2
Goteme yanu nyingi dokonya leamo doko
1 Dopana, akali embame endakali yango mende-kisa koo silyamona lao baa yapao kalyepe? Embame tamopi dee endakali waka mendeme tamopi dopa pipenge tenge mendaipi mende nasilyamo. Embame endakali waka mende-kisa koo silyamona lao yapateno doko, embame emba tange-kisa koo silyamona lao yapatenosa pita. Doko aipuma? Dopa pitino akali embame mana koo dopale miningiaka daape!
2 Mana dopale miningi endakali dupa Goteme yanu nyingi doko kapana lao masilyamano.
3 Dopaka doko, endakali waka dupame mana koo dopale minilyaminona dupa-kisa koo silyamona lao akali embame yapao kalyeno doko, embame mana koo dutupa miningiaka! Dopa pingi dokonya Goteme emba kapa pao yanu nanyetana lao masilipi?
4 Pande, mana epe minao yapa maka nakayao yapa yanu nanyoo malisoo katenge Gote doko embame kilya kandao kalyepe? Emba mona kapilyetala koo dupa yakinatale lao Goteme mana epe minao katenge doko embame masala naelepe?
5 Embame mona kapilyoo koo kalai dupa yakinala nayao tuu pyoo kalyeno. Embame dopa pyoo Gote minao etete imbuaka pisoo katao emba pyatamo gii doko kandao nyalanya pilino. Gii dokopa baame endakali koo pingi dupa tolao yanu nyingi doko laitaka pita.
6 Endakali dupa pitakame mana minataminoli pyoo baame yanu pyata.
7 Mana epe dupa yakinala naenya minawaka katao, tii pipae katapengepi, kenge epe soo katapengepi, kumala nayao katapengepi, dupa kutao nyoo katenge endakali dupa Goteme yanu pyao lete etete kataseta.
8 Dee mana epe dupa watao minala naenya, nyakama tange iki lao masetala mana koo dupa watao miningi endakali dupa Goteme imbumi kumapala yanu pyao etete minao koyaseta.
9 Endakali mana koo minao katenge dupa pitaka-kisa Goteme kenda pipaepi tanda nengepi dupa pena lata. Juta dupa-kisa wambao pena latala tata waka dupa-kisa pena lataka.
10 Dopaka doko tii pipae katapengepi, kenge epe soo katapengepi, mona lyuu lao katapengepi, dupa baame endakali mana epe miningi dupa pitaka maita. Juta dupa wambao maitala tata waka dupa maitaka.
11 Doko, Goteme endakalinya lengelyaapi kandao yapala naenge.
12 Endakali yangi dupa-kisa mana setapae Goteme Mosese maiyamo dupa nasiamopa mana koo miniamino dupa pitaka koyatami. Mana setapae dupa dupa-kisa nasiamo dokome dupa nisala nayata. Dee endakali yangi dupa-kisa mana setapae dupa siamopa mana koo miniamino dupa pitaka mana setapae dupanya lapae silyamoli pyoo Goteme yapapala yanu nyeta.
13 Doko aipuma? Mana setapae dupa kaleme iki singi endakali dupa Goteme tolataena nalata. Mana setapae dupanya lapae silyamoli pingi endakali dupa baame tolataena lata.
14 Endakali tata waka dupa-kisa mana setapae dupa nasingi. Nasingiaka doko, gii mendepa dupa tangeme mana setapaenya lapae silyamoli pyoo pingima, dokonya dupanya masingi doko dupa tangenya mana setapae lamo.
15 Nyakamame dopa pyepape dopa napyepape lao dupanya mona dokonya mana setapae singi dupa dupame mana minilyami dokome panasingi. Dee dupanya masingi dokome panasingiaka. Dupame kopeta pilyamino dokopa nyakamanya masingi dokome dupa-kisa tenge setao, “Embame ongo kopeta pilinona,” lenge. Kamea pyoo pilyamino dokopa, “Embame ongo kamea pyoo pilinona,” lenge.
16 Kini, Goteme endakali dupanya yalo petae singi dupa Jisasa Kataisame yapena latamo gii dokopa, endakali dupame dopa pyoo kateamina lao panata. Nambame Wai Pii Epe lamaingi dokonya dopa lapae silyamo.
Juta angi doko apipi leamo doko
17 Dee emba aipape? Embame, “Namba Jutana,” lenge. Gotenya piipi manapi dupa emba-kisa silyamona lao masetala tungi pyao katenge. Embame Gote embanya Gotena lao masetala luingi.
18 Goteme pipimili lao masingi dupa embame kandatala baanya piipi manapi dupa mana nyoo katao angi dupa yapao nyoo katenge.
19-20 Gotenya piipi manapi emba-kisa silyamo dokonya mana kandenge dupapi kiningi pii dupapi dupa pitaka silyamona lao masingi. Dokonya endakali lenge koo dupa kaitini laitaka pipengepi, iminjetaenya katenge dupa tii pisepengepi, masala naenge dupa tolasepengepi, mana nakandenge dupa mana lamaipengepi dupa pitakanya emba etete kapana lao masingi.
21 Embame endakali waka dupa mana lamaiyoo katenge doko, aipuma embame emba tange mana laa naengepe? Embame endakali waka dupa kandao, “Pake nanalapapena!” lao lamaiyoo katenge doko, emba paka nengepe daape?
22 Embame, “Kepo kolala nayalapapena!” lao lamaiyoo katenge doko, emba kepo kolengepe daape? Embame sambo gote dupa etete koona lao masingi doko, sambo gote tama pingi anda dupanya opale mende pake nyingipi daape?
23 Embame Gotenya piipi manapi dupa emba-kisa silyamona lao masetala luingi. Dopaka doko embame dupa yalatala baa minao elya pisingipi daape?
24 Dopana, pii pepa pyapae singi dokonya, “Nyakama Juta dupa mambele endakali tata waka dupame Gote kandao pii koo lengemana,” lapae silyamo.
25 Embame Gotenya piipi manapi dupa watao minao katenge tamo kandao doko, kini akali emba elya pingi kambu kepee dokome emba kapa niseta. Dopaka doko, embame piipi manapi dupa yalao katenge tamo kandao doko, emba elya pingi kambu kepee doko kepala naee jeta.
26 Dopaka pyoo tata waka elya pingi kambu kepala naenge akali mendeme Gotenya piipi manapi dupanya lapae silyamoli pyoo pingi tamo kandao doko, Goteme baa elya pingi kambu kepala naenge mendeme pingina latape? Daa, dopa nalata.
27 Nyakama akali Juta dupa elya pingi kambu kepapae. Nyakama-kisa Gotenya piipi manapi dupa pepa pyapae singi. Dopaka doko nyakamame piipi manapi dupa yalao kalyamino. Akali tata waka elya pingi kambu kepala naenge dupame piipi manapi dupa watao minao kalyamino. Dokonya dupame nyakama dopa piami dapa piami lao yapatami.
28 Juta angi doko apipi? Yongenya kandao Jutana lenge dokope? Doko daa! Dee elya pingi kambu kepenge mana angi doko andukupi? Akali elya pingi kambu kepenge mana doko iki angipi? Doko daa!
29 Juta angi doko mona andaka Juta joo katenge. Piipi manapi pepanya pyapae silyamoli pyoo endakalimi elya pingi kambu kepenge mana doko angi daa. Elya pingi kambu kepenge mana angi doko Oli Sipitisame mona andaka kepenge. Akali dopale doko endakalimi tama napingima. Goteme tama pingi.