24
Abrakameme Aisakenya Enda Lanyakamaiyamo Doko
1 Gii mendatupa pateamopa, Kamongome Abrakame minao auu piseteamopa, baa lyanga jia.
2-4 Gii mendepa, Abrakameme baanya kalai akali isingi mupa doko lamaiyoo, “Embame nambanya ikiningi Aisakenya ae Kenane tange enda mende lanyakamaiya naeyape. Emba nambanya takangenya yuu dokonya patala, enda namba tata mende Aisakenya enda joo lanyakamaipi. Yuu kaitipinya Kamongo Gote dokonya kenge doko latala, embame nambanya paingi koko kingi pyandatala, nambanya pii nepala naeyatona lao, kyeto joo langi” lea.
5 Dokopa kalai akali dokome baa lamaiyoo, “Emba tata enda mende nambame lamaitupa, daa latamo dokopa, nambame embanya ikiningi doko lanyoo patopa, baa tange enda mende kandao nyetamo doko, kapape?” lea.
6 Dokopa Abrakameme pii yanu pyao, “Nambanya ikiningi doko lanyoo, dee nambanya yuu dokonya napupi, etete daa.
7 Kamongo Gote ketae kaitinya katenge dokome nambanya takangenya palupi, yuupi, dupa yakinatale lao, wii lao lanyia. Lanyoo ipupala, kyeto joo namba langyoo, nambanya mandipaenya mandipae dupa yuu dake etete maiyakatona lea. Kamongo dokome enjele mende wambao pupala, depa latamopa, embame nambanya ikininginya enda mende kandao lanyakamaiyapeno.
8 Enda dokome daa latamo doko, emba nambanya pii lelyo dakeme, emba ketae tenge naipata. Dopana, nambanya ikiningi doko yuu dokonya lanyoo napupi, daa lelyona” lea.
9 Dopa lateamopa, kalai akali dokome Abrakamenya paingi koko kingi pyandatala, baa lamaiyoo, “Embame pii lelenoli pituna” lao etete kyeto jia.
10 Dokopa kalai akali dokome oapi epe maipengepi, nyakamanyapi, dupa Abrakame-kisa nyepala, kamele 10 dutupanya mandisoo depa lea. Latala, baanya akali apata pupenge dupa lanyoo, yuu andake Mesopotamia, akali Neonya taono dokonya-kaita yuu gii mendatupa kaitinisa paliu pea.
11 Pupala, yuu kuiyala peamopa, enda dupame endaki kamuala epengema gii dokonya, yuu paanya peamo dokonya pyakamea. Pyakamatala, kamele dupa endaki pete tombapae taono kamanda singi dosa tengesa lumame isa petena lea.
12 Dokopa baame loma soo pituu, “Kamongo, nambanya akali andake Abrakamenya Gote, embame nambanya akali andake doko kondo latala, nambanya kalai pilyo dake angi jina lape.
13 Namba endaki pete tombapae tengesa asa kalyo dokopa, wanaku mapukae yuu dake tange dupa endaki kamuala ipamino.
14 Ipatamino dokopa, nambame wanaku mapukae dupanya mende lamaiyoo, 'Embanya penge dokonya namba endaki natoo dii' latopa, namba ditala, kamele dupa apata maiyakatoo latamo doko, embanya kalai akali Aisakenya enda lanyakamaipenge doko-lamo lao kandatoo” lao loma sia.
15 Loma soo kateamopa, wanaku Rebeka lenge mende penge soo endaki kamuala epea. Baa Betuele wanenge. Betuele baa Abrakame kaiminingi Neopa, enda Milikapanya ikiningi.
16 Wanaku doko mapukae, akali tole napingi etete malya mende. Baa endaki pete tombapae dokonya pyakanatala, endaki kamupala, lalyoo epea.
17 Epeamopa, kalai akali dokome alo pyao pupala, lamaiyoo, “Endaki mendalapo natoo ditipi?” lea.
18 Dopa lateamopa, wanaku dokome endaki penge latainya siamo doko isa minanatae katao, “Nambanya akali andake, yapa naa” lea.
19 Endaki napeamopa, wanaku dokome baa lamaiyoo, “Embanya kamele dupa apata endaki nao tiaka kaena maiyakatoana” lea.
20 Dopa latala, wanaku dokome endaki kamualangole pyoo, kamele endaki maingi dokonya kaii leamopa, kamele dupa nao tiaka kaeyami.
21 Dopa piamopa, Abrakamenya kalai akali dokome pii laa naeyao, Rebekame kalai piamo dupa kandatala, Kamongome Aisakenya enda anali lakamaiyamo doko-lamo lao masia.
22 Kamele dutupa endaki napeaminopa, kalai akali dokome muni longo pupenge kitambu golome pipae, kinginya pisingi lapomapi, lyamunginya pisingi golo riŋi mendepi, dutupa Rebeka maiya.
23 Maitala, baame Rebeka lamaiyoo, “Embanya takange doko naima langipoko. Naima kuka gii doko iki palimana, embanya takangenya andaka panda silyape?” lea.
24 Dopa leamopa, Rebekame pii yanu pyao, “Nambanya takange doko, Neo, Milikapanya ikiningi Betuele lenge.
25 Kamele palipenge pandapi, nee napengepi, dupa singi. Dee endakali palipenge panda singiakana” lea.
26 Dopa lateamopa, kalai akali dokome luma lakapala, langalu yuunya soo, Kamongo mambo pyao,
27 “Kamongo, nambanya akali andake Abrakamenya Gote dokome, wamba Abrakame-kisa pii yaki piino doko masetala, nambanya akali andake doko auu pisoo, namba lanyoo baanya tata etete dokonya epene-lamo dokonya, yaka pilinona” lea.
28 Dokopa, wanaku mapukae doko alo pyao, endangi petenge dokonya pupala, peteamino dupa pitaka piamo dupa lamaiya.
29-30 Lamaitiamopa, Rebeka pimalenge Labaneme leamo dupa soo, lyamunginya golo riŋipi, kinginya golo kitambupi, dupa kandatala, baa alo pyao endaki pete tombapae dokonya kanja pea. Pao kalai akali doko kamele-pipa kateamo kandea.
31 Kandatala lao pituu, “Nyakama Kamongome auu pyoo laminao ipame-lamona, asa kamaka nakalyepale, andaka mona ipupa. Nambame nyakama palipengepi, kamele dupa palipengepi, panda depa latakalona” lea.
32 Dopa latala, Labaneme Abrakamenya kalai akalipi, kamelepi, dupa lanyoo andaka pupala, kamele maitanya mandeamino dupa nyoo andaka seteami. Dopa petala, kamele kateamino dosa neepi, tanupi, dupa setapala, Abrakamenya kalai akali dupa moko wasa pina lao, endaki kamuo maiyami.
33 Maitala nee nena lao maitiaminopa, kalai akali dokome dokaita lamaiyoo, “Tanga nee namana, nambame pii mende laa epo doko latatoalena” lea. Lateamopa, Labaneme, “Yakalumuna naima langi” lea.
34 Dokopa kalai akali dokome dokaita lamaiyoo, “Namba Abrakamenya kalai akali.
35 Kamongome nambanya akali andake doko minao, etete auu pisoo, sipisipipi, memepi, bulumakaopi, kamelepi, dongipi, silipa golopi, kalai enda akalipi, dupa maipumupa, baa yuunya akali andake joo kalyamo.
36 Nambanya akali andake dokonya etanenge Sara enda wambakesa wane ane mende mandeamo dokonya, baanya moeya maipenge dupa pitaka ikiningimi nyepenge.
37-38 Dopa pipenge dokonyana, baame namba langyoo pituu, 'Embame Kenane yuu dakenya tange enda mende lanyakamaiya naeyape. Namba mandeamo yuu dokonya pupala, nambanya takangenya tata dokonya enda mende, nambanya ikiningi dokonya lanyakamaipi. Nambanya pii nepala naeyatona lao, etete kyeto joo langi' lea.
39 Dopa leamopa, nambame nambanya akali andake doko tipa pyoo, 'Enda mende kandao nyepala, bona epena lamaitupa, daa latamo doko, aipa pitupe?' leo.
40 Dopa leopa, Abrakameme namba langyoo, 'Nambanya Kamongo watao minao paenge dokome emba nisoo, baanya enjele mende apata pupa latamopa, embanya kalai doko dii manjapomo. Dopa pitamopa, nambanya takangenya tata dokonya enda mende, Aisakenya lanyakamaiyapeno.
41 Namba tata katatami dokonya patatenopa, wanaku mende nandimana latamino, doko pii kyeto joo leleno, dokome emba-kisa tenge naipatana' lea.
42 “Namba ipao endaki pete tombapae dokonya pyakaetala loma soo pituu, 'Nambanya akali andake Abrakamenya Kamongo Gote, nambame kalai pyaa epo doko angi jina lape.
43 Wanaku mapukae mende endaki kamuala ipatamopa, penge dokonya endaki natoo dina latoo.
44 Dopa latopa, yakalumuna latala, endaki namba natale ditoo, dee kamele dokaita maiyakatoaka latamo doko, Kamongome nambanya akali andake dokonya ikininginya enda anali latae doko-lamo lao kandatoo' lao loma solo.
45 Dopa lao ene mona andaka loma soo etalanya pipupa, Rebekame penge latainya soo, ipao endaki kamupyanya, 'Wanaku epe, endaki mendalapo natoo dipoko' lalo.
46 Dopa latapupa, baame endaki kamuo soo ipupya doko yapa lao nyepala, namba langyoo, 'Emba endaki naa. Napatenopa, kamele dupa endaki maiyakatoaka' laamo. Dopa lapumupa, namba endaki nyoo nalo. Napapupa, kamele dupa endaki maiyakalamoaka.
47 Dopa pipyanya, nambame baa apinya wanengepe lapupa, baa Neo Milikapanya ikiningi Betuele wanengena laamo. Dopa lapyanya, baanya lyamunginya golo riŋipi, kingi dolaponya golo kitambupi, dupa pisakamaiyo.
48 Dopa petala, Kamongome nambanya akali andake, Abrakame tata dokonya enda mende baanya ikininginya lanyakamaiyale lao, kaita auu pyoo laminao ipamo dokonya, nambame mange lakanatala, Abrakamenya Kamongo Gote doko lao, mambo pyalo.
49 Dopana, nyakambame nambanya akali andake doko kondo kaeyapala, baanya pii doko yakinala naeyatambino kandao doko, namba tolao langyepa. Naimanya mana singili pyoo, wanaku dake nambanya akali andake dokonya ikininginya lanyoo pakamaitoo, dyepa. Daa-tamo doko, namba kaitini waka mende kutatoana” lea.
50 Dopa lateamopa, Labane Betuelepame yanu pyao, “Doko Kamongome pyome-lumuna, nalimbame dee aki lambanape?
51 Kamongome kaitini setalame-lumuna, embanya akali andakenya ikiningi dokonya wanaku Rebeka lanyakamaiyoo, paale” leambi.
52 Leambino sepala, Abrakamenya kalai akali dokome luma lakapala, langalu yuunya soo, Kamongo mambo pia.
53 Dopa petala kalai akali dokome golo silipapimi wasepae yongenya yati joo sepengepi, yonge peepi, mandeamo dupa nyoo Rebeka maiya. Dopaka pyoo, muni andake penge mendapu mandeamo dupa endangi pimalengepa maiyaka.
54 Maitala, Abrakamenya kalai akali dokonya endakali tole epeamino dupa-pipa nee endakipi neami. Napala kuka gii doko paleami.
Yongama sakatatala, kalai akali dokome dokaita lamaiyoo, “Nambanya akali andake Abrakame kalyamo dokonya patoo, nyakamame namba yakinalapa” lea.
55 Dopa leamopa, Rebekanya endangi pimalengepame pii yanu pyao, “Wanaku doko yuu gii 10-pela naima-pipa pitimana kaeya. Pitipala baa nyakama-pipa patamina” leambi.
56 Dopa lateambinopa, Abrakamenya kalai akali dokome dolapo lamaiyoo, “Namba kalai pyaa ipupu doko Kamongome auu petelyamona, patoo nyakambame minala naeyalapa” lea.
57 Dokopa, “Wanaku dokome aipa lelyape lao kandambana epena” leambi.
58 Dokopa baa ipateamopa, nyakambame tipa pyoo, “Emba akali dakepa patambipi?” leambinopa, wanaku dokome yanu pyao, “Namba patoana” lea.
59 Patoana leanya, Abrakamenya kalai akalipi, baanya tole epeamino dupa-pipa, Rebeka koosa pituu isingi enda doko-pipa, tole pena leambi.
60 Leambinopa, baanya palu dupame lamaiyoo, “Pakae, emba endakali tausene tausene dupanya endangi pititi. Embanya mandipaenya mandipae dupame nyakamanya yandapipili dupa pyao ita minaowaka katatamina” lao, Rebeka pii kyeto epe dupa lamaiyami.
61 Lamaitiaminopa, Abrakamenya kalai akali dokome baanya tole epeamino dupapi, Rebekapi, baanya kalai endapi, dupa lanyoo, kamele maitanya pituu paanya peami.
62 Wamba Aisake baa yuu Bilaro katea doko yakinatala, Negepe yuu dokonya ipao katea.
63 Dokonya katao, alemandi mendenya Aisake pau yuu mendenya paeyao kandeamopa, kamele mendapu epeami.
64 Rebekame Aisake epeamo kandatala, kamele maita dokonya pituu isa pyakanea.
65 Pyakanatala, Abrakamenya kalai akali doko tipa pyoo, “Akali laeyao epelyamo omo apipi?” lea. Dopa leamopa, kalai akali dokome yanu pyao, “Baa nambanya akali andake dokona” lea. Dokopa Rebeka aiyombanya yaki pingi lapalapa doko nyepala, baanya lengelyapi yame pia.
66 Dopa piamopa, kalai akali dokome pupala, baame piamo dupa pitaka Aisake lamaiya.
67 Lamaitiamopa, Aisakeme Rebeka baanya enda joo lanyepala, baanya endanginya moeya anda dokonya lanyoo pea. Patala Rebeka baa endanginya panda nyoo peteamopa, baa mona yaepao katao, baanya enda doko auu kaeyao katea.