☰ PANASIAMO 1
TANGA PIPENGE DUPA
KATAISAME JONE-KISA
PANASIAMO
DOKO
Pii atupa wambao kandapenge
Tanga pipenge dupa Jisasame Jone-kisa panasiamopa baame pepa pia-pyaa. Joneme kandeamopa dupanya pii yalo pyoo latae netesa endakalimi kongali joo setaminopa Kitiseneme tenge angi sepenge dupanya lao lea-pyaa. Kitisene dupame Jisasa doko nyakamanya Kamongona lao masoo miniamino tenge dokonya kenda pipaepi tanda nengepi longo nyiami-pyaa. Gii dokopa Jisasame Jone-kisa panasiamo dupa Joneme pepa pia-pyaa. Masoo miningi tenge dokonya tanda longo nawapi elya pisowapi pingi lamo lao masetala masoo miningi doko maita maitamini lao Kitisene dupa kyoto joo katena lao pepa dake pia-pyaa.
Joneme mupa joo lao pituu, Kamongo Jisasa Kataisanya kaitini dokonya Goteme baanya yandapipi dupa pitaka ita minata. Kiningi, Satane apata ita minata. Baame ita minatala kaitipi yuupi dupa enenge setatamopa baanya endakali dupa dokonya auu pyoo etete katatami.
Tanga pipenge dupa Kataisame Jone-kisa panasiamo dokonya pii lyaa dupa:
1:1-8 Pii wambao pepanya piamo dupa
1:9–3:22 Sosa kalangenya pepa pyao pyasakamaiyamo dupa
4:1–8:1 Kende kalangeme buku yaki petae kateamo doko
8:2–11:19 Beto kalange dutupa
12:1–13:18 Kanapato andake dokopi mena kapua mendepale lapoma dolapopi
14:1–15:8 Panasiamo tata dupa
16:1-21 Gotenya imbu kaengeme pelesa kalange tumbiamo doko
17:1–20:10 Goteme Bapilone koyasetala mena kapua mendepalepi, sambo potopesapi, Satanepi dupa ita minatana leamo doko
20:11-15 Goteme endakali dupa yapata
21:1–22:5 Goteme kaiti enengepi yuu enengepi Jetusaleme enengepi setata
22:6-21 Jisasa dee ipatana lao leamo dupa
1
1 Jisasa* Kataisame panasiamo dupa buku dakenya pepa pyapae silyamo. Opale yapa pipenge dupa Jisasame baanya kendemane dupa laitaka pina lao Goteme Jisasa-kisa setea-pyaa. Dopa piamopa Jisasame namba Jone baanya kendemane doko kateosa enjele mende epena leamo dokome panasia. 2 Gotenya* pii lapae dupapi, Jisasa Kataisame pii panao leamo dupapi, opale kandeo dupapi dupa pitaka nambame buku dakenya lao panokondape pilyo. 3 Gotenya* pii lapae dokonya ene pitana lapae silyamo dupa itaki pyatamo dokopi, sepala watao minatamino endakali dupapi, dupa mona yaepena. Doko, Goteme pitana lelyamo dupa pipenge gii doko tengesa petelyamo.
Joneme sosa kalange dutupa kandao auu pyoo kalyepape leamo doko
4 Namba* Joneme yuu Esia-tena sosa kalange kalyamino dutupanya pepa dake pyao peekelyo. Gote wamba waka kateamo, indupa kalyamo, ipanya pilyamo dokopi, baanya isoo petenge toko enomba dokonya sipitisa kalange katengema dupapi dutupame nyakama kandao mona epe mende palyetala nyakamanya mona doko lyuu lasekena. 5 Dee* pii tolao lao panenge akali Jisasa Kataisa baa wambakao malunya sakateamo mupa doko yuunya kiŋi dupanya Kamongo kalyamo dokome apata nyakama kandao mona epe mende palyetala nyakamanya mona doko lyuu lasekenaka.
Baame naima auu kayapala baanya taiyoko dokome naimanya koo dupanya mokao nyia-pyaa. 6 Baame* naima isoo katenge injisipumopa naima baanya Gote-kisa Takange dokonya kalai pyakamaingi pitisa joo kalyamano. Tii pipaepa pupu lapaepa dolapo tanga tangapi baa-kisaka sepenge lamo. Kiniaka.
7 Kandeleno!* Baa kopa tambetambe ipata. Ipatamo doko endakali pitakame kandataminopa baa piamino dupame kandatamiaka. Yuunya endakali tata dupa pitakame baa kandatala ee lao etete yamataka latami. Pii dutupa etete kiningi.
8 Kamongo* Gote eteteaka pupu lapae wamba waka kateamo, indupa kalyamo, ipanya pilyamo dokome dapa lelyamo: “Tee pingipi etengepi doko nambakana,” lelyamo.
Joneme Jisasa kombeame kandeamo doko
9 Namba* Jone nyakamanya kaiminingi doko nyakamapi nambapi naima Jisasapa pakatae katao, Goteme isipumopa, kenda pipae nyoo maka nakayao kyoto joo lautao kalyamano. Nambame Gotenya pii doko lamaiyopi, Jisasanya lao lao paneopi, tenge dolaponya namba watao piaminopa yuu Patamosa lenge solowata pete kainanya singi dokonya kateo. 10 Sandee gii mendenya Oli Sipitisa dokome namba sakatasiamopa pii mende puu lao beto lee lao nambanya maitasakaita ipao lea. 11 Pii dokome lao pituu, “Embame kandeleno dupa pitaka buku mendenya pyapala, yuu Epesasapi, Semenapi, Pekemamapi, Tayataitapi, Satisapi, Pilatepiapi, Leotosiapi, sosa kalange dutupanya pyasakamaipi,” lea.
12 Dokopa* akali pii langiamo doko kanjanya namba kapilyetala kandeopa, lama kaiyepae setenge toko golome wasepae kalange sia. 13 Dokopa* Endakalinya Ikiningi doko endakali katele pyoo lama setenge toko kaina dokonya yonge pee londe mendeme baanya moko lengenya tuu lao petala, matapu golome wasepae mende baanya sangalinya petae katea. 14 Aiyomba** iti doko kyoo lao kopa kyoo lapaepi, pakenana timbokopaelepi jiamopa baanya lenge dolapo itate yuli jia. 15 Baanya* moko kape dolapo kana botonja itate andakenya yangatae polepole pili pia. Baanya pii leamo doko endaki oo andake lee pia. 16 Baame* baanya kingi tolae-kaitame bui kalange minatae kateamopa konjua yangi nenge kata kata petae etete nenge katapae doko baanya nengekaita pyakaetae katea. Baanya lengelyaapi doko tii pyoo kotaka niki tele pia.
17 Dopa* piamopa nambame baa kandatala baanya moko kateamo dosa etete kumapae joo lombapae sio. Dopaka doko, baame baanya kingi tolae-kaitame namba watandatala lao pituu, “Emba paka nakayape! Etete wambawapi etawapi doko namba. 18 Namba* lenge tao kalyo. Wamba kumapewaka doko indupa namba lenge tao etete katato kalyona kanda. Kumingi dokopa yuu koo dokopa dolapo nambame isingi. 19 Dopana,* wamba kanjeno dupapi, epapu pilyamo dupapi, dee maitakao pitamo dupapi dupa embame pepa pyape. 20 Nambanya* kingi tolae-kaita bui kalange katapumu kanjeno dupapi, lama setenge toko golome wasepae kalange dupapi, dutupame kongali petae. Dutupanya tenge dapa: bui kalange dutupa, sosa kalange dutupanya enjele dutupa. Dee lama setenge toko kalange dutupa, sosa kalange dutupana,” lea.
* 1:1 Dan 2:28-29,45; Pa 1:19; 22:6,16 * 1:2 Pa 1:9; 6:9; 19:10 * 1:3 Lu 11:28; 2 Ko 6:2; Pa 22:7,10 * 1:4 Eke 3:14-15; Ais 41:4; Pa 1:8; 3:1; 4:5,8; 5:6; 11:17; 16:5 * 1:5 Wee 89:27,37; 130:8; Ais 40:2; 55:4; Jo 18:37; Kl 3:18; 1 Jo 1:7; 4:10; Pa 3:14; 17:14; 19:16 * 1:6 Eke 19:6; Ais 61:6; Lo 16:27; 1 Pi 2:5,9; Pa 5:10; 20:6 * 1:7 Dan 7:13; Sak 12:10,14; Mt 24:30; Mk 13:26; Lu 21:27; Jo 19:34,37; 1 Te 4:11 * 1:8 Eke 3:14; Ais 41:4; Emo 3:13; 4:13; Pa 1:4; 4:8; 11:17; 15:3; 16:5,7,14; 19:6,16; 21:6,22; 22:13 * 1:9 Lo 5:3; 2 Ti 2:12; Pa 6:9 * 1:12 Pa 1:20 * 1:13 Ese 9:2,11; Dan 7:13; 10:5; Pa 1:20 * 1:14 Dan 7:9 * 1:14 Dan 10:6; Pa 2:18; 19:12 * 1:15 Ese 1:24; 43:2; Pa 14:2; 19:6 * 1:16 Eke 34:29; Ais 49:2; Ip 4:12; Pa 1:20; 2:1,12,16; 3:1; 19:15,21 * 1:17 Isi 13:20; Ais 44:2,6; 48:12; Dan 8:18; 10:15-19; Pa 2:8; 22:13 * 1:18 Ip 7:25; Pa 1:8 * 1:19 Ais 48:6; Dan 2:28-29; Apa 2:2; Pa 1:1; 22:6 * 1:20 Pa 1:12,16; 2:1; 3:1
☰