2
Pii manapi tolatae dupa lamaipina leamo doko
1-2 Dopaka doko, embame mana tolatae lamailino dokopa kapa pata mana tata mendapua minina lao dapa lamaipi: akali angi dupame bia akipi longo lao nanao mona paliuu lalyepenge joo katao, masoo miningipi, auu kaengepi, kyoto joo katengepi dutupanya auu pyoo katena lape.
3-5 Dopaka pyoo enda angi dupame etete epe joo pitipala, nambonambo napyoo bia akipi dupanya masetae soo longo lao nanao petena lape. Kolele dupame nyakamanya wane akalipi dupa auu kayao, mona paliuu, kepo kolalanya masala nayao, andaka lambao pituu, mana epe minao, nyakamanya akalingi dupanya pundipundi petena lao enda angi dupame mana epe dupa lamaina lape. Endakali dupame Gotenya pii doko kandao pii koo laa nayataminopa lao dopa pina lape.
6 Dopaka pyoo wane kolele dupame mona paliuu katena lao mana lamaiyoo katape.
7-8 Mana tata tata dupa pitakanya endakali dupanya makande epe setakamaiyoo emba tangeme mana epe dupa minao katape. Endakali dupa mana lamaiyoo pituu, male-male nalao mona mendai palyoo pii lyaa tolatae dupa lamaiyoo katape. Dopa pitinopa naimanya yandapipi dupame elya kayapala naima kandao pii koopi mende kapa pao laa nayatami.
9-10 Kendemane dupame nyakamanya akali andake dupanya pundipundi katapala pina latamino dupa pitaka pipenge. Akali andake dupanya mona minao auu pisakamaiyoo katao, pii tanga nalao, opale mende pake nyakamaiya naenya, nyakama tungi pina lao epe joo katapenge. Dopa pyoo katao dupame mana minatamino dupa pitakame naimanya Pyoo Nyingi Gotenya lao mana lamaingi pii doko minalyetami.
11 Doko, endakali dupa pitaka kandao mona epe palyoo pyoo nyingi Gote dokonya mona epe palenge doko panatea.
12 Naimame Gote maita maingi mana dupapi, yuunya pyuani kaenge koo dupapi, dupa daa lao yakinatala, indupa gii dakepa naima mona paliuu tolao payao Gote watao minao kalyepale lao Gotenya mona epe palenge dokome naima mana langingi.
13 Naimame dopa pyoo katao naimanya Kamongo Gote Pyoo Nyingi Jisasa Kataisa baa gii etete epe dokonya tii pipae dokopa tambetambe ipatamo doko malisoo kalyamano.
14 Baame naima koo pingi mana dupa pitakanya kii tamao nyotoo lawapi, naimame mana epe dupa minawani kayao minao baanya endakali yapao nyepae joo kalyepale lao auu pisotoo lawapi, baa tangeme naimanya lao kumikea.
15 Embame pii dutupa lamaiyoo katape. Emba Kamongonya akali angi dokome endakali dupa pupu lasoo tolasepe. Endakali mendaipi mendeme emba kilya nakandena lao katape.