18
Taono andake Bapilone doko koyatelyamona leamo doko
Dee** maitakao enjele waka mende kaiti-kisa katao isa epeamo kandeo. Baa etete pupu lao tii pipae dokome yuu doko tii pisia. Dopa* petala baame etete puu lao lao pituu,
“Taono andake Bapilone*doko koyatelyamo.
Kiningi, koyatelyamo.
Yuu dokonya enjele koo Satane jepae dupame tenge yawatala,
enjele koopi, yakaauu nakayapenge koo dupapi dupa pitaka yuu dokonya anjetae joo katengema.
Doko* aipuma? Bapilone yuu dokome baanya akali elya pingi pyoo paenge mana kyoto endaki waene jepae doko,
yuu dupa pitakanya endakali tata dupa pitakame nena lao maiya.
Dopa piamopa, yuunya kiŋi dupame baa-pipa kepo koleami.
Baame pitoo lao masiamo dupa pitaka pyaanya baanya muni longo paka siamo dokonya pisinisa kalai pingi endakali dupame muni longo nyiamina,” lea.
Dee* pii mende kaitinya katao lea dokome lao pituu,
“Nyakama baanya koo dokopa kopataminopa,
baa kenda pipae nyetamo dokonya aopyoo latala nyakama apata nyetamina,
nyakama nambanya endakali dupame yuu doko yakinatala ipupa!
Doko,* baanya koo dupa eteteaka andake pyoo mau pyatae katao pao kaitinya tuu lea.
Goteme yuu dokonya koo dupa pitaka masetae kalyamo.
Enda* dokome nyakama-kisa piamoli pyoo nyakamame yanu pyao pitamino dokonya
baame piamo dopaleaka dee mende apata waipa soo pyepape.
Baame kapo penge mendenya nyakamanya endaki waene depa lekeamoli pyoo
nyakamame baanya depa lakamaiyoo pituu
wakao dopaleaka mendatupa waipa soo depa lakamaiyepape.
Baame* baa tange lalyoo yongenya pyuani kayamo dupa pitaka piamoliaka pyoo
nyakamame baa tanda maiyoo mona minao kenda pisalapape.
Doko baame baanya mona dokome,
‘Namba enda kuini joo pilyona, walyakae joo napilyona,
mona kenda pisingi mende nakandatona,’ lenge
Dopa* lao masingi dokonya kenda pipae dupa yuu gii mendainyaka baa-kisa ipata.
Yainapi, mona kenda pisingipi, lopo andakepi dupa
baa-kisa epena latala baa itateme yangata.
Kini, baa yapatamo Kamongo Gote doko pupu lapaena,” lea.
Baa** kepo petala pyuani kayamino dupa pitaka pyoo eteamino yuunya kiŋi dupame baa itatenya tatamo kena doko kandatala ee lao yamataka latami. 10 Baa* tanda koo natamo dokonya dupame pakame kumapala, tependa katao lao pituu, “Bapilone yuu taono andake pupu lapae emba Goteme kilyoko gii mendai ikinya yanu nyoo yapelyamona kondo etete kondo,” latami.
11 Yuunya* pisinisa pingi endakali dupame yuu doko lao masetala ee lao mona kenda kayao pitami. Doko aipuma? Endakalimi nyakamanya pinju dupa dee sambala nayatami. 12-13 Golopi,* silipapi, kana auu pipae muni longome sambengepi, mamakupi, lapalapa kyoo lao auu pipaepi, wene pyapaepi, penapena pipaepi, kate pyapepi, ita tunduma auu pipae pingi tata tatapi, mena elepene nengeme wasepae tata tatapi, ita yole andakeme sambengepi, kana botonjapi, aenepi, kana yati pipaepi dupame wasepae dupapi, nee tende pisingi ita yanu sinamonepi, itamaiyapi, ita kena tunduma pina lao yangenge dupapi, wele tunduma pipaepi, kena tunduma pipae pingi pautapi, endaki waenepi, olipi ipangepi, nee palawa epepi, wiisa diipi, pulumakawapi, sipisipipi, mena osame pyalya lelyamopa pituu paengepi, kendemanepi, endakali sambengepi, dupa dee sambala nayatami. 14 Pisinisa pingi endakali dupame lao pituu, “Embame opale nyepawanimi kumiino dupa etapala, oapi auu pipae yole andakeme sambenge tata tata dupapi, embanya yati auu pipae dupapi dupa koyatelyamona, embame dutupa dee nakandatena,” latami.
15-17 Oapi*** dopale dupame pisinisa petala taono dokonya muni longo nyiamino endakali dupame taono doko etete koyatamo dokonya paka kayapala tependa katatami. Dopa petala dupame ee lao mona kenda kayao lao pituu, “Wamba kolosa kyoo lapaepi, wene pyapaepi, kate pyapaepi, golopi, kana auu pipae muni longome sambengepi, mamakupi, dupame baa yati peteana, taono dokonya oapi epe dupa kilyoko gii mendai ikinya koyatamo dokonya taono andake doko kondo etete kondo,” latami. Dee endakinya paenge sipi lyaa miningipi, sipi sambapala yuu mendakaita penge endakalipi, sipinya kalai pingi akalipi, solowata pete dokonya pisinisa pingi endakali dupapi, dupa pitaka Bapilonenya tependa katatami. 18 Taono* doko yangatamopa kena kandatala puu lao lao pituu, “Taono andake dakepa kapa pao taono anduku silyape?” latami. 19 Dupame* nyakama tangenya aiyombanya kenai lumbao pyasoo mona kenda kayao eaka lao puu lao lao pituu, “Sipi setenge endakali dupame solowata petenya payatala taono andake dokonya muni longo silyamopa nyepala kamongo jingimana, taono andake doko kilyoko gii mendai ikinya koyatelyamo dokonya kondo etete kondo,” latami.
20 Kaitinya* katengepi, Gotenya endakalipi, aposelepi, potopesapi, nyakama pitakame taono doko kandatala mona yaepalapape. Doko Goteme nyakama lao masetala taono doko yapapala yanu nyepelyamo.
21 Enjele* kyoto mendeme kana etete andake mende minalyetala solowata pete dokonya pyale latala lao pituu, “Dopaka pyoo Goteme taono andake Bapilone doko nyepala puu lao pyale latamopa endakali dupame kapa pao dee nakandatami. 22 Dopana* gitaa pingipi, linu lengepi, pulupapu lengepi, beto pingipi dupa dee nasetami. Oapi tata tata dupa wasingi endakali dupanya mende nakandao wiisa dii indingisa kana ningi nango lenge doko dee naseteamiaka. 23 Ita* tao katenge doko dee natata. Akali enda kelyao enda akali pao pilyamopa pii lenge doko dee nasetamiaka. Doko aipuma? Wamba Bapilone dokonya pisinisa pingi endakali dupame yuunya etete andake joo kateaminopa, baame topoli joo yuu pitakanya endakali dupa minakasiana,” lea.
24 Potopesapi,* Gotenya endakalipi, yuunya endakali taono Bapilone dokome taiyoko nyiamo dupa pitakapi dupanya tenge doko baa-kisa dia.
* 18:1 Ese 43:2 * 18:1 Jet 50:1-46 * 18:2 Ais 13:21-22; 21:9; 34:11,14; Jet 50:15,39; 51:8 * 18:2 bapilone Pa 14:8 doko kandape. 18:2 yaka Jutamanya mana dokome yaka tata mendapua koo kaimala pipaena nala nayatama lao nee nyetae-pyaa. * 18:3 Ais 23:17; Jet 25:15,27; 51:7; Pa 14:8 * 18:4 Ais 48:20; 52:11; Jet 50:8; 51:6,45; 2 Ko 6:17 * 18:5 Jen 18:20-21; Jet 51:9 * 18:6 Wee 137:8; Jet 16:18; 50:15,29; 2 Te 1:6 * 18:7 Ais 47:7-9 * 18:8 Lep 21:9; Jet 50:34; Pa 17:16 * 18:9 Ese 27:30-35; Pa 17:2 * 18:9 Ese 26:16-17 * 18:10 Dan 4:30 * 18:11 Ese 27:31,36 * 18:12-13 Ese 27:12-13,22 * 18:15-17 Ese 27:31,36 * 18:15-17 Ese 28:13; Pa 17:4 * 18:15-17 Ais 23:14; Ese 27:27-30 * 18:18 Ese 27:32 * 18:19 Ese 27:30-34 * 18:20 Dit 32:43; Wee 96:11; Ais 44:23; 49:13; Jet 51:48; Pa 19:1-2 * 18:21 Eke 15:5; Jet 51:63-64; Ese 26:21 * 18:22 Ais 24:8; Ese 26:13 * 18:23 Ais 47:9; Jet 7:34; 16:9; 25:10 * 18:24 Jet 51:49; Ese 24:7; Mt 23:35-37; Pa 6:10; 16:5-7; 17:6; 19:2