7
Enda akalipa tole pyao petenge dokopa makande pyoo leamo doko
1 Kaimia paluma, nambame pii mende nyakama mana makandepi masingi endakali dupa langilyona, mana makandepi dokome endakali dupa saka katengesa iki isala naengepe?
2 Dokonya nambame mendepa makande pyoo lelyona, enda akali patae doko baanya akalingi saka kalyamo dokopa mana makandepi singili pyoo enda doko akali dokonya etanenge joo petenge. Dopaka doko, baanya akalingi saka kalyamo dokopa mana makandepi singili pyoo enda doko akali dokonya etanenge joo petenge. Dopaka doko, akali doko kumapelyamo kandao, baa akali dokonya dee etanenge joo petena lao mana makandepi mende nasingi.
3 Dopana, baanya akalingi doko kalyamopaka baame akali waka mende nyilyamo kandao doko, baa akali nyele-nyele paenge endana lengema. Dopaka doko, baanya akalingi doko kumapelyamo kandao, baa mana makandepi mendeme kaita lyokala naelyamopa mee pituu akali waka pelyamo doko kapa penge.
4 Nambanya kaimia paluma, mana mendai dopaka pyoo naima apata Kataisa yonge katao kumiamo dokonya-kaita mana setapae dupanya kumapala, mokapae katao akali waka mende nyiama. Kini, naimame Gotenya dii mandyakamaimana lao akali malunya dee sakatasiamo doko nyiama.
5 Doko, wamba naimame endakalinya masingi koo dokoaka watao kateamanopa, koo pyuani kaenge dupa mana setapae dupame naima-kisa sakatasia. Dopa piamopa naimanya yongenya katenge dupame kalai piamano dokome dii etete koenge doko mandeama.
6 Dopaka doko, mana setapaeme naima anjiamo dokonya kumapeama tenge dokonya indupa naima dee isala naelyamo. Naimame mana setapaenya pepa pyapae siamoli pyoo wamba Gotenya kalai pyakamaiyamanoli pyoo dee pyakamaiya naenya, Oli Sipitisanya mana enenge doko minao pyakamailyamano.
Mana setapaepa koopanya leamo doko
7 Dopana, naimame aipa latamape? Mana setapae dupa koona latamape? Daa, etete dopa nalapenge! Mana setapae dupame koo kalai doko namba laitaka napiali kandao doko, nambame akipi lao nakandeoli. Doko, mana setapae dupame, “Nyipu laka lao masala nayapena,” langya nayali, nambame nyipu laka lao masingi doko koo lamo lao masala nayoli.
8 Dopaka doko, mana setapaenya pii seteamo dakenya-kaitaka koo dokome kaitini mende kutao nyepala, nambanya mona dokonya nyipu laka lao masingi tata tata dupa sakatasia. Mana setapae dupa koo dokopa apata nasingi pyali kandao koo doko lenge natapyali.
9-10 Wamba mana setapaenya tenge angi doko nambame nakandao kateo dokopa yaka kateo. Dopaka doko, maitakao mana setapae dupanya pii seteamo dupa kandeo dokopa, koo doko lenge teamopa namba kumio. Endakali lete katasina lao mana setapaenya pii seteamo doko nambame kandeopa, dupame namba pyao kumasepenge jia.
11 Doko aipuma? Mana setapaenya pii seteamo dupanya-kaita koo dokome kaitini mende kutao nyepala namba minakasetala dupanya-kaitaka namba pyao kumasia.
12 Dopana, mana setapae dupa etete epe. Dee mana setapaenya pii seteamo dupa epe tolatae etete epe.
13 Epe dokome namba pyao kumasiape? Doko etete daa! Nambame koo doko koona lao masetale lao koo dokome epe dokonya-kaita namba pyao kumasia. Kini, mana setapaenya pii seteamo dupanya-kaita koo dokome koo etete paka pyoo namba-kisa sakatasia.
Koonya kendemane joo katenge dokonya leamo doko
14 Naimame mana setapae dupa kandao Gotenya mendena lao masilyamano. Dopaka doko, nambame endakalinya mona koo dokome pyuani kaenge dupa watao koonya kendemane joaka kalyo.
15 Nambame nambanya mana minilyo doko namba tangeme minilyona lao masala naelyo. Dopa lelyo doko, nambame pitoo lao masipu doko pyaa naenya, auu nakayapu doko pilyo.
16 Dopaka doko, nambame napitoo lao masipu doko pilyo dokome, mana setapae dupa nambame epe lamo lao masilino lao panelyamo.
17 Dopana, namba itangeme doko pyaa naelyo. Daa, namba-kisa koo palenge dokome pilyamo.
18 Namba-kisa epe mendaipi mende napalelyamona lao masilyo. Dopa lelyo doko, namba endakalinya koo pingi mona dokonya lao lelyo. Doko, mana epe minapu laka lao masingi doko namba-kisa palelyamoaka doko, nambame kapa pao naminilyo.
19 Nambame mana epe minatoo lao masipu doko namininya, mana koo naminatoo lao masipu doko minilyo.
20 Nambame napitoo lao masipu doko pilyo dokome namba itangeme doko napipupa, namba-kisa koo palenge dokome pilyamona lao panelyamo.
21 Dokonya nambame mana mende dapa pyoo sipumu kandelyo: nambame mana epe minatoo lao masipu dokopa koo pipenge doko tengesaka silyamo.
22 Nambanya mona enenge dokome Gotenya mana setapae dupa auumi kumilyo.
23 Dopaka doko, mana waka mendeme nambanya yongenya katenge dupanya kalai pipumu kandelyo. Mana dokome nambanya moname pyuani kaenge mana doko yanda pimaitala, koonya mana nambanya yongenya katenge dupa-kisa silyamo dokonya-kaita namba anjilyamo.
24 Kanau! Namba akali etete koyapae kalyo! Namba yongeme kumasilyamo dakenya apimi saka nyetape?
25 Nambame naimanya Kamongo Jisasa Kataisa lao masetala Gote tama pilyo!
Dokonya nambame dapa pyoo kalyo: nambanya mona enenge dokome Gotenya mana setapae dupa watao minilyo. Nambanya mona wambatae dokome koo dokonya mana doko watao minilyo.