3
Satisa yuu dokonya pepa pyao pyasakamaipi leamo doko
“Satisa* yuu dokonya sosanya enjele kalyamo dokonya dapa lao pepa pyao pyasakamaipi: ‘Gotenya sipitisa kalange dutupa namba-kisa soo dee bui kalange dutupa namba-kisa katao pipumopa pii dake emba langilyo. Embanya mana dupa nambame masilyo. Endakali dupame emba kandao lenge tao kalyenona lelyaminoaka doko, kumapae mende kalyeno. Emba kandao katape. Embame mana miniino dupa nambanya Gotenya enombasa angi jiamo nakandeo. Tenge dokonya embanya mana dupa mee jalanya pilyamona, embame pupu lao minape. Dopa* petala embame Wai Pii Epe sepala nyiino doko dee masetala mona kapilyoo minapeta kopo lape. Emba lenge tao kalya nayateno kandao doko, namba pake nenge endakali mende epengeli pyoo, embame naipapeno lao masete gii mendenya ipato. Dopaka* doko, embanya endakali mendatupa Satisa yuu dokonya kalyamino dupame nyakamanya yonge pee dupa kaimala pisala nayami. Dupame epe joo katengema dokonya kapa pao yonge pee kyoo lapae dupa pyoo namba-pipa payatama. Koo* dupa yanda pimaiyoo ita minatamo endakali dokonya nambame dopaka pyoo yonge pee kyoo lapae petakamaitala, endakali lete etete katenge dupanya kenge singi buku dokonya nambame baanya kenge kunanya nepakamaiya nayato. Nambame nambanya Takangepi Takangenya enjelepi, dupanya enombanya baa nambanyana lao lao panato.
“ ‘Sipitisame sosa dupa kandao pii lelyamo doko endakali kalekaita singi dokome sokondape pipenge.’
Pilatepia yuu dokonya pepa pyao pyasakamaipi leamo doko
“Pilatepia* yuu dokonya sosanya enjele kalyamo dokonya dapa lao pepa pyao pyasakamaipi: ‘Namba etete epe angi dokona, Dapitimi kii miniamo doko nambame minao kaitini lumbanya setelyo doko dee endakali mendeme kapa pao pai laa naengema. Pai lelyo doko dee endakali mendeme lumbala naengema akali dokome pii dake emba langilyo. Embanya* mana dupa nambame masilyo. Nambame embanya enombasa kaitini lumbapelyo doko mendeme kapa pao pai laa nayata. Emba-kisa pupu lapae kuki silyamo dokopi, nambanya pii minapeta kopo leeno dokopi, namba maita dyaa nayeno dokopi dutupa namba masilyo. Satane* tata dupame naima Jutana lelyaminoaka doko, dupa Juta daana, sambo lelyamino. Dopana sepe. Nambame dupa embanya enombasa ipao moko katate dosa luma lakapala emba lao tama pina latopa, nambame emba auu kaenge lamo lao kandatami. 10 Embame* nambanya pii doko watao minao kyoto joo kateeno tenge dokonya nambame emba isotopa, makande pingi dokome yuu dupa pitakanya endakali dupa makande pyaanya ipatamo doko emba-kisa naipata. 11 Namba* yapa ipatona, embame embanya yole doko aopyoo latala mendeme nyoo nepakatana nambanya piipi manapi opale emba-kisa silyamo dupa etete kyoto joo minape. 12 Koo* dupa yanda pimaiyoo ita minatamo endakali doko nambame nambanya Gotenya losuu andaka panda etete epe dokonya pingina joo katasotopa, baa dee kamaka paa nayata. Nambame nambanya kenge enengepi, nambanya Gotenya kengepi, nambanya Gotenya yuu taono dokonya kengepi dutupa baa-kisa pepa pyato. Yuu taono doko Jetusaleme enenge nambanya Goteme kaiti-kisa katao pyandatamo doko.
13 “ ‘Sipitisame* sosa dupa kandao pii lelyamo doko endakali kalekaita singi dokome sokondape pipenge.’
Leotosia yuu dokonya pepa pyao pyasakamaipi leamo doko
14 “Leotosia* yuu dokonya sosanya enjele kalyamo dokonya dapa lao pepa pyao pyasakamaipi: ‘Namba kenge Kiniaka lenge Gotenya pii tolao lao panenge akali angi dokona, Goteme wapuiyamo dupanya tenge dokome pii dake emba langilyo. 15 Embanya* mana dupa nambame masilyo. Emba endaki itaita napingi kii nala naengeaka jepae doko, itaita pipae tamopi kii napae tamopi mende pyali kandao doko, yaka jipyali. 16 Dopaka doko, emba endaki kulapae jepala itaita pipaepi kii napaepi mende nanjilino dokonya nambame emba endaki joo mungunya nepawani kaelyo. 17 Embame* dapa lenge: ‘Namba muni longo sipumopa oapi longo setao kalyona, mendita mende daa nanjilyamo,’ lenge. Dopa lengeaka doko, emba koyao kalyeno dokopi, endakalimi kondo kayapenge dokopi, daa joo kalyeno dokopi, papata joo kalyeno dokopi, lenge koo joo kalyeno dokopi dutupa emba tangeme masala naeleno. 18 Dopa* pyoo katapinosa nambame mana datupa emba langilyo: emba-kisa oapi longo sinalena golo kana itateme yangao auu pisetae doko namba-kisa sambape. Embanya yonge doko sanga pyatae katao elya nakayatalena yonge pee kyoo lapae mende sambape. Embanya lenge dolaponya matasini katatenopa auu pyoo tatalena lenge matasini mende apata sambapeaka. 19 Nambame* endakali auu kaelyo dupa pyalanya latala, dupanya mana dupa nambame tolasingi. Dopana embame mona mendai paliuu mona kapilyepe. 20 Namba* anda kambusa pii-pii lao kalyo kanda! Endakali mendeme namba lumu lao sepala ipu latamo kandao doko, namba andaka kolandatala baapa nalimba tange awapa pituu nee natamba. 21 Wamba* nambame koo dupa yanda pimaiyoo ita minatala nambanya Takangepa kamongao kalyambanoli pyoo koo dupa yanda pimaiyoo ita minatamo endakali doko, nambapa kamongao katatambana epena lato.
22 “ ‘Sipitisame* sosa dupa kandao pii lelyamo doko endakali kalekaita singi dokome sokondape pipengena,’ ” lao endakali katele piamo dokome lea.
* 3:1 1 Ti 5:6; Pa 1:4,16,20; 2:1-2; 3:8,15; 4:5; 5:6 * 3:3 Mt 24:42-44; Mk 13:33; Lu 12:39-40; 1 Te 5:2,4; 2 Pi 3:10; Pa 2:5,16,22; 3:19; 16:15 * 3:4 Ju 23; Pa 7:14 * 3:5 Eke 32:32-33; Wee 69:28; Dan 12:1; Mt 10:32; Lu 9:26; 10:20; 12:8; Pl 4:3; Pa 2:7; 3:18; 4:4; 6:11; 7:9,13; 13:8; 17:8; 19:14; 20:12,15; 21:27 * 3:7 Jop 12:14; Ais 22:22 * 3:8 1 Ko 16:9; Pa 2:2; 3:1,15 * 3:9 Ais 43:4; 45:14; 49:23; 60:14; 2 Ko 11:14,15; Pa 2:9 * 3:10 Lu 21:19; 2 Ti 2:12; 2 Pi 2:9 * 3:11 1 Ko 9:24-27; 2 Ko 6:2; Pa 2:10,16,25; 22:7,12,20 * 3:12 Ais 62:2; 65:15; Ese 48:35; Ga 2:9; 1 Ti 3:15; Pa 2:17; 14:1; 21:2; 22:4 * 3:13 Pa 2:7 * 3:14 Pot 8:22; Jo 1:1-3; Kl 1:15; Pa 1:5; 19:11 * 3:15 Lo 12:11; Pa 2:2; 3:1,8 * 3:17 Pot 13:7; Osi 7:9; 12:8; Lu 12:21; 1 Ko 4:8 * 3:18 Ais 55:1; Je 2:5; Pa 3:5; 4:4; 16:15 * 3:19 Pot 3:12; 1 Ko 11:32; Ip 12:4-11; Pa 2:5,16,22; 3:3 * 3:20 Jo 14:23; 1 Jo 2:24 * 3:21 Mt 19:28; Lu 22:29-30; Pa 1:6; 20:4 * 3:22 Pa 2:7