4
1 Dopana, nyakama nambanya mona setenge kaiminingi dupapi, nambanya kandapu laka lao masingi dupapi, nambanya mona yaepasekenge dupapi, nambanya yati nea pipaele dupapi, nyakama nambanya mona setenge dupa Kamongopa pakatae katao nambame langyo dopaka pyoo kyoto joo kalyepape!
Polome dopa pyoo kalyepapena leamo doko
2 Enda Yotia Sindikipa nyilyambo nambame pii mende langyakondape pyoo langilyona salapape: nyilyambo Kamongonya joo mona mendai palyoo pilyepape.
3 Dee nambanya nisingi akali epe, emba apata nambame pii mende langilyo: embame enda dolapo nisepe. Enda dolapome nambapi Kelemenepi dee endakali waka namba-pipa kalai mendai pingi dupa-pipapi Wai Pii Epe lamaingi kalai dokonya lekeleke tao kyoto joo nisiambi. Dupanya kenge dupa Gotenya endakali lete etete katenge dupanya kenge singi buku dokonya silyamo.
4 Koteaka lao nyakamame Kamongo doko lao mona yaepao kalyepape. Nambame nyakama deaka mona yaepao kalyepapena langilyo.
5 Endakali dupa pitakame nyakamanya tambo tambo lao katenge mana doko kandena lao kalyepape. Kamongo doko ipanya tengesa petelyamo.
6 Nyakamame opale mendaipi mendenya nea nakaenya, nyoani kayatamino dupa pitaka Gote-kisa loma soo tee lao yaka pilino laapape.
7 Dopa pitaminopa Goteme endakalinya masingi dupa pitaka ita minao nyakamanya mona lyuu lasekenge dokome nyakamanya monapi masingipi dupa Kataisa Jisasa-kisa auu pyoo sekena lao isakao katata.
8 Kaimia paluma, nambame pii dake etao lelyo: nyakamame mana epe tolatae tama pipenge dapale dupa masoo kalyepape: kiningi dupapi, auu pipae dupapi, tolatae dupapi epe etete dupapi, nea pipae dupapi, nyoani pipae dupapi, dopale dupa pitaka moname masoo kalyepape.
9 Nambame nyakama mana langiopa nyiamino dupapi, mana miniopa kandeamino dupapi, siamino dupapi, dupa koteaka lao nyakamame minao kalyepape. Dopa pitaminopa mona lyuu lasekenge Gote doko nyakama-pipa katatami.
Pilipae tangemame oapi Polo maiyaminopa yaka pilyamino leamo doko
10 Indupa gii mendatupa patapumopa nyakamame namba dee nisilyamino dokonya nambame Kamongo doko lao etete mona epe palyilyo! Kini, wamba nyakamame namba nisemana lao masiaminoaka doko, namba nisoo peakapenge kaitini mende nasia.
11 Nambame dopa lelyo doko namba opale mende daa jipyanya nalelyo. Namba-kisa oapi setamopi nasetamopi dokonya namba yaka katatona lao mana nyio.
12 Oapi kuki setao katenge mana dokopa longo lao setao katenge mana dokopa dolapo nambame masilyo. Mana mende pyoo katengepi, mende pyoo katengepi, mana tata tata dupanya nee longo napengepi, lopo kayapengepi, oapi longo setao katapengepi, daa joo katapengepi mana dopale dupa pitakanya nambame kandateo.
13 Namba pupu lasilyamo dokome namba nisilyamopa nambame opale mende pyanya kokala naenge.
14 Dopaka doko namba-kisa kenda pipae epeamo dokonya nyakamame namba nisoo mana epe miniami.
15 Nambame Wai Pii Epe doko tee pyao lamaiyoo ipao nyakamanya yuu Masetonia doko yakinatala peo dokopa sosa waka mendeme namba-pipa awapa kalai pyoo auu kayapae nyepa kenda pipae nyepa napiaminopa, nyakama Pilipae tange dupame iki dopa piamino doko nyakamame masilyamino.
16 Namba daa joo Tesalonaika kateo dokopa kini nyakamame namba nisoo oapi dupa paa lapomasa peekeami.
17 Nyakamame oapi dupa namba dyepale lao tee laa naelyo. Nambame nyakamanya itai wai dokonya dii dupa longo lao manditamo kandapu laka lao masilyo.
18 Nyakamame yanu pyalakao pyekeamino dokonya namba-kisa oapi yaka longo silyamo! Nyakamame nambanya oapi dupa akali Ipapotaitasa-kisa peekeamino dupa nyepala longo sakapumopa kalyo. Nyakamame peekeamino dupa Isataelemame tunduma epe pingi mende Gote lao kundi maiyoo pyao yangeaminopa Goteme auu kayao nyiamo dopale joo peekeami.
19 Dopana, nambanya Gote dokonya epe etete longo paka Kataisa Jisasa-kisa silyamoli pyoo baame nyakama daa jetamo dupa pitaka dyoo kapa piseta.
20 Tanga tangapi naimanya Gote-kisa Takange dokoaka lao tama pipenge lamo! Kiniaka.
Etao lasa leamo pii dupa
21 Gotenya endakali Kataisa Jisasa-pipa pakatae kalyamino dupa pitaka mendai mendai lao nambame auu pyoo kalyepape lelyona lamaiyakalapape. Namba-pipa masoo miningi kaiminingi awapa katamano dupame nyakama kandao auu pyoo kalyepape lelyamino.
22 Gotenya endakali ae katenge dupa pitakame nyakama kandao auu pyoo kalyepape lelyaminoaka. Dee Loma tange Kapomane Isingi Mupa dokonya andaka kalai pyakamaiyoo katenge dupame nyakama auu pyoo kalyepape lao nea kayao lelyamino.
23 Kamongo Jisasa Kataisanya mona epe palenge doko nyakamanya mona dokonya sina!