11
Akali lapomame pii latambina leamo doko
1 Dokopa mendeme makande ita mende namba ditala lao pituu, “Embame sakatatala Gotenya losuu anda andakedokopa olata toko dokopa dolapo makande pipi. Dopa petala Gote lao tama pilyamino endakali dupa itaki pyape.
2 Dopaka doko, losuu anda andake dokonya kamaka kame doko makande napinya kayape. Tenge doko kamaka dokaita netesa endakali dupa maitaena, dupame taono epe etete doko moko katao waimalyoo kana kingi ita kitomende-kisa dee lapoma katatami.
3 Dopa pitaminopa, nambame nambanya pii lao panenge akali lapoma epena latopa, dolapome iti angaitipi petala yuu gii taosene mende-kisa andate lapoma dee kingi ita tokange Gotenya pii doko lao panao katatambina,” lea.
4 Lapoma dolapo yuu pitakanya Kamongo dokonya enombanya olipi ita lapomapi kia lama lapomapi jepae.
5 Mendeme dolapo koyasipuli lao masetamo kandao doko, dolaponya nengekaita itate yuli tao pyakaetala dolaponya yandapipi doko tata. Mendeme dolapo koyasipuli lao masetamo kandao doko, itate dokome yandapipi doko dopa pyoo kumapenge.
6 Dolapome Gotenya pii doko lao panatambinopa aiyuu naepena lao kaitinya kaitini lyokapenge pupu lapae doko dolapo-kisa singi. Dee dolapome endaki dupa kapa pao taiyoko injisepenge pupu lapae doko dolapo-kisa soo, kenda pipae tata dupame masetambinoli pyoo yuunya endakali dupa koyasepenge pupu lapae doko dolapo-kisa soaka pingi.
7 Dolapome Gotenya pii doko lamaiyoo etapatambinopa, mena kapua mendepale mende yuli koo etete koko dokonya katao pyakalyingi dokome dolapo yanda pimaitala ita minao pyao kumaseta.
8 Pyao kumasetala dolapo yuu taono andake kongali lao Sotoma lata Isipe lata pingi dokonya kaitini andake dokonya setata. Wamba dolaponya Kamongo doko taono dokonya ita pokonya kumia.
9 Endakali pii wakale wakale lengepi, yonge waka waka katengepi, yuu dupa pitakanya endakali tata dupa pitakame dolapo koto tepoma-kisa dee yongama gii mende pyoo kandatala mendemepi nyoo malu pina lao kayala nayatami.
10 Dolapome Gotenya pii doko lao panatambinosa yuunya endakali dupa tanda koo nyepala dolapo taeme kumilyambinona lao dupame mona yaepao oapi dupa mende mai mai pitami.
11 Koto tepoma-kisa dee yongama gii mende pyoo patatamopa, Gotenya lete katasingi poo doko dolapo-kisa ipata. Dopa pitamopa dolapo sakatatala toya katatambinopa, kandatamino endakali dupame etete pakame kumatami.
12 Dolapome setambinopa kaitinya katao pii mende latamo dokome dolapo lao puu lao wii lao lao pituu, “Nyilyambo ketae dakenya ipupa,” lata. Dopa latamopa dolapo kopa kaina dokonya kaiti-kisa patambino doko yandapipi dupame kandatami.
13 Gii dokopaka titiwali andake mende minatala, taono dokonya anda yuupi dupa pitaka kingi ita pyoo lita petala dupanya mende koyata. Dee taono dokonya endakali taosene kalange dupa titiwali minatala pyao kumaseta. Dopa pitamopa endakali yangi katatamino dupame etete pakame kumapala, kaitinya Gote doko lao lalyetami.
14 Kenda pipae laponge doko etapea. Dee teponge doko tenda yapa ipatana kanjepape.
Enjele kalange dokome beto leamo doko
15 Enjele kalange dokome baanya beto doko leamopa, yangimi kaitinya katao puu lao lao pituu, “Yuu dupa pitaka indupa naimanya Kamongo Gotepa Kataisapa dolapome isoo katapelyambinona, tanga tangapi isoaka katatambina,” leami.
16 Dokopa isingi akeli kingi ita lapoma-kisa dee kitomende Gotenya enomba-tena nyakamanya tokonya petengema dupame luma lakao tombauli soo Gote lao tama piami.
17 Dupame lalyoo lao pituu,
“Kamongo Gote, emba wamba waka kateeno,
indupa kalyeno doko-kisa pupu lapae silyamo.
Embanya pupu lapae andake doko tange nyepala.
embame tee pyao isoo kalyeno dokonya naimame emba lao yaka pilino lelyamano.
18 Netesa endakali dupame imbu kayaminopa
embame dupa tanda maipengepi, endakali kumapae dupa yapapenge giipi doko ipatea.
Dee embanya kalai pingi potopesa dupapi,
embanya endakali kenge singipi nasingipi,
emba paka kayao katenge dupapi, dupa yole maipengepi,
yuu minao koyasiamino dupa koyasepengepi dutupa pipenge gii doko ipateana,” leami.
19 Dopa leaminopa Gotenya losuu anda kaitinya katenge doko lumbapae siamopa, Gotenya pii lao setapae palenge bokosa doko andokote-kaita panao sia. Dokopa yuu wapaka dupa pyoo mulumalu lao kaiti katao titiwali minao tandake kapa yale dupa epea.