17
Jisasa Waka Jiamo Doko
+Yuu gii tokange pateamopa, Jisasame Pitapi, Jemesapi, Jemesa kaiminingi Jonepi, dutupa iki laminao, yuu manda ketae mendenya lalyoo pea. Pupala kateaminopa, dutupanya enombanya Jisasa baa waka jia. Baanya lenge-lyaapi doko tii pyoo niki tele pia. Baanya yonge pee dupa kyeo lea doko tii pipae jia. Dokopa Mosesapa, Ilaijapa dolapo baa-pipa pii lao kalyu piambinopa kandeami. Kandatala Pitame Jisasa lamaiyoo, “Kamongo, naima dakenya katamanopa auu pilyamona, embame yakana lao maseteno doko, naimame dakenya sele anda tepoma pimana. Mende embanya, mende Mosesanya, mende Ilaijanyana” lea. +Dopa lao kateamopa, kopa tii pipae mende ipupala dutupa sanga pia. Dokopa pii mende kopa tambetambe epea dokome lao pituu, “Dake nambanya Ikiningi mona setenge, nambame etete auu kaenge dokona, nyakamame baanya pii doko sakamaiyepape” lea. Dokopa disaipolo dutupame pii doko sepala, etete paka kaeyapala tombauli siami. Dopa piaminopa, Jisasa ipao dutupa watandatala lao pituu, “Nyakama paka nakaenya sakatalapa” lea. Dopa leamopa dutupame kandalyiaminopa, endakali waka mende nakatea. Jisasa baa iki kateamo kandeami.
Yuu manda doko yakinatala lanao ipao pituu, Jisasame dutupa kyeto joo lamaiyoo, “Nyakamame kanjamino doko, Akalinya Ikiningi doko kumapala sakatatatamopa, endakali dupa lamaitamina, indupa endakali mende lamaiya naeyalapape” lea. 10  +Dokopa baanya disaipolo dutupame baa tipa pyoo, “Dopa-tamo doko, Mosesanya loo mana nyepae dupame aipuma Ilaija wambao ipupengena lengemape?” leami. 11 Dopa leaminopa Jisasame dutupanya pii yanu pyakamaiyoo, “Kiningi, Ilaija wambao ipupenge. Ipupala baame dupa pitaka tolaseta. 12  +Dopaka doko, Ilaija ipateana lao nambame nyakama langilyo. Baa ipupala kateamopa endakali dupame kandao nanyepala, dokaitanya masiaminoli pyoo baa tanda maiyami. Akalinya Ikiningi doko dopaka pyoo tanda maitamina” lea. 13 Dopa leamopa, Jone kaimbu pingi doko lao lelyamona lao disaipolo dupame masiami.
Wane Imambu Koo Paleta Mende Nisiamo Doko
14  +Dutupa endakali kambu pyao kateami dokonya ipateaminopa, akali mende Jisasa katea dokonya ipao luma lakapala 15 baa lamaiyoo, “Kamongo, nambanya wane dake mandipaeme nyilyamosa, baa tanda longo nao katenge. Paa longosa baa itatenya tapa, endakinya mangata pingina, embame baa kondo kaeyakapoko. 16 Nambame baa laminao embanya disaipolo dupa katami dokonya ipupupa, dupame baa kapa pao auu pisala naeyalaminona” lea. 17 Dopa leamopa Jisasame yanu pyao, “Nyakama mana epe minala naeyao, Gote tungi pyala naeyaowaka pingima dupa, namba nyakama-pipa katao pao gii andukupa yakinato? Nyakama nongo pilyamino doko andukupa tolataminopa lao nambame malisoo katao? Wane doko laminao asa ipupa” lea. 18 Laminao ipateaminopa, Jisasame imambu koo doko pyalanya latala, wane doko yakinatala pena leamopa pea. Dopa lea gii dokopaka, wane doko auu pia. 19 Maitakao Jisasa iki peteamopa, disaipolo dupa ipupala baa lamaiyoo, “Aipuma naimame imambu koo doko kapa pao watao pyala naeyalamape?” leami. 20  +Dopa leaminopa Jisasame dokaita lamaiyoo, “Nyakamame Gote tungi napilyamino dokonya, imambu koo doko kapa pao watao pyala naeyalamino. Nambame nyakama kiningi langilyo: Nyakamanya Gote tungi pingi doko yakane masete dii dopalepi mende-pyali doko, nyakamame yuu manda dake lamaiyoo, ‘Emba asa pituu omosa puu’ laminopa, lamiliaka pipyali. Dokopa nyakamame dopale mende pyaanya kokala naeyamili. 21  Dopaka doko, loma soo nee nanao katenge mana dokonya-kaita iki imambu koo dopale dupa watao pingina” lea.
Jisasame Baa Kumatapa Sakatatapa Dolaponya Lapo Pyoo Leamo Doko
22  +Jisasa baanya disaipolo dupa-pipa Galali paeyao pituu baame dokaita lamaiyoo, “Akalinya Ikiningi doko akali dupanya kinginya maiyanya pilyamo. 23  Maitatamopa dupame baa pyao kumasetami. Kumasetataminopa yuu gii tepo dokonya, Goteme baa sakatasetana” lea. Dopa leamo doko sepala, disaipolo dupa mona etete kenda kaeyami.
Lotuu Anda Nee Nyetae Dokonya Takisa Maiyamo Doko
24  +Dokaita Kapename peaminopa, lotuu anda nee nyetae dokonya takisa nyingi dupa ipupala Pita lamaiyoo, “Nyakamanya mana lenge dokome lotuu anda nee nyetae dokonya takisa doko maingipi?” leami. 25 Dopa leaminopa Pitame yanu pyao, “Maingina” lea. Dopa latala, baa andaka kolandatala pii mende latala naeyamopa, Jisasame baa lamaiyoo, “Saimone, embame aipa lao masilyi? Yuu dakenya kiŋi dupame nyakamanya ikiningi dupa-kisa takisa nyingimape, pande endakali waka dupa-kisa takisa nyingimape?” lea. 26 Dokopa Pitame baa lamaiyoo, “Endakali waka dupa-kisa takisa nyingimana” lea. Dopa leamopa Jisasame baa lamaiyoo, “Dopa-tamo doko, kiŋi dupame nyakamanya ikiningi dupa-kisa takisa nanyingima. 27  Dopaka doko, naimame akali dokaita kenda pisala naeyamana, emba endaki pete dokonya pupala, uku mende pyandape. Dokopa pisa wambao nyalapeno dokonya nenge-kaita angapu lakepala, muni konde mende palyamona nyepe. Nyepala, dokome lotuu anda nee nyetae dokonya nalimbanya takisa doko maipi” lea.
+ 17:1 Make 9:2-8; Luku 9:28-36; 2 Pita 1:17-18 + 17:5 Jen 22:2; Diut 18:15; Sam 2:7; Ais 42:1; Matyu 3:17; 12:18; Make 1:11; Luku 3:22 + 17:10 Mal 4:5 + 17:12 Matyu 11:14 + 17:14 Make 9:14-29; Luku 9:37-43a + 17:20 Matyu 21:21; Make 11:23; 1 Kor 13:2 + 17:22 Make 9:30-32; Luku 9:43b-45 + 17:24 Eks 30:13; 38:26