4
Embame Gotenya pii doko lamaipi leamo doko
1-2 Endakali letepi kumapaepi dupa yapala ipatamo Kataisa Jisasa dokopa Gotepanya enombasa katao nambame Kataisa dee ipatamo dokopa baame isingi dokopa dolapo lao masetala emba kyoto joo dapa langilyo: endakali dupa pii lamaipenge jetamopi nanjetamopi dupanya Wai Pii Epe doko lamaiyoo katape. Embame etete patapata lao mana lamaiyoo pituu, endakali dupanya koo dupa laitaka pyoo pyalanya lao mona sakatasakamaiyoo katape.
3 Tenda endakali dupame mana pii tolatae doko sowani nakaenya nyakama tangenya masingi iki watao minatala, tangenya mana lenge endakali longo mendapua yapao nyoaka pupala, dupanya pii dupa sepawanimi kumatami.
4 Dopa petala dupame kiningi pii doko nasemana lao maita maitala, tindi pii tata dupanya kale pyasoo setami.
5 Dopaka doko, dupa pitakanya embame emba tange isoo katao, kenda pipae dupa nyoo, waiyakali joo katao, Gotenya kalai emba-kisa silyamo dupa pyokondape pyoo pyoo katape.
Indupa nambanya kalai etalanya pilyamo leamo doko
6 Kundi maingili pyoo endakali dupame namba taiyoko nyalanya petelyamino. Namba alu pipenge gii doko ipatelyamo.
7 Lekeleke tao katenge angi dokonya namba lekeleke tao etao, kaita alo pingi dokonya alo pyao etao, Gote lao masoo miningi doko minapeta kopo lao petelyo.
8 Gotenya mana tolatae watao minatala yole nyepenge doko nambanyana lao depa lanya setalakao setekea. Yuu etatamo gii dokopa Kamongo baa pii tolao yapenge akali dokome yole doko namba dita. Dopaka doko, namba iki dyaa nayata. Baa panao ipatamo doko kandapuma laka lao putiti kaenge endakali dupa pitaka maitaka.
Opale pia mendatupa Polome leamo dupa
9-10 Akali Dimasame yuunya dupa putiti kayapala, namba yakinatala Tesalonaika yuu dokonya pea. Akali Ketesenesa lenge doko Galasia yuu dokonya peamopa, Taitesa baa Dalamesia yuu dokonya pea. Dopana emba yapa alo pyao ipupi.
11 Luku iki nambapa kalyambanona, embame Make lanyepala laminao awapa ipupape. Baame namba nisoo kalai pitamopa yaka jalapomo.
12 Nambame akali Tikikasa doko Epesasa yuu dokonya pena leo.
13 Emba ipao pituu dokopa, nambanya yonge pee kisa pingi mendepa buku mende-pipa Toasa yuu dokonya akali Kapasanya andaka seteona dupa nyoo minakao pituu, dee buku mendatupa mena yanungimi wasepae utupa etete kayala nayao nyepala minakao ipupi.
14 Kana botonjame oapi wasingi akali Alekesanda lenge dokome namba etete koyasiana, baanya kalai dokopa kapa lao tenda Kamongo dokome yanu nyeta.
15 Baame naimanya pii doko etete pyanya palyiana, embame akali doko wandyuu katape.
16 Namba tee pyao kosa lao kateo gii dokopa akali mendaipi mendeme namba nisalanya awapa nakatea. Endakali pitakame namba yakineamina, Goteme dokaitanya koo dupa masala naenako lao masilyo.
17 Dopaka doko, Kamongo doko nambapa awapa katao pupu lasiamo dokome Wai Pii Epe doko lamaiyokondape piopa, endakali tata waka dupa pitakame siami. Dokopa mena kumbalo dupame namba nalanya petae doko Kamongome pyoo nyia.
18 Namba koyasalanya pitamino dupa pitakanya Kamongome namba pyoo nyepala baanya kaitinya isingi panda dokonya isoo laminao pata. Tanga tangapi Kamongo dokoaka lao tama pipenge lamo. Kiniaka.
Etao lasa leamo pii dupa
19 Embame enda Pitisikapi, akali Akuilapi, Onesipotasanya palupi dupa nambame auu pyoo katena lelyona lamaiyakape.
20 Akali Ilasatasa baa Kotina yuu dokonya kateamopa, akali Topimasa baa yaina pianya nambame baa Mailitasa yuu dokonya katena lao yakineo.
21 Akali Yupulasapi, Pyutenesapi, Lainasapi, enda Kolotiapi dee masoo miningi kaiminingi dupa pitakapimi emba auu pyoo katape lelyamino. Koo kana palitana emba nea kayao yapa ipupi.
22 Kamongo doko embanya mona andaka katena. Baame nyakama kandao mona epe palena.