13
Kapomanenya pundipundi kalyepapena leamo doko
1 Endakali dupa pitaka kapomanenya pundipundi joo katapenge. Doko aipuma? Kapomane doko Gote tangeme katena lenge. Dee kapomane kalyamino dupa Goteme katena lapumopa kalyamino.
2 Dopana, kapomanenya kaita lyokelyamo endakali dokome Goteme mana seteamo doko lyokenge. Kaita lyokelyamo endakali dokonya yanu doko baa tange-kisa seta.
3 Mana epe miningi endakali dupame kapomanenya akali isingi dupa paka kayapenge daa. Mana koo miningi endakali dupame paka kayapenge. Nyakamame kapomanenya isingi akali dupa paka nakayamana lao masilyamipi? Dopa lao masetamino doko mana epe dupa minalapape. Dopa pitaminopa dupame nyakama lalyetami.
4 Doko kapomanenya isingi akali dupame nyakama auu pyoo kalyepale lao Gotenya kalai pyakamaingi akali joo kalai pyoo katengema. Dopaka doko, nyakamame mana koo minatamino kandao doko, paka kayalapape. Akali dupame konjua jepae dupa mee manja naengema. Daa, dupame Gotenya kalai pyakamaingi akali joo katao mana koo miningi endakali dupa yanu nyingima.
5 Dopana, nyakama kapomanenya pundipundi katapenge jilyamo. Kapomanenya isingi dupame yanu nyingima dokonya iki pundipundi nakatenya, nyakamanya masingi dokome dopa pyepa dapa pyepa lao langingi dokonya apata pundipundi katapenge jilyamoaka.
6 Tenge dokonyaka minao nyakamame takisa pilyamino. Doko, kapomanenya isingi akali dupame Gotenya kalai akali joo katao kalai dopale dupaka kyoto joo pyoo katengema.
7 Dopana, nyakamame akali dupa pitaka maipenge dupa maiyepape. Nyakamame takisa tata tata dupa takisa nyingi akali dupa-kisa pyalapape. Akali andanda semaipenge dupa andanda semaiyepape. Dee akali tama pipenge dupa tama pyepape.
Mende auu kaya kaya pyoo kalyepapena leamo doko
8 Nyakamame endakali mendaipi mendenya yanu sina lao kayakamaiya nayalapape. Nyakama mende auu kaya kaya pyoo katapenge yanu mendai doko iki nyakama-kisa sepenge. Endakali yango mende auu kaelyamo dokome mana setapae dupa watao minatelyamo.
9 Mana setapaenya pii seteamo dupanya, “Embame kepo kolala nayape; endakali mende pyao kumasala nayape; paka nala nayape; nyipu laka lao masala nayape,” lapae silyamopi, dee mana setapae dupanya pii waka silyamopi, dupa pitakame pii mendai dakenyaka iki tenge paliuu lapae silyamo: “Embame emba tange auu kaengeli pyoo endakali yango doko auu kayao katape.”
10 Endakali mendeme baanya endakali yango mende auu kaelyamo dokome baa-kisa mana koo naminingi. Dopana, auu kaenge endakali dokome mana setapae dupa pitaka watao miningi.
11 Indupa yuu gii doko dopa pilyamo dopa pilyamo lao nyakamame masilyamino dokonya mana dokoaka watao minao kalyepape. Kini, indupa nyakama luu paliuu sakatapenge gii doko ipatelyamo. Doko, Goteme naima etete pyoo nyetamo gii doko wamba naima tee pyao masoo minao kateamano gii dokopa siamoli pyoo sala naenya, indupa etete tengesa petelyamo.
12 Yuu kuotae doko yongatala tii pyaanya petelyamo, dokonya naimame iminjetaenya mana dupa soo nepatala tii pipaenya yanda yandatepi dupa nyoo minao katamana.
13 Naima auu pyoo payao kotaka tii pilyamopa paenge endakali joo katamana. Bia akipi nao kyakao ae lalya lana pingi dupapi, kepo kolao paenge dupapi, luiyawaka paenge dupapi, laiya lenge dupapi, tilya nyingi dupapi, mana dopale dupa minala nayamana.
14 Dopa napinya, Kamongo Jisasa Kataisa doko nyoo nyakama-kisa katalapape. Dopa petala nyakama endakalinya mona koo dokome pyuani kaenge dupa pimana lao kaitini kutala nayalapape.