8
Sipisipi Yakane dokome wakaiya kalange doko taka lea
1 Sipisipi Yakane dokome wakaiya kalange doko taka leamopa gii kuki mende kaitinya piipi keke kakipi mende nalea.
2 Dokopa enjele kalange Gotenya enombanya katenge dupa kandeopa, mendeme dutupa beto kalange maiya.
3 Dee enjele mendeme ipao olata toko dokopa kopao katapala pelesa golome wasepae mende ita kena tunduma pina lao setapala yangenge doko minatae katea. Ita kena tunduma pina lao yangenge longo dupa-pipa Gotenya endakali dupa pitakanya loma singima dupa-pipa dupa olata toko golome wasepae kiŋi petenge toko enombasa katenge dokonya pyasoo mendenya pali pali pina lao, ita kena tunduma pina lao yangenge dupa mendeme baa maiya.
4 Kena tunduma dokopa Gotenya endakali dupanya loma singi dokopa dolapo enjele dokonya kinginya soo ketae Gote-kisa pea.
5 Dokopa enjele dokome ita kena tunduma pina lao yangenge pelesa doko nyepala olata toko dokonya itate lopao nyoo pelesa dokonya tumbasetala itate doko isa yuunya pyale lea. Dopa piamopa yuu wapaka pyoo, kaiti katao, mulumalu lao, titiwali minao pia.
Enjele kitomendeme beto leamino doko
6 Enjele kalangeme beto kalange minatae kateamino dutupame beto laanya depa leami.
7 Dokopa enjele wambao dokome baanya beto doko leamopa, tandake kapapa itatepa dolapo taiyoko-pipa pyasilya pyasena petala isa pyandea. Dopa piamo dokome yuu pitaka tepoma pyoo lita petala teponge doko tao etao, ita pitaka tepoma pyoo lita petala teponge doko tao etao, kaka yokopi saka dupa pitaka tao etawaka pia.
8 Enjele laponge dokome baanya beto doko leamopa, mendeme yuu manda andake jepae ita tapeta mende solowata pete dokonya pyale lea. Dopa piamo dokome solowata pete pitaka tepoma pyoo lita petala teponge doko taiyoko pete jia.
9 Dee opale lenge tenge Goteme wasepae solowata petenya koko singi pitaka tepoma pyoo lita petala teponge doko kumao etea. Sipi dupa pitaka tepoma pyoo lita petala teponge doko koyaka.
10 Dokopa enjele teponge dokome baanya beto doko leamopa, bui andake kia kaiyepaele mende kaiti-kisa katao endaki lee kuingipi, andakepi dupa pitaka tepoma pyoo lita petala teponge dokonya pao kopo lea.
11 Bui dokonya kenge Kaa Pipae lenge dokome endaki dupa pitaka tepo pyoo lita petala teponge doko kaa pisia. Endaki doko kaa pipae dokonyana endakali longome napala kumiami.
12 Dokopa enjele kitomende dokome baanya beto doko leamopa, nikipa kanapa dolapo tepoma pyoo lita petala teponge doko koyamopa, dee bui dupa pitaka tepo pyoo lita petala teponge doko koyao iminjia. Dopa piamopa yuu gii dupanya niki lenge doko kumba natala tii pyaakao napyoo kuka kanapi buipi dupa dopaka pyoo kumba nea.
13 Dokopa yaka lakepame mende kaitipa kopao pee lao payamo dokome puu lao lao pituu, “Anematupa! Dee enjele tepomame beto laanya pilyaminona, yuunya endakali dupa etete koyatami, eteteaka koyatami iki lamo,” lea.