11
Goteme baa tata dupa nepala nayana leamo doko
Dokonya* nambame lelyona, Goteme baa tata dupa nepeape? Daa, eteteaka nepala naya! Nambamba Isataele, Apotakamenya yumbange Benjamene tata dokonya mende. 2-3 Goteme* baanya wambao yapao nyiamo dupa nepala naya. Nyakamame Ilainjanya pii dake Gotenya pii pepa pyapae dokonya sipumu kandelyamino. Goteme Isataele endakali dupa pina lao Ilainjame Gote lao tee lao pituu, “Kamongo Gote, dupame embanya potopesa dupa pyapapu, embanya olata toko dupa kaluoo nepeami. Dopa piami doko namba iki katapupa dupame pyalanya pilyaminona,” lea-pyaa. Dokonya* Goteme dapa lao yanu pia-pyaa: “Nambame akali taosene kalange dupa namba tangenya katekena latala isoo kateo dupame sambo gote Bealo doko lalyoo luma lakala nayamina,” lea-pyaa. Dokotekee* joo indupa gii dakepa mana mendai dopaleaka sipumopa, tata yakane goteme mee mona epe palyoo yapao nyiamo doko mee kalyamo. Dee* baame dupa kandao mee mona epe palyoo yapao nyiamo doko, dupame kalai mendapua piaminosa daa. Endakali dupame kalai mendapua pilyaminopa baame dupa yapao nyatali kandao doko, baame mee mona epe palenge doko mee mona epe palenge nanjetali.
Dokonya* aipape? Isataele endakali dupame nyalanya kutao kateamino doko nyala nayami. Dopaka doko, Goteme yapao nyiamo tata yakane dupame nyiami. Dee yangi dupa pitaka mona kana jiami. Dokonya* dapa lao pii pepa pyapae silyamo: “Goteme dupanya masingi luu palisoo, lenge iminjisoo, kale poyasoo pia. Dupa dopa pia doko indupa apata dopa petayaka kalyaminona,” lapae silyamo. Dee** Dapitimi lao pituu,
“Kamongo embanya opale epe dupa-kisa silyamo dupame dupa lyinalena kone makata, pinalena pandu seta pyoo yanu nyepe.
10 Dupame nakandenalena dupanya lenge dupa minao iminjisepe.
Dupame koteaka lao maita lakao nepao katena lapena,” lea-pyaana lapae silyamo.
11 Dopana,* nambame lelyona, Isataele endakali dupa pyalya minatala lombapae siamino doko lombapae salakao siamipi? Etete daa! Dupame Gote watao minala nayamino dokonya baame endakali tata waka dupa pyoo nyia. Isataele dupame tata waka dupa tilya maina lao dopa pia. 12 Isataele* endakali dupame Gote watao minala nayamino dokonya baame endakali tata dupa pitaka-kisa mana epe longo minia. Dee Isataele dupame baa yakineamino dokonya baame endakali tata waka dupa-kisa mana epe longo minia. Dopana, dupame Goteme masingili pitamino dokonya baame endakali dupa pitaka-kisa mana epe longo paka pyoo minala nayatape?
13 Dopaka* doko, nambame nyakama endakali tata waka dupa kandao dapa lelyo: namba nyakama endakali tata waka dupanya aposele dokonyana nambame nambanya kalai doko eteke pilyo. 14 Kalai* dokome namba tata mendai dupame tilya maina latala nambame dupanya mendapua pyoo nyipu laka lao masilyo. 15 Goteme* dupa watao piamo dokonya baame endakali waka dupa pitaka baanya mona setenge injisia. Dopana, baame dupa lanyetamo dokonya mana doko aipale jetape? Doko endakali kumapala dee lete katenge dopale.
Olipi itangepa wangyapanya makande pyoo leamo doko
16 Betesa* wasalanya momanga pipae setamo dokonya mendatupa wambao nyetamo dutupa Gotenya tamo kandao doko, momanga pipae setamo doko pitaka baanyaka. Dee ita itange doko Gotenya tamo kandao doko, wangya dupa baanyaka. 17 Goteme* baanya olipi ita pokatae dokonya wangya mendapua tondao nyepala kombe dupanya olipi ita mee langa latae mendenya wangya dupa nyoo katasia. Nyakama endakali tata waka dupa olipi ita mee langa latae dokonya wangya dopale. Indupa nyakama apata olipi ita pokatae dokonya ipange epe doko nyoo kalyamino. 18 Dopana,* nyakamame ita wangya tondao nyepae dupa luiyamaiya nayalapape. Aipa lao nyakamame luiyamaitamipi? Ita wangyame itange manaja naenge. Itange dokome wangya mandenge.
19 Nyakamanya mendeme lao pituu, “Goteme namba kombe dupanya katasotoo latala wangya mendapua tondao nyiana,” latami. 20 Doko* kini. Kiniaka doko, dupame masoo minala nayaminosa Goteme dupa tondao nyia. Dee embame masoo minapinosa katenge kombe dokonya kalyeno. Dokonya emba luiyala naenya paka kayao katape. 21 Doko,* Goteme ita dokonya wangya etete dupa mee katena lao kayala naenya tondao nyiana, baame emba mee kalyale lao kayatana lao masilipi? 22 Dopana,* embame Gotenya mana epe miningi dokopa yanu nyokondape pyoo nyingi mana dokopa dolapo masepe. Endakali lombapae silyami dupa baame yanu nyokondape pyoo nyingina, emba kandao mana epe minilyamo. Dopaka doko, embame baame mana epe minilyamopa katenge doko yakinateno kandao doko, emba apata yandanya nepata. 23 Dee dupame nyakamanya masoo minala naenge mana doko yakinatamino kandao doko, Goteme dupa olipi ita pokatae dokonya dee kataseta. Doko, Goteme dupa kapa pao dee kataseta. 24 Baame emba endakali tata waka doko olipi ita mee langa latae dokonya yandao nyepala ita wakanya katasia. Dopana, baame Isataele dupa dupa tangenya olipi itange dokonya dee katasalanya kokatape?
Goteme endakali dupa pitaka kondo kaengena leamo doko
25 Kaimia* paluma, nyakamame nyakama masepaena lao masala nayalapale latala, Goteme pitona lao yalo pyoo masiamo dake masipimi laka lao nambame masilyo: Isataele mendapua mona kana jetala kana joaka katao endakali tata waka Gote tengesa ipupenge dupa pitaka ipatatamino gii dokonya tuu latami. 26 Dopa* pyoo katataminopa Goteme baanya Isataele endakali dupa pitaka pyoo nyeta. Dokonya dapa lao pii pepa pyapae silyamo:
“Pyoo Nyingi Akali doko yuu taono Sayone dokonya pyakalyeta.
Pyakalyetala baame Jekope tata paliuu patamo dupanya Gote maita maiyoo koo pingi mana doko nyoo nepakamaita.
27 Dee* nambame pii dake lao setato: nambame dupanya koo dupa kunanya nepakamaitona,” lapae silyamo.
28 Dupame* Wai Pii Epe doko nasemana lao daa lelyamino dokonya Goteme dupa imbu kaelyamo. Dopa pilyamo dokome nyakama endakali tata waka dupa nisilyamo. Dopaka doko, baame dupa yapao nyiamo dokonya dupa mona setelyamo. Baame yumbange toto dutupa lao masetala dopa pilyamo. 29 Doko,* Goteme endakali mende epena latala epe dupa mee mailyamo doko maitala dee baa mona aloo napingi.
30 Wamba nyakama endakali tata waka dupame Gotenya pii doko watao minala nayaminoaka doko, Isataele dupame watao minala nayamino dokonya indupa Goteme nyakama kondo kayatelyamo. 31 Mendai* dopaka pyoo dupame Gotenya pii doko indupa tanga lelyaminoaka doko, Goteme nyakama kondo kayatelyamo dokonya baame dupa apata kondo kaelyamoaka. 32 Doko,* Goteme endakali dupa pitaka kondo kayatoo latala dupa pitaka pyasoo tanga lenge mana dokonya anjia-pyaa.
Polome Gote tama piamo doko
33 Mama!* Gotenya mana makandepi masingipi dupa etete longo paka! Kapa pao etala nayapenge lamo! Baame pitona lao masingi dupa kapa pao masoo koe napipenge! Dee baame mana miningi dupa kapa pao moko naminapenge lamo! 34 Pii* pepa pyapae singi dokonya,
“Apimi Kamongonya masingi doko kandeape?
Apimi baa mana ita piape?
35 Baame* yanu pyakatana lao apimi wambao saandi mende baa maiyapena?” lapae silyamo.
36 Doko,* dupa pitaka baa mambele yaka latala, baa mambeleaka soo pao, baa-kisaka etenge. Tanga tangapi baaka lao tama pipenge lamo! Kiniaka.
* 11:1 1 Sam 12:22; Wee 94:14; Jet 31:37; 33:24-26; Lo 10:19; 2 Ko 11:22; Pl 3:5 * 11:2-3 1 Kiŋ 19:10,14 * 11:4 1 Kiŋ 19:18 * 11:5 2 Kiŋ 19:4; Ais 4:3; 11:11; Lo 9:27 * 11:6 Lo 9:12-17; Ga 3:18 * 11:7 Lo 9:18,30-31; 11:25 * 11:8 Dit 29:4; Ais 29:10; Mt 13:13-14 * 11:9 Wee 35:8 * 11:9 Wee 69:22-23 * 11:11 Ap 13:46; Lo 10:19; 11:14,25 * 11:12 Mt 8:11; Lo 11:30 * 11:13 Ap 9:15 * 11:14 Lo 10:19; 11:11; 1 Ko 9:22 * 11:15 Lu 15:24,32 * 11:16 Nam 15:17-21; Ese 44:30 * 11:17 Lo 15:27; Ep 2:11-22 * 11:18 Jo 4:22; Lo 3:27; 5:2; 1 Ko 1:31 * 11:20 Lo 12:16 * 11:21 Jet 49:12; Lu 23:31 * 11:22 Jo 15:2,4; Ip 3:14 * 11:25 Mt 23:39; Lu 21:24; Jo 10:16; Lo 9:18; 11:7; 12:16; 16:25; 1 Ko 2:7-10; Ep 3:3-5,9 * 11:26 Wee 14:7; Ais 59:20-21 * 11:27 Ais 27:9; Jet 31:33-34 * 11:28 Lo 9:6 * 11:29 Nam 23:19; 1 Sam 15:29; Ais 54:10 * 11:31 Ese 18:23; Lo 11:11 * 11:32 Lo 3:9; 5:20; Ga 3:22-29 * 11:33 Jop 11:6; Wee 139:6,17-18; Ais 55:8-9; Kl 2:3 * 11:34 Ais 40:13-14; 1 Ko 2:11,16 * 11:35 Jop 35:7; 41:11 * 11:36 1 Ko 8:6; 11:12; Kl 1:16-17; Ip 2:10