15
Enjele kalange dupame kenda pipae kalangeaka sepeta kateami
1 Dee kaitinya kongali andake waka mendepale mende pia. Enjele kalange mendatupame endakali koyasalanya kenda pipae kalangeaka sepeta kateami. Kenda pipae dutupa etatamopa dee ipata mende nasia. Dutupa-kisa Gotenya imbu kaenge doko etalakao etea.
2 Dee solowata pete jepae mendita mende kandeo. Doko galasa mende itate-pipa mendenya pali-pali petae jia. Lemba dokonya mena kapua mendepale dokopi, baa wangi tao wasepae dokopi, baanya kenge itaki yaki dokopi, dutupa ita miniamino endakali dupa Goteme gitaa jepae maiyamo dupa minatae kateami.
3 Dupame Sipisipi Yakane dokopa, Gotenya kendemane Mosesepanya wee dopale joo dapa leami:
“Eteteaka pupu lapae pitaka Kamongo Gote emba-kisa silyamo.
Embame kalai piino dupa andakeaka jilyamo.
Dupa kandao mona andelyamano.
Endakali tata pitakanya emba kiŋi kalyeno.
Embanya mana dupa angipi tolatepiaka silyamo.
4 Kamongo, emba iki epe etete kalyeno doko apimi paka nakayatape?
Emba apimi lalyala nayatape?
Embanya mana tolatae dupa panao ipatea.
Tenge ongonya endakali tata pitakame emba lao tama pyaa ipatami.
5 Dopa lao wee doko lateaminopa, Gote kalyamona lao panasingi kaitinya losuu anda lapalapame petae andakote dokonya panda eteteaka epe doko lumbiamo kandeo.
6 Dokopa enjele kalangeme kenda pipae kalangeaka sepeta kateamino dutupa panda eteteaka epe dokonya katao kamaka epeami. Dupame lapalapa kaimala napingi etete kyoo lapae dupa petala matapu golome wasepae dupa sangalinya pyoo epeami.
7 Opale lenge tenge kitomende dutupanya mendeme pelesa golome wasepae kalangeaka enjele kalange dutupa menda menda maiya. Gote katawaka katenge dokonya imbu kaenge doko pelesa kalange dutupanya tumbatae katea.
8 Dokopa Gotenya tii pipaepa pupu lapaepa dolaponya kena piamo dokome panda eteteaka epe dokonya tumbatae kateamopa, mendemekapa pao andaka dokonya kolandapenge nanjia. Enjele dutupame kenda pipae dutupanya kalai pyoo etasetena lao malisepenge jia.