15
Tangeme auu kayatamanoli napimana leamo doko
1 Dopana, kyoto joo masoo minala naenge endakali dupame opale mende kapa daana lao mona kenda kayatamino dupa naima kyoto joo masoo miningi endakali dupame maka nakaenya nyoo soo katapenge. Naima tangeme auu kayatamano dokoaka watao pyoo nakatamana.
2 Dopa napinya naimanya kaiminingi mende auu pyoo kyoto joo katena lao naima pitaka mendai mendai lawame baame auu kayatamoli pyoo pimana.
3 Doko Kataisa tangeme auu kayamoli pyoo pyaa naya. Daa, pii pepa pyapae singi dokonya, “Endakali dupame emba kandao pii koo leamino dupa namba-kisa epeana,” lapae silyamoli pyoo katea.
4 Wamba Gotenya pii pepa piamino dupa pitaka naimame mana nyalapale lao piami-pyaa. Kini, pii pepa pyapae singi dupame naima kyoto joo katasowapi mona yaepasowapi pingi dokonya-kaita Goteme ditona leamo doko nyetamana lao masoo malisoo kalyepale lao piami-pyaa.
5 Kyoto joo kataseta mona yaepaseta pingi Gote dokome Kataisa Jisasame masingili pyoo nyakamalapo mona mendai palisekena.
6 Baame dopa pitamopa nyakama pitakame awapa pii mendai lao naimanya Kamongo Jisasa Kataisanya Gote-kisa Takange doko lao tama pitami.
Mende lanya lanya pyoo kalyepapena leamo doko
7 Dopana, Kataisame nyakama lanyiamoli pyoo nyakamame Gote lalyoo nyakama tangelapo mende lanya lanya pyoo kalyepape.
8-9 Doko nambame nyakama langilyona, Goteme lelyamoli pyoo kiningi pingi doko kandena lao, Goteme yumbange toto dutupa epe maitona leamo pii dupa angi jina lao, dee endakali tata waka dupa Goteme kondo kaenge dokonya dupame baa lalyoo katena lao, Kataisa baa Juta endakali dupanya kalai akali jia. Dokonya dapa lao pii pepa pyapae silyamo:
“Tenge dokonya minao nambame endakali tata waka dupanya kaina dokonya katao emba lao lalyeto.
Nambame emba lao lalyoo wee latona,” lapae silyamo.
10 Dee pii mende:
“Nyakama endakali tata waka dupame
Gotenya endakali dupa-pipa awapa mona yaepalapapena,” lapae silyamo.
11 Dee pii mende:
“Nyakama endakali tata waka dupa pitakame Kamongo doko lao lalyoo kalyepape.
Nyakama endakali paliuu pelyamino dupa pitakame baa lao lalyokondape pyepapena,” lapae silyamo.
12 Dee Aisayame pii pepa piamo dokonya,
“Jesinya mandipaenya mandipae paliuu patamo dupanya mende pyakalyeta.
Baame endakali tata waka dupa isoo katena lao Goteme pyakalyina lata.
Dee dupame baa lao masoo malisoo katatamina,” lapae silyamo.
13 Masoo malisoo kalyepale lao katasingi Gote dokome nyakamame baa lao masoo minao katatamino dokonya-kaita mona etete yaepengepa mona lyuu lengepa dolapome nyakama tumbasina. Dopa pitamopa nyakamame Oli Sipitisanya pupu lapae dokome etete masoo malisokondape pyoo katatami.
Polome baanya kalai dokonya leamo doko
14 Nambanya kaimia paluma, nyakama mana epepi masingi tata tata dupa pitakapi dupame tumbatae kalyaminona, nyakamalapo mende mana lamai lamai pyoo katatamina lao nambame masalakao masilyo.
15-16 Dopaka doko, pepa dakenya nambame nyakamanya masingi deaka sakatasakao pii mendapua kuki kyoto joale pyekelyo. Dopa lao pyekelyo doko Goteme namba Kataisa Jisasanya kalai akali joo katao endakali tata waka dupanya kalai pyale lao kalai epe doko namba diamo dokonya dopa lao pyekelyo. Endakali tata waka dupa Oli Sipitisame etete epe injisetae katataminopa, Goteme baa kundi maitae joo auu kayao nyina lao nambame akali pitisa joo Gotenya Wai Pii Epe doko lamaingi.
17 Kini, nambame Kataisa Jisasa-kisa katao Gotenya kalai pyakamaingi dokonya namba mona yanga lao katapengena lao masilyo.
18-19 Dopa pilyo dokonya nambame waka mendenya nalenya, endakali tata waka dupame Gote watao minina lao Kataisame nambanya kingilyaka ongonya-kaita pia dupanya iki latoo. Nambame pii leopi kalai piopi dupanya Kataisame namba nisia. Baame namba pupu lasiamopa nambame kongalipi kalai paka pipaepi dupa pio. Dee baame Oli Sipitisa pupu lapae doko namba diaka. Dopa piamopa nambame Jetusaleme pituu awali lao pao Ilitikame yuu dokonya tuu lao Kataisanya lao Wai Pii Epe doko lamaiyoo eteo.
20 Koteaka lao nambame Wai Pii Epe doko Kataisa kalyamo lapae sepala naenge yuu dupanya lamaitoo lao masingi. Doko, akali waka mendeme anda muku minanya setata mendenya anda pyaa nayatoo lao dopa pingi.
21 Kini, pii pepa pyapae singi dokonya,
“Baanya lao akali mendeme pii lamaiya nayatamo endakali dupame baa kandatami.
Dee baanya pii doko nasetamino endakali dupame masetamina,” lapae silyamo.
Polome Loma kandama Sepene patona leamo doko
22 Paa longosa kalai dokome namba minanjiamosa namba nyakama kalyamino dokonya naepeo.
23-24 Dopaka doko, indupa yuu akaita nambame kalai pipenge dee nasilyamo dokonyapi, namba nyakama kanja ipupu laka lao ee kana longo masoo kateo dokonyapi, indupa namba Sepene yuu dokonya paanya pilyona, pao pituu dokopa nyakama kandama patopa ipatona lao masilyo. Ipupala namba nyakama-pipa mona yaepao gii mendatupa katapatamano dokopa nyakamame namba kaitini pato dupanya nisetamina lao masilyo.
25 Dopaka doko, epapu nambame Gotenya endakali Jetusaleme kalyamino dupanya muni mendapua mandyakamaiyoo patoo.
26 Doko, Masetoniapa Akayapa yuu dolaponya sosa kalyamino dupame Gotenya endakali Jetusaleme kalymino dupanya tipya dupa nisemana lao masokondape petala muni mendapua pyasiami.
27 Dupa tangeme dopa pimana lao masetala piami. Dopaka doko, kini dupa-kisa Juta dupanya yanu silyamo. Doko, endakali tata waka dupame Juta dupa-kisa Gotenya epe singi dupanya mendapua nyiami dokonya, dupame opale apalepi nyakama-kisa setamo dupame Juta dupa nisepengeaka.
28 Dopana, nambame kalai doko pyoo etao muni dupa auu pyoo dupa maitala dokopa Jetusaleme yakinatala Sepene panya nyakama kandama pato.
29 Dee namba nyakama kalyamino dokonya ipato dokopa Kataisanya epe longo paka sepeta ipatona lao masilyo.
30 Kaimia paluma, nyakama naimanya Kamongo Jisasa Kataisapa pakatae kalyamino dokonyapi, dee Oli Sipitisapa nyakama sakatasipumopa mende auu kaya kaya pyoo kalyamino dokonyapi, nambame nyakama langyakondape pyoo langilyona, Goteme namba nisina lao etete kyoto joo baa lao loma semana salapape.
31 Masoo minala naenge Jutia yuu dokonya kalyamino endakali dupame namba napinalena Goteme namba pyoo nyina lawapi dee nambame baanya endakali Jetusaleme kalyamino dupanya muni mandyakamaiyoo pato dupa auu pyoo nyina lawapi loma salapape.
32 Nyakamame dopa pitaminopa Goteme yakana lao masetamo kandao doko, namba mona yaepao nyakama kalyamino dokonya ipupala kuki imambu nyoo nyakama-pipa awapa katatama.
33 Mona lyuu lao katasingi Gote doko nyakama pitaka-pipa katena. Kiniaka.