5
Joneme buku mendepa Sipisipi Yakane mendepa kandeamo doko
Kiŋi* petenge toko dokonya petenge dokome kingi tolae-kaitame buku mende minia. Buku dokonya panda nasoo yangi yangipi lapotanya pepa pyatae katea. Buku yaki pingi kende kalangeme buku doko yaki petae kateamopa, kende lyolo dutupa maa minao wakaiya katatae katea. Dokopa enjele pupu lapae mendeme puu lao lao pituu, “Akali epe apimi kapa pao wakaiya dupa taka latala buku doko lyangenape?” lea. Dopa* leamopa kaitipi, yuupi, yuu kokopi, dupanya buku doko lyangao kandapenge mende nakatea. Buku doko kapa pao lyangapengepi kandapengepi epe mende kutao kayaminosa namba ee lao yamataka leo. Isingi* akali dupanya mendeme namba langyoo, “Jutamanya mena layone*jepae mende Dapiti tatanya mandipae dokome wakaiya kalange dutupa taka latala buku doko lyangalanya yanda pyoo ita minateana, emba ee kaya,” lea.
Dokopa* Sipisipi Yakane pyao kumasiamino dopale mende opale lenge tenge kitomende dutupapi, isingi akalipi dutupanya kainanya kiŋi petenge toko tengesa dosa katea. Baa aiyombanya nenge kalange kalyamopa lenge kalangeaka tenge-pyaa. Lenge dutupa Gotenya sipitisa kalange dutupa Goteme yuu dupa pitakanya kalya pena lea-pyaa. Kiŋi* petenge toko dokonya petenge doko peteamo dokonya kingi tolae-kaita buku siamo doko Sipisipi Yakane dokome pao nyia. Nyepeamopa,* opale lenge tenge kitomende dutupapi, isingi akali kingi ita lapoma-kisa dee kitomende dutupapi dutupame Sipisipi Yakane dokonya enombasa tombauli siami. Dopa pyoo pituu, isingi akali dupame gitaa jepae mendapua menda menda minao pituu, pelesa golome wasepae dupanya ita kena tunduma pina lao yangenge dupame tumbatae mendapua miniamiaka. Kena tunduma pina lao yangenge miniamino dokome Gotenya endakali dupame baa lao loma singima doko makande petae. Dupame* wee enenge mende dapa lao leami:
“Emba epe dokome kapa pao wakaiya dupa taka latala
buku doko lyangapenge jilyamo.
Doko, endakalimi emba taiyoko nyiamino dokome endakali dupa Gotenya kii tamao nyakamaii.
Endakali pii wakale wakale lengepi, yonge waka waka katengepi, yuu dupa pitakanya endakali tata dupa pitakapi dupa kii tamao nyakamaii.
10 Dupa* Goteme isoo katena latala baanya kalai pyakamaingi pitisa katena lee.
Dupame yuunya endakali dupa isoo katatami leena,” lao wee leami.
11 Dokopa* enjele eteteaka etete longo paka dupame kiŋi petenge toko dokopi, opale lenge tengepi, isingi akalipi dupa katao kakopeamino doko lengeme kandao pii leamino dupa kaleme soo pio. 12 Dupame* puu lao dapa leami:
“Sipisipi Yakane dake wamba pyao kumasiami.
Baa epe dokome pupu lapaepi, oapi etete longo dupapi, etete masokondape pingi manapi, kyoto joo katengepi, andanda semaingipi, tii pipaepi, tama pingipi dupa kapa pao nyepengena,” leami.
13 Goteme* wapuiyamo kaitinya katenge dupapi, yuunya katenge dupapi, yuu koko palenge dupapi, solowata petenya singi dupapi, mendita mende soo pelyamo doko pitakame dapa leami:
“Tama pingipi, andanda semaingipi, tii pipaepi, kyoto joo katengepi dupa
kiŋi petenge toko dokonya petenge dokopa Sipisipi Yakane dokopa dolapo-kisa tanga tangapi soaka penana,” leami.
14 Dokopa opale lenge tenge kitomende dutupame “Kapana,” leaminopa isingi akali dupame isa tombauli sepala dolapo lao tama piami.
* 5:1 Ais 29:11; Ese 2:9-10; Dan 12:4,9; Pa 4:2 * 5:3 Pa 5:13 * 5:5 Jen 49:9; Ais 11:1,10; Lu 7:13; Lo 15:12; Ip 7:14; Pa 22:16 * 5:5 layone Juta dupame Kataisanya pupu lapae dupa masetala kenge layone leami-pyaa. Doko naimame endakali mende kandao laima lenge dopale joo leami-pyaa. * 5:6 Ais 53:7; Sak 4:10; Jo 1:29,36; Pa 1:4; 4:5; 13:8 * 5:7 Pa 4:2,10 * 5:8 Wee 141:2; Pa 8:3-4; 14:2; 15:2 * 5:9 Wee 33:3; 40:3; 96:1; 98:1; 144:9; 149:1; Ais 42:10; Pa 14:3-4 * 5:10 Eke 19:6; Ais 61:6; 1 Pi 2:5,9; Pa 1:6; 20:4,6; 22:5 * 5:11 Dan 7:10; Ip 12:22; Ju 14-15 * 5:12 1 Ktl 29:11; Ais 53:7; Dan 2:20; Jo 1:29,36; Pl 2:7-9; Pa 5:6; 13:8 * 5:13 Wee 150:6; Ju 25; Pa 4:2,10; 5:3