17
Goteme Abrame Tata Dupa Baa Tatana Lao Yanu Kepena Leamo Doko
1 Abrame ee kana 99 leamopa, Kamongo doko ipupala, “Namba Gote etete pupu lapae doko. Emba nambanya enombanya auu pyoo tolao katape.
2 Nambame emba-kisa pii yaki pio doko dee kyeto jotoo. Tenda emba tata dupa nambame minao andake jotona” lea.
3 Dokopa Abrameme Gote mambo pyao luma lakapala, langalu yuunya siamopa, Goteme baa lamaiyoo,
4 “Nambame emba-kisa pii yaki pio doko masetala, kiningi etete lelyo. Endakali tata longo dupanya tenda emba yumbange jete.
5 Tenge dokonya, embanya kenge Abrame yakinatala, Abrakame lelyo.
6 Nambame emba tata dupa minao andake jotopa, dupanya mandipae mendapu kiŋi katatami.
7 Emba-kisa pii yaki pio doko tanga tangapi sulu seta. Embapa, embanya mandipaenya mandipae palitamino dupanya namba Gote doko katato.
8 Yuu Kenane dakenya emba epapu tisa kalyeno. Dopaka doko, tanga yuu dake pitaka embapa, embanya mandipaenya mandipae dupa etete ditu. Ditala, namba nyakamanya Gote doko katatona” lea.
9 Dopa latala, dee Goteme Abrakame lamaiyoo, “Embapi, embanya mandipaenya mandipae palitamino dupame nambanya pii nyakama-kisa yaki pilyo dake watao minaowaka katatami.
10 Embapi, embanya mandipaenya mandipae dupanya ane pitakanya namba tatana lao yanu kepalapape.
11 Kepatami dokome, nambame nyakama-kisa pii yaki pilyo dake petae katata.
12 Nyakamanya mandipaepi, mee kalai akalipi, kalai akali sambao nyepaepi, dupanya wane ane manditamino dupa yuu gii 8-pela latamopa, namba tatana lao yanu kepalapape.
13 Embanya mee kalai akalipi, kalai akali sambao nyepaepi, dupa pitakanya namba tatana lao yanu kepalapape. Namba tatana lao yanu kepenge mana doko tanga tangapi sulu seta.
14 Akali mende namba tatana lao yanu kepala naeyatamo, doko nambanya pii nepatamosana, watao pyalapape” lea.
15 Dopa latala dee Goteme Abrakame lamaiyoo, “Embanya etanenge kenge Sarai lenge doko kaeyapala, indupa pituu Sara lape.
16 Nambame baa minao auu pisotopa, embanya wane ane mende manjakata. Tenda baanya aputingi tata longo palitamino dupanya mendapu kiŋi katatamina” lea.
17 Dokopa, Abrakameme baa mambo pyao luma lakapala, langalu yuunya sia. Soo pituu, “Namba ee kana 100 lapumupa, Sara baa ee kana 90 lelyamo dokonya, nalimbame wane mende kapa mandipengepe” lao masetala, baanya mona andaka gii kaeya.
18 Gii kaeyapala, baame Gote lamaiyoo, “Isamale auu pyoo katena, baa nisepe” lea.
19 Dokopa Goteme lao pituu, “Isamaleme embanya panda doko nanyeta. Embanya enda Sarame wane ane mende manditana, dokonya kenge doko Aisake lape. Nambame baapa, baanya mandipae dupa-kisa pii lao yaki pitu, doko tanga tangapi sulu seta.
20 Embame Isamale nisepe leeno dokonya, nambame baa minao, akali tata andake jetala, auu pisoto. Baanya ikiningi dutupa tata 12 palitaminopa, dutupanya akali aiyomba wakale-wakale katatami.
21 Kana kalyamano dakenyaka, ee kana mende omonya, Sarame wane Aisake mandita, doko-kisa nambame tenda pii lao yaki pituna” lea.
22 Goteme Abrakame-pipa pii lao etapala, baa pea.
23-27 Gii dokopaka, Goteme pina leamoli pyoo, Abrakameme baanya ikiningi Isamalepi, mee kalai akalipi, kalai akali sambao nyepaepi, baa tatapi, dupa pitaka Gote tatana lao yanu kepakamaiya. Dokopa, Abrakame baa Gote tatana lao yanu kepeaka. Gii dokopa, Abrakame ee kana 99 leamopa, baanya ikiningi Isamale baa ee kana 13 lea.