15
Waene Itange Doko Nambana Leamo Doko
1 Jisasame lao pituu, “Waene itange angi doko namba. Waene ee pokenge doko nambanya Takange doko.
2 Namba-kisa katao dii namandenge wangya dupa baame kepao nepata, dii mandenge wangya dupa auu pyoo dii longo mandena lao waseta pingi.
3 Nambame pii langipu dupame nyakama wasoo auu pisetelyamo.
4 Itange-kisa nakatenge wangya dupame dii namandengema. Dopaka pyoo, nyakama nambanya mona andaka nakatatamino doko, nyakamame dii namanditamiaka. Dopana, nyakama nambanya mona andaka kalyepape. Dokopa namba nyakamanya mona andaka katato.
5 Waene itange doko namba. Wangya dupa nyakama. Nyakama nambanya mona andaka nakatatamino doko, nyakamame kapa pao mende napitami. Tenge dokonya, endakali mende nambanya mona andaka katatamo doko, namba baanya mona andaka katatopa, baame dii longo mandita.
6 Endakali mende namba-kisa nakatatamo doko, wangya kepao nepatae dupa sapuingili pyoo, baa saputa. Wangya sapupae dupa nyoo kambu pyatala itatenya tena lao yangengeli pyoo baa yangata.
7 Nyakama nambanya mona andaka katatamino doko, nambanya pii dupa nyakamanya mona andaka seta. Dokopa nyakamanya mende pyekena lao Gote tee lataminopa baame latamiliaka pyakata.
8 Nyakama dii longo mandyoo nambanya disaipolo katataminopa, nambanya Takange doko kenge andake nyeta.
9 Nambanya Takange dokome namba auu kaengeli pyoo, nambame nyakama auu kaelyo. Dopana, nyakama nambanya auu kaenge dokonya kalyepape.
10 Nambanya Takangenya mana setapae dupa wata-minao, baanya auu kaenge dokonya namba katenge. Dopa pingina, nyakamame nambanya mana setapae dupa wata-minao katatamino doko, nyakama nambanya auu kaenge dokonya katatami.
11 Nambanya auu kaenge doko nyakama-kisa setamopa, nyakama etete eteke pyao kalyepale lao pii dutupa langilyo.
12 “Nambanya mana setelyo doko dake: Nambame nyakama auu kaelyoli pyoo nyakama-lapo mende auu kae-kae pyoo kalyepape.
13 Endakali mendeme baanya kaita miningi dupa auu kaeyapala, dupanya panda nyoo baa kumilyamo dokome, auu kaenge mana waka dupa pitaka ita miningi.
14 Dopana, nyakamame pyepale lao nambame mana setelyo dupa pitaka pyoo katatamino doko, nyakama nambanya kaita miningi katatami.
15 Akali andake mendeme kalai pilya dupa baanya kalai akali dokome kanja naenge. Dopaka doko, nambanya Takangeme namba pii langiamopa sio dupa pitaka panao nyakama langitio. Dopa pio dokonya, indupa nyakama nambanya kalai akali kalyaminona nalelyo. Nyakama nambanya kaita miningi kalyaminona lelyo.
16 Nyakamame namba yapao nanyiami. Nyakama pupala dii koeyala naenge dupa manditaminopa lao nambame nyakama yapao nyepala makande leo. Takange doko-kisa nambanya kenge dokonya dopale mende nyakamame tee latami doko baame ditamopa lao nambame nyakama makande leo.
17 Dopana, nyakama-lapo mende auu kae-kae pyoo kalyepale lao nambame mana datupa setelyona” lea.
Endakali Dupame Disaipolo Dupa Imbu Kaeyatamina Leamo Doko
18 “Isa yuu dakenya endakali dupame nyakama imbu kaeyami-kandeno dokopa, dupame wamba namba imbu kaeyamiakana lao nyakamame masalapape.
19 Nyakama isa yuu dakenya endakali-pyali doko, isa yuu dakenya endakali dupame nyakamanya tata-lamona lao masetala nyakama auu kaeyamili. Dopaka doko, nyakama isa yuu dakenya endakali daa. Nambame nyakama isa yuu dakenya-tae yapao nyio dokonyana, isa yuu dakenya endakali dupame nyakama imbu kaengema.
20 ‘Kalai akali mendeme baanya akali andake doko ita naminingina’ lao nambame nyakama langyo doko nyakamame masalapape. Namba tanda dyoo koeyasingima endakali dupame nyakama apata tanda dyoo koeyasetamiaka. Nambanya pii dupa wata-miningima endakali dupame nyakamanya pii dupa apata wata-minatamiaka.
21 Dopaka doko, namba puu lea Akali doko dokaitame nakandengema dokonyana, nyakama namba tata-lamo lao kandatala, nyakama-kisa mana koo dopale dupa minatami.
22 Namba ipupala dokaita pii lamaiya naeyoli doko, dokaita-kisa koo mende nasipyali. Dopaka doko, dokaitame masala naeyao koo piamana latamino doko kapa napata.
23 Namba imbu kaengema endakali dupame nambanya Takange doko apata imbuaka kaengema.
24 Endakali waka mendeme kalai kapa napipenge dupa nambame dokaitanya kainanya napioli doko, dokaita-kisa koo mende nasipyali. Dopaka doko, indupa dokaitame mirakolo dupa kandatala, nambapa, nambanya Takangepa, nalimba imbu kaelyamino.
25 ‘Namba-kisa tenge mende nasiamopa, mee imbu kaeyamina’ lao dokaitanya loo dupanya pepa pyapae singi doko angi jina lao nalimba imbu kaelyamino.
26 “Nyakama nisepenge, kiningi pii lenge, Takange-kisa katao pyakalyingi Spirita doko, Takange-kisa katao epena latopa ipupala, namba akali dokona lao, lao panata.
27 Nambame kalai tee pyao pio gii dokonya pituu, indupa tuu lao, nyakama namba-pipa kalyamano. Tenge dokonya, namba akali dokona lao nyakamame lao panatamiakana” Jisasame lea.