2
Jesosaja huoojeaꞌyo esohui huohuijji Jenosanenajo baꞌe cuana Pabo nijje jjapeequinaje
1 Majoya quijje nei nei, 14 shequiajame po majje eya Benabe nijje poe oꞌoyanaje Jenasanena huasijje. Tito yenaje peaꞌai enijje.
2 Eyacuiñajjiya huoojea cajje eya Jenosanena huasijje poe oꞌoyanaje. Eꞌe, eya jjacahuiba meequi canaje jama baꞌa: —Pabo, ¡Jenosanena huasijje poquiꞌyocue! —acanaje Eyacuiñajjiya eya cahuijo.
Jamajjeya Jenosanena huasijje poeꞌyo majje eya Jesosaja huoojeaꞌyo ojaya epeejji jaahuanajji cuana nijje miminaje, pea cuana nijje pojjeama. Jjachichaquiajo, eyaya huohuinaje jama baꞌa: —Esohui quea pame nee Jesosaja eyaya huohuinaje Jodio pojjeama cuana huasijje —eyaya anaje.
Jamaya ecuea huohui jjima ona que. Jodio pojjeama cuana huasijje esohui huohui pajea mee ca chanaꞌ, jama huoojeame eya aca chanaꞌ cuaa baꞌa: —¡Aꞌa jja oe Jodio pojjeama huasijje esohui huohui majajji Jesosaja esohui! —jamaya quea pame pojjeama poso aca chanaꞌ cuaa.
3 Jamajjeya e shajjaꞌajja majje Jesosaja epeejji jaahuanajji cuana quea bihui nee poanaje: —Eꞌe, ¡jamaya acue! —poanaje.
Eꞌe, ohuaya Tito enijje poeꞌ ba canaje Jodio pojjeama; Jieno dejja ca ca oya, Tito. Jamajjeya Jodio etiiquianaja esohui jayojja jama ajjima, cuiishasha jehuisejjajea jjima. Jamatii Tito ecuanaja etiiquianaja esohui jayojja jama amee jjima, cuiishasha jehuisejjajea mee jjima Jesosaja epeejji jaahuanajji cuanaja. Jamajjeya jjeya Jesosaja epeejji cuanaja cuiishasha jehuisejjajea jjima.
4 Beca cuana ca ca jamatii iyaa jjima dobiquinaje ecuanaja esohui shajjaꞌajjaa, ecuana mimicuiajeanobiajeaa. Oya cuana aje oe siajje poanaje: —Ecuana peaꞌai Jesosa Quitoja epeejji —oya poanaje. Siajje po majje ecuana tecueajea canaje jama baꞌa: —Tito aje oe Jieno, esejaya etiiquianaja esohui jayojja jama ajjima; cuiishasha jehuisejjajea jjima. ¡Oya oe jamaya ameecue! ¿Apiojji acuae etiiquianaja esohui jama apajea meeaña? Jesosa nijje jjapeequi majje jamatii Moisesija esohui jayojja jama cabaꞌyahua —jamaya oya cuana mimijajinaje ecuana nijje.
Chojja. Jesosa nijje jjapeequi majje eseya etiiquianaja esohui jayojja jama epoꞌyojji pojjeama. Jamatii ma dejja cuaa ecuanaya yahuajo jama baꞌe mee sa acani.
5 Chojja de, ma dejja cuanaja esohui shajjaꞌajja jjima ecuanajaya. Ojaya esohui jama huohui ajja nei nei. Jamaya huohuime ya jojjemo miquiana ma Jodio pojjeama cuana dasiaꞌyome. Ecuaaya ca ca yahuajo jama huohui tiitiiaña esohui quea pame nee Jesosajo miquianaya onijje ejjapeequi meesahuaꞌyojji tii tii.
6 Jamajjeya Jesosaja huoojeaꞌyo ojaya esohui huohuijji etii Jenosanenajo baꞌe enijje jama mimime poanaje baꞌa: —Eꞌe, ¡yahuajo jama esohui quea pame nee Jesosajo huohuiquicue Jodio pojjeama cuana huasijje! ¡Aꞌa huohui pajeaꞌyojji! —poanaje.
Eꞌe, pea esohui ecuea ba jjima onajaya huohui jjima. Ma esohui ecuea eba poanaje, ecuea eyacua pojjeama. Ojjaña Jesosaja epeejji cuaa shajjaꞌajja neinei cani. Jamatii eya Eyacuiñajjija huoojeaꞌyo, onajaya pojjeama. Jamajjeya Eyacuiñajjija eba ecuea ejjashahuabaquijji. Eyaya quea jaꞌa nee nee esohui huohuiaña ojaya eba. O quea bihui po mee sa iña poani, dejja cuana pojjeama.
7 Jamajjeya ma dejja etii cuaa eya pea esohui huohui mee jjima. Chojja, huohui canaje jama baꞌa: —Eꞌe, jamajjeya Eyacuiñajjiya Pabo huoojea canaje Jodio pojjeama huasijje esohui quea pame Jesosajo huohuiya. Peno ca ca ohuaya huoojea canaje Jodio cuana huasijje esohui huohuiya —acanaje Jesosaja epeejji etii cuaa.
8 Eꞌe, jamaya poanaje. Ma dejja etii cuaa ba canaje Eyacuiñajjiya Peno sohuihuohui sahua canaje Jodio cuana huasijje. Oya jayojjaya ohuaya eya sohuihuohui sahua canaje Jodio pojjeama huasijje. Eꞌe, Peno, eya peaꞌai Jesosaja huoojeaꞌyo esohui huohuijji.
9 Jamajjeya ma dejja etii cuaa, Jesosaja epeejji jaahuanajjiya, Penohua, Satiacohua, Huaniya peaꞌai eya jama acanaje baꞌa: —Pabo, ecuanaja eba eꞌe jojo nei miya Eyacuiñajjija huoojeaꞌyo Jodio pojjeama huasijje ojaya esohui huohuiya —acanaje.
Jamajjeya ojee quea bihui nee jama poanaje baꞌa: —Pabo, ¡miyaya Benabe nijjeya esohui quea pame nee, Jesosaja esohui huohuiquicue Jodio pojjeama cuana huasijje! Ecuaaya ca ca Jodio cuana huasijje esohui huohuije —poanaje.
10 Ecuana huohui canaje jama peaꞌai baꞌa: —Eꞌe, ¡jamajjeya Jesosaja epeejji aemaꞌ aꞌa pajeaꞌyojji! ¡Bejjo oe pojji huoojeacue aemaꞌ nei neija o baꞌe meesahuajji! —acanaje.
Ma esohui shajjaꞌajja majje eya quea bihui nee poanaje. Eya peaꞌai aema huasijje bejjo huoojea sa poani nei nei.
Peno Atioquia cuiñajji yasijje poquiyajo Pabohua oya tecuea canaje
11 Majoya Jesosaja epeejji jaahuanajji nijje mimi majje eya: —Poquia iña —poanaje. Majoya ecuana poquiꞌyonaje Atioquia cuiñajji quea quemo huasijje, quea huesha nee. Jomajo quea huiso Jodio pojjeama cuana baꞌyani. Quijje Peno ecuana que poeyanaje Atioquia huasijje. Jomajo ani pishana majje Peno quea jaꞌa pojjeama poanaje. Jamajjeya eyaya oya tecueanaje ojjañaja ebajji.
12 Jama poanaje baꞌa: Poe coo majje Peno quea pame nee ijjiaꞌijjianaje ojjaña Jesosaja epeejji cuana nijje, Jodio pojjeama cuana nijje, jamatii Jodio etiiquianaja esohui jama ajjima cuanaja; cuiishasha jehuisejjajea jjima. Majoya quijje pishana beca Jodio dejja cuana poeyanaje, Satiacoja huoojeaꞌyo. Ma Jodio cuana poeyajo, Peno aje oe quea pame poꞌyo ajja. Ani sa poꞌyo ajja Jodio pojjeama cuana nijje. Jodio pojjeama cuana nijje ijjiaꞌijjiaꞌyo ajja poanaje Jodio cuanajo quea mete jjejojo. Jodio cuana quea quene po mee sa poꞌyo ajja poa, ma jama poani baꞌa: —Jodio pojjeamaa aje oe Jodio etiiquianaja esohui jayojja jama caꞌa cahua, cuiishasha cajehuisejjajea cahua de, jamatii Jesosaja epeejji cuana peaꞌai —beca Jodio cuaa acani.
13 Jamajjeya Peno Jodio pojjeama cuana nijje ijjiaꞌijjiaꞌyo ajja ba majje pea Jodio cuana peaꞌai aje oe Jodio pojjeama cuana nijje ijjiaꞌijjiaꞌyo ajja poanaje. Eꞌe, yahuajo oya cuana jama poanaje baꞌa: —Eyacuiñajjiya ecuana baꞌe tiitii mee cajeꞌyo eyajo Jesosa nijje jjapeequianijo, etiiquianaja esohui jama añajo pojjeama —acanaje cuaa yahuajo.
Jamatii aje oe Jesosaja epeejji Jodio cuana Jesosaja epeejji Jodio pojjeama cuana nijje ijjiaꞌijjiaꞌyo ajja poanaje. Ma ba majje Benabe peaꞌai jamaya quea jaꞌa pojjeama poanaje, jamatii yahuajo Eyacuiñajjiya oya huoojea canaje Jodio pojjeama cuana huasijje.
14 Jamajjeya ma ba majje eya jjashahuabaquinaje jama baꞌa: —Quea jaꞌa pojjeama ohuaya acani, esohui quea pame nee Jesosaja jayojja jama ajjima acani.
Jamajjeya eyaya Peno tecueanaje ojjañaja eshajjaꞌajjajji. Jama anaje baꞌa: —Peno, miya Jodio dejja. Mique chii, miquea enaese peaꞌai Jodio. Jamatii Jodio cuana jama baꞌe pajeaꞌyonaje. Eꞌe, Jodio pojjeama cuana nijje aninaje, ona nijje ijjiaꞌijjia aninaje. Jamajjeya ¿apiojji acuae jjeya miyaya Jodio pojjeama baꞌe mee sa aña Jodio etiiquianaja esohui jama? Jamaya miyaya quea jaꞌa pojjeama aña, Peno —eyaya Peno jamaya anaje.
Jesosa nijje jjapeequianijo, Eyacuiñajjiya Jodio cuana, Jodio pojjeama cuana peaꞌai baꞌe tiitii mee cajeꞌyo.
15 Majoya eya Peno nijje, pea Jodio cuana nijje peaꞌai jama poanaje baꞌa: —Ecue chii aje jja Jodio peaꞌai, miquianajaya aje jja Jodio peaꞌaiya. Jamajjeya jama poani Jodio pojjeama cuanajo baꞌa: “Ecuanaya Jodio dejja; joya ecua Jodio pojjeama cuana jama po ajja. Oya cuana aje oe quea mimishi nee nee poani tii, ecuanajaya etiiquianaja esohui jayojja jama baꞌe ajja” jamaya poani Jodio cuana quea quehua jjashahuabaquianijo —eyaya anaje—.
16 Jjeya ecuanaya Jesosa nijje jjapeequiani. Jamajjeya ecuanaja eba eꞌe jojo nei Jesosa Quito nijje jjapeequianijo ca ca oe Eyacuiñajjiya eseya ba cani mimishiꞌamaꞌyo, etiiquiana Moisesija esohui jama baꞌe nishoanijo pojjeama. Jamajjeya eseya Jesosa Quito nijje jjapeequiani mimishi ecuijea meeꞌyojji. Jamaya eseya jjashahuabaquiani baꞌa: —Eꞌe jojo nei Eyacuiñajjiya ecuana ba cani emimishi cuijeaꞌyo Jesosa nijje jjapeequianijo, etiiquiana Moisesija esohui jama baꞌyanijo pojjeama. Jamajjeya Moisesija esohui jama añajo pojjeama Eyacuiñajjiya eseya ba caje mimishiꞌamaꞌyo.
17 Eya Peno nijje, pea Jodio cuana nijje jama poanaje peaꞌai baꞌa: —Eꞌe, esejaya eba eꞌe jojo nei Jesosa nijje jjapeequianijo ca ca oe Eyacuiñajjiya eseya ba cani emimishi cuijeaꞌyo, jamatii Moisesija esohui jayojja jama baꞌe ajja. Jamajjeya eseya Jodio pojjeama jayojja poani. ¿Aꞌa jamajjeya Jesosa Quitoja quea jea nee mimishi poanijo? Chojja, jamaya pojjeama. Mimishi Jesosa Quitoja botiꞌama. Mimishi po meeꞌyo ajja nei nei oya.
18 Eꞌe, eyaya huohui huichaꞌa huichaꞌanaje Moisesija esohui jama cabaꞌe pajeaꞌyahua. Ojaya esohui jama baꞌe nishoanijo ca ca Eyacuiñajjiya eseya mimishiꞌamaꞌyo ebajji pojjeama. Jamajjeya eyaya jjeya jama ehuohuiꞌyo jojjemo baꞌa: —¡Moisesija esohui jayojja jama acue! Jamajjeya Eyacuiñajjiya miquianaya ba caje emimishi cuijeaꞌyo —eꞌa jojjemo eyaya Eyacuiñajji quea quene po meeꞌyome, miquiana dasiajji po meeꞌyome peaꞌai.
Eꞌe, jiquio ecua equi cajjaꞌyo majje oya tii iya oꞌoyaña jayojja jama eyaya aꞌyome, ca Moisesija esohui ehuohui oꞌoya jojjemo.
19 Moisesija esohui ba neinei majje eya jjabahuejjaquinaje ma esohui jayojja jama quea camaja nee nee ebaꞌejji. Ameemee ajja, de. Jamajjeya ecuea eba eꞌe jojo nei Jesosa nijje jjapeequianijo ca ca oe Eyacuiñajjiya eya ba caje emimishi cuijeaꞌyo.
Jiquio ecua emanoꞌyo cuana esohui jama ebaꞌe majajji pojjeama jayojja eya Jesosa nijje jjapeequi majje Moisesija esohui jama ebaꞌe majajji pojjeama. Eyacuiñajjija ejjashahuabaquijji quea jaꞌa nee jayojja jama ca ca iña baꞌeje.
20 Eꞌe, eya Jesosa Quitoja quea jea nee neejo oya acui ecueataꞌapeejo manoꞌyonaje ejo, ecue mimishi cuijeaꞌyojji, eya onijje ebaꞌe tiitii meeꞌyojji. Jamajjeya onijje jjapeequi majje eya yahuajo jama quea mimishi ebaꞌe majajji pojjeama. Pea jjashahuabaquiꞌyome ecuea poani. Jjeya ca ca Eyacuiñajjija Bacua Ejja Jesosa Quitohua enijje nequiya eya ojaya ejjashahuabaquijji jayojja jama baꞌe meesahua cani. Eꞌe, eseya ojaya quea jea nee neejo Eyacuiñajjiya oja Bacua Ejja huoojea canaje eseja mimishi cuijeaꞌyohua.
21 Jamajjeya eya onijje jjapee tiitiiquijeꞌyo. ¿Aꞌa Moisesija esohui jayojja jama poanijo, Eyacuiñajjiya eseya ba caje mimishiꞌamaꞌyo? Chojja. Ohuaya eseya ba cajeꞌyo mimishiꞌamaꞌyo Moisesija esohui jayojja jama baꞌyani jojjemo Jesosa Quito manoꞌyonaje emanojeaꞌyojji, manojeaꞌyo quiaye.