ipapomo lao masala naengesa epengeli pyoo ipata. Gii dokopa kaiti doko tikitoko lapala alu pita. Kaiti dokonya kalyamo dupa itateme tao alu pitamopa yuupi yuunya mana makandepi opale yalo petae dupa pitaka panata.
11 Dopale dupa pitaka dopa pyoo alu pitamoaka doko, nyakama aipa pyoo katapengepe? Nyakamame mana etete epe dokonya payao Gote watao minapenge.
12 Dopa pyoo pituu nyakamame Gotenya gii doko yapa epenako lao malisoo kalyepape. Gii dokopaka kaiti doko tao alu pitamopa itate popo etete paka pipae dokome kaiti dokonya kalyamo dupa tao mee jeta.
13 Dokopa Goteme yuupi kaitipi enenge setatona leamo doko malisoo kalyamano. Dolaponya mana tolatae doko seta.
14 Dopana, mona setenge paluma, nyakamame dutupa malisoo katao pituu, auu pyoo kalyanyapi, mendita mendenya tenge nasina lao kalyanyapi, Gotepa mona mendai paliuu kalyanyapi dupanya mona maiyepape.
15 Kamongo dokome naima yapa maka nakayao malisoo pyoo nyingi doko nyakamame masalapape. Naimanya kaiminingi auu kaenge Polo doko Goteme masepae epe maiyamopa, pii dutupa pepa pitakanya piamoli pyoo, nyakamanya pyekea.
16 Polonya pii pepa pyapae yangi dupanya tenge dupa lekeleke tao masepenge jilyamo. Endakali dupa-kisa masepae nasilyamopa masala nayapala Gotenya pii pepa pyapae singi dokonya pii yangi dupa angonya nepatala mendenya-kaita lengemali pyoo, Polonya pii dupa angonya nepelyamino endakali dupa tenda alu pitami.
17 Mona setenge paluma, nyakamame dopale dupa pitana lao wambao masetelyamino. Dopana, nyakama kyoto joo nakalyepale lao mana setapae masala naenge endakali dupame dupanya mana koo minilyamino dupanya nyakama laminao patamina kandao kalyepape.
18 Naimanya Kamongo-kisa Pyoo Nyingi Akali Jisasa Kataisa dokome nyakama kandao mona epe palelyamopa, nyakamame baa lao masingima. Dopana, nyakama mona epe palenge dokonya katao wambu pyoo baa masokondape pyoo masalapape. Indupapi tanga tangapi baa tii pyoaka katapenge. Kiniaka.