6
Jesosa shajjaꞌajjajji cuaa anoso sejja ca cua ejomishocajji pojjajo
(Mateo 12.1-8; Macoso 2.23-28)
1 Oe ejomishocajji pojjajo Jesosa o shajjaꞌajjajji cuana nijje poquia cua anoso ai nequi yiyesamajje. O shajjaꞌajjajji cuaa emeya sejja ca cua anoso eshe tii eꞌijjiajji quea shoeya jjejojo.
2 Majoya Paniseo cuaa Jesosa o shajjaꞌajjajji cuana ba ca cua. Jesosa nijje mimijajinaje jama baꞌa: —¿Yajjajo acuaeya epojja ejomishocajjijo anoso sejja mee yaña soꞌo? Moisesija etehueꞌyo jamaya cuani baꞌa: “¡Aꞌa chacojji ejomishocajji pojjajo!”
3 Jesosaa jama aca cua baꞌa: —Miya quea sohui tai cuanaje; Eyacuiñajjija esohui nei pojjeama aña miquianaaya. Miquianaya jjashahuaba taiquiani, de. ¿Aꞌa miquea ba jjima pojjaꞌa ma etiiquiana, emeshi mese Dabi bajjani? Jama etehueꞌyo yani Dabijo baꞌa: Oya Eyacuiñajjija epeejji nei. Oe pojjajo oya oja epeejji cuana nijje poquije,
4 dobiquinana cua Eyacuiñajjija equi yasijje bobi saꞌajjaa quea shoe nee neejojo. Ma equijo ani pahui ijjia caꞌyonaje; quia caꞌyonaje ojaya epeejji cuana huasijje peaꞌai. Eyacuiñajjija etehueꞌyo jama cuani baꞌa: “Jiquio pahui Eyacuiñajji nijje mimianija eꞌijjiajjime”. Jamatii Dabi ca mimishiꞌama cuanaje. Oya poquianinaje Eyacuiñajjijo chacochaco neineiya. Jamaya aca cua Dabiya.
5 Ecuana Dabi jayojja cuani. Eya Eyacuiñajjijo chacochaco neineiani. Jamajjeya ecuaaya jiquio anoso ai sejjaña ejomishocajji pojjajo —Jesosa cua.
Oe dejja meshahuamaꞌyo epo Jesosaa jjameshahuanequi mee caꞌya cua
(Mateo 12.9-14; Macoso 3.1-6)
6 Pea ejomishocajji pojjajo Jesosa poquia cua Jodioja equi ejjachichaquijji yasijje esohui huohuiya. Oe dejja meshahuamaꞌyo epo ania cua jomajo.
7 Paniseo dejja cuana, Moisesija etehueꞌyo huohuijji cuana jjashahuaba taiquia cua Jesosajo jama baꞌa: —Jesosa shajjamaꞌ jayojja ecuanaja esohuijo cuani. Ohuaya chaco caje ejomishicajji pojjajo pojjaꞌa; jjameshahuanequi mee cajeꞌyo dejja meshahuamaꞌyo epo. Jesosa jamaya shajjamaꞌ cuajo ecuaaya oya iñajeꞌyo edojojji ejeadobiajeajji.
8 Jesosaja onajaya ejjashahuaba taiquijji eba cua. Jamajjeya ohuaya ma dejja meshahuamaꞌyo epo ani huohui ca cua jama baꞌa: —Meshahuamaꞌyo epo, ¡nequisohuacue ojjañaja ebajji! —Jesosaa aca cua.
Jamajjeya oya nequisohua cua.
9 Jesosaa huohui ca cua pea cuana jama baꞌa: —Eyaya miquianaya huohuiꞌajjaje: ¿Ache quea bame epojji ejomishocajji pojjajo? Quea bame mi baꞌe mee cajji chi. Quea tai mi baꞌe mee cajji chi. Baꞌe mee cajji mi chi. Quecua caꞌyojji mi chi.
10 Jamajjeya ohuaya pea cuana huasijje ba majje ma dejja huohui ca cua jama baꞌa: —¡Eme jeapisaꞌajjaꞌyosocue!
Majoya eme jeapisa caꞌya cua.
11 Beca cuana quea quene nee nee cua. Jama mimimimia cua baꞌa: —Jesosa shajjamaꞌ nei nei cuani ecue esohuijo. Ohuaya jjameshahuanequi mee caꞌyonaje ejomishocajji pojjajo. ¿Yajja acuae seya Jesosa aje jjeyahua nei eꞌiñajji? —jamaya cua Jodio dejja cuana Jesosa iñajji nisho.
Jesosaa chicha ca cua o shajjaꞌajjajji cuana 12 huisome
(Mateo 10.1-4; Macoso 3.13-19)
12 Oe pojjajo Jesosa poquia cua eyiyo quibo huasijje mimiya Eyacuiñajji nijje. Ojjaña mecajje mimia cua onijje.
13 Eshequi jaasohuanijo, jjachichaquia cua o shajjaꞌajjajji cuana nijje.
14 Oya cuana yohua bajjani cua baꞌa: Simohui, quijje Jesosaa oya pea bajjani Peno acaꞌya cua; Simohuija chahua yohua bajjani baꞌa: Anesi; pea o shajjaꞌajjajji ca yohua bajjani cua baꞌa: Jacobo, Huani, Penipe, Manotonome,
15 Mateo, Tomasi, Apeoja bacua bajjani Satiaco; Simoni, ojaya meshi quea boti nee nee cua,
16 Jacoboja bacua Jode bajjani. Pea dejja yohua bajjani cua baꞌa: Jodasa Isicaniote, oya Jesosaja epeejji nisho cua. Mahuiso o shajjaꞌajjajji cuana eꞌe jojo nei cua.
Jesosaa quea dejja huiso huasijje Eyacuiñajjija esohui huohui ca cua
(Mateo 4.23-25)
17 Majoya Jesosa o shajjaꞌajjajji cuana nijje eyiyojo ani jaaoque oꞌoya cua. Jaaoque majje nequiꞌya cua meshi bame bamejo esohui huohuiya. Quea huiso Jesosaja pea e shajjaꞌajjajji cuana jomajo ania cua. Quea dejja huiso cueya cua, Jodea meshijo baꞌe cuana, Jenosanenajo baꞌe cuana, Tinojo baꞌe cuana, Sinonojo baꞌe cuana peaꞌai. Quea huesha baꞌe cuana cueya cua Jesosa shajjaꞌajjaa.
18 Ojjañaa shajjaꞌajjaꞌyo sa aca cua, jjaajaquiꞌyo sa cua peaꞌai. Pea cuanajo nequi eshahua cuayaqui mee caꞌya cua Jesosaa.
19 Ojjañaa Jesosa napa sa aca cua pea jjaajaqui meeꞌyojjijojo. Jesosaa emeya napa cajje jjaajaqui caꞌyonaje cuana.
Jesosaja esohuiya dejja cuana quea bihui po mee caje beca cuana ca quea yeno po mee caje
(Mateo 5.1-12)
20 Majoya Jesosaa ba majje o shajjaꞌajjajji cuana huohui ca cua jama baꞌa: —Beca cuana jjashahuabaquiani jama baꞌa: “Eꞌe de, eya quea mimishi nee. Eyacuiñajjiya ecuea mimishi cacuijea caꞌyahua”. Jamaya jjashahuabaquianijo Eyacuiñajjiya oya baꞌe tiitii mee cajeꞌyo onijje eyajo. ¡Oya cuana quea bihui nee capoꞌyahua!
21 —Ojaya epeejji cuana Eyacuiñajjija esohui jayojja jama a sa neinei cuanijo Eyacuiñajjiya oya cuana quea jaji nee nee baꞌe meesahua cajeꞌyo. ¡Quea bihui nee capoꞌyahua oya cuana!
—Oja epeejji cuanaja mimishijo pa neineianijo Eyacuiñajjiya quea bihui nee po mee cajeꞌyo mimishi cuijea caꞌyajje.
22 —Eꞌe, ¡miquianaya ecuea epeejji cuana, quea bihui nee nee pocue! Dejja cuana miquiana nijje mimijajije, miquianaya dejja cuaa cuia caje peaꞌai, siajje minijje cuaje peaꞌai. Jamatii, miquianaya ecuea epeejji cuanijo, dejja cuaa mimishi po meeꞌyo sa acani. Eyacuiñajjiya ca ca miquianaya quea bihui nee po mee cajeꞌyo.
23 Jamajjeya ¡jjeyahua nei quea bihui nee nee pocue! Eyacuiñajjiya miquianaya eyajo quia cajeꞌyo miquianajaya aquiana quea bame nee nee, quea huiso nee nee. Eꞌe, Eyacuiñajjija esohui huohuijji yahuajo nei nei baꞌya cua jamaya aca cua mimishi cuaa; napa ca cua peaꞌai. Jamajjeya ¡ona jayojja jama pocue, quea bei!
24 —Joyaya nequiana oe quea aquiana huiso jjejojo, Eyacuiñajjijo jjashahuabaqui jjima. ¡Bacue! ¡Jjeya miquianaya quea bihui nee nee jjabaquicue! Majoya aje mi oe quijje quea yeno nee nee cuajeꞌyo cuaqui yasijje poqui majje manoꞌyo majje.
25 —Eꞌe de, ¡joyaya nequiana oe bobijo jjashahuabaquiani jjejojo Eyacuiñajjijo jjashahuabaqui ajja bacue! ¡Jjeya miquianaya quea jejje jjejojo quea bei jjabaquicue! Majoya aje mi oe quijje quea shoe nee nee, quea yeno nee nee cuajeꞌyo. Bobimaꞌ nei cuaje cuaqui yasijje poquiꞌyo majje.
—¡Joyaya mi oe quea bihui jjejojo soa ani jjabaquicue! Eyacuiñajjijo jjashahuabaqui ajja, quijje pa neineijeꞌyo; quea yeno nee nee cuajeꞌyo cuaqui yasijje poquiꞌyo majje.
26 —¡Aꞌa oe esohui huohuijji nisho pojji, dejja quea bihui epo meejji nisho pojji! Ma ecua esohui huohuijji nisho etiiquiaa quea bihui po mee ca cua jama. Jama po majjeya aje mi oe quijje cuaqui yasijje poquiꞌyo majje quea yeno nee nee cuajeꞌyo.
Quea boti nee aꞌyocue dejja cuana minijje quea quene cuani
(Mateo 5.38-48; 7.12)
27 Jesosaa jama aca cua baꞌa: —¡Jjashajjaꞌajjaquicue oe! ¡Aꞌa oe ona botiꞌama pojji!
28 ¡Quea boti aꞌyocue dejja minijje quea quene cuani! ¡Joya miquiana nijje mimijajianijo mimicue Eyacuiñajji nijje ojo!
29 ¡Onaa shemo cuia cajje shemo mijipeajje cuia mee oꞌoyacue! ¡Onaa miquianajaya daqui jjequisejjajea cajo dojo meeꞌyocue miquianajaya pea daqui peaꞌai!
30 Onaa: “¡Aquiana che mo quiacue!” acajje, ¡quiacueya oe! Onaa miquianajaya aquiana sii cajo ¡aꞌa huohuiꞌajjaꞌyojji!
31 Miquianaya mimiani pea cuana nijje jama baꞌa: “¡Enijje quea bame nee po tiitiiꞌyocue!” ¡Jamajjeya miquianaya pea cuana nijje quea bame nee po tiitiiꞌyocue!
32 —Joya miquiana quea jea ajji cuani miquiaaya quea jea nee aña peaꞌai; miquiana nijje quea quene cuani ca ca miquianajaya botiꞌama. Dejja mimishi cuana aje oe jamaya cuani peaꞌai. ¡Aꞌa dejja mimishi jayojjaya pojji! ¡Ojjaña quea jea nee nee acue!
33 Miquianaaya miquianajaya epeejji quea bame aña, pea cuana caya ca oe botiꞌama aña. Dejja mimishi cuaa aje oe jamaya acani peaꞌai, de. ¡Aꞌa dejja mimishi jayojja pojji; ojjaña quea bame acue!
34 Miquianaaya joya jjaquiaquiꞌyojji yasijje quiaña. Joya jjaquiaquiꞌyo ajja huasijje quia jjima aña. Dejja mimishi cuana aje oe jamaya cuani peaꞌai. ¡Aꞌa dejja mimishi jayojja pojji! ¡Aꞌa quea dejja tai pojji! ¡Aꞌa quea nishehui pojji!
35 ¡Miquianaaya miquianajaya epeejji pojjeama cuana quea jea nee aꞌyocue! Jamajjeya quea bame baꞌejeꞌyo. ¡Pea cuana miquianajaya aquiana dojo sa cuanijo oe pojji cahuime dojo meecue! ¡Miquianaya aꞌa jjashahuabaquijji miquianajaya aquianajo, miquianajaya bejjojo! ¡Eyacuiñajjijo oe jjashahuabaquicue! Majoya miquianaya ojaya epeejji nei cuajeꞌyo. Eyacuiñajjiya ojjaña cuanaya quea jea nee nee acani. Ojjaña dejja cuana, ojaya epeejji cuana, ojaya epeejji pojjeama cuanaya quea jea nee acani, de. ¡Jamaya oe pocue!
36 Eꞌe de, esejaya Chii eyajo quea bame nee ani, ojjaña cuana Eyacuiñajjiya quea jea nee nee acani. ¡Eyacuiñajji jayojjaya jama po tiitiicue!
¡Aꞌa pea cuana niñebajji!
(Mateo 7.1-5)
37 Jesosaa jama aca cua baꞌa: —¡Aꞌa pea niñebajji! Jamaya Eyacuiñajjija botiꞌama. Miquianaya pea cuana niñebajji cuanijo, Eyacuiñajjiya miquianaya tecuea cajeꞌyo peaꞌai. Miquianaya pea nijje jjabeiquiꞌyajo Eyacuiñajjiya miquianajaya mimishi cuijea cajeꞌyo.
38 Miquianaaya pea cuana huasijje quea huiso nee quiajo, jamaya quea huiso nee nee miquianaya Eyacuiñajjiya oya huisoajjaya quia cajeꞌyo peaꞌai. Quea huiso nee nee cuaje, de. Oe pojji quiajo ca ca miquianaya Eyacuiñajjiya oya huisoajjaya quia cajeꞌyo —jamaya Jesosa cua.
39 Jesosaa pea esohui ejjashahuabaqui meejji jama aca cua baꞌa: —Eꞌe de, ¿aꞌa acuae oe cojjamaa pea cojjamaꞌ me pejjejea majje dojo caje soꞌo? Cho, eme pejjejeajji pojjeama, o peaꞌai oquejeaquije mei jjani yasijje, de. Cojjamaꞌ jayojja dejja mimishi pea dejja mimishiya dojo cajje cuaqui yasijje poquijeꞌyo onijje tii. ¡Aꞌa cojjamaꞌ jayojja pojji!
40 Oe esohui huohuijji quea jaꞌa nee nee cuani. Ohua esohui huohui coo canijo, o shajjaꞌajjajji cuana quea jaꞌa pishana cuani. Jamatii ma eshajjaꞌajjajji quea jaꞌa cuaje ojaya esohui huohuijji shajjaꞌajja neinei majje. Jamajjeya ¡ecuea esohui shajjaꞌajja neineicue quea jaꞌa epojji! Jamajjeya miquianaaya quea jaꞌa nee huohuije pea cuana huasijje.
41 —Jamajjeya ¡jjashahuaba bamebamequicue; aꞌa pea niñebajji! Jamatii miquianajaya epeejji cuana quea mimishi cuajo, niñebaña. ¡Aꞌa jamaya pojji! ¡Miyaya ebionei miquea mimishi cuana pajeaꞌyocue! ¡Majoya miyaya pea cuana mimishi pajea meesahuaꞌyocue!
42 Oya jayojja yani miquea epeejjija ecojjajo shabo mimishi jayojja. Jamajjeya miya jjashahuabaquiani miquea epeejjija ecojjajo nequi shabojo cuaya meeꞌyo sa aña jama baꞌa: “Epeejji, shabo biso neiya mi cojja dobi canaje. Ache baꞌajja; cahuijjiaꞌajjaꞌyosahua”. ¿Aꞌa acuae jja oe miya jjabaquiani acui cojjajji soꞌo? ¡Ebionei miquea cojjajo nequi acui huijjiaꞌyo socue! ¡Majoya miquea epeejjija shabo huijjiaꞌyocue! —jamaya Jesosa cua.
¡Acui quea bame nee jayojja jama pocue!
(Mateo 7.17-20; 12.34-35)
43 Jesosaa jama aca cua baꞌa: —Oe acui quea bame, ojaya ejjajja quea bame peaꞌai. Pea acui quea tai, jamajjeya ojaya ejjajja quea tai cuani peaꞌai.
44 Oe acui ejjajja nei cuani, pea jjajjame pojjeama cuani.
45 ¡Miquianaya oe jjashahuabaquicue, acui quea bame nee jayojja jama pocue! ¡Quea bame nee jjashahuabaquicue Eyacuiñajjijo! Majoya miquianaya quea bame baꞌejeꞌyo. ¡Aꞌa jjashahuaba taiquijji oe acui quea tai jayojja! Miquianaya jjashahuaba taiquiajo miquianajaya esohui quea tai cuajeꞌyo ma acuijjajja quea tai jayojjaya. ¡Jamatii jjashahuabaquicue Eyacuiñajjijo, ojaya esohuijo! ¡Quea bame baꞌe tiitiicue pea dejja cuana nijje! —jamaya Jesosa cua.
Oe dejja jjashajjaꞌajja neinei quia cua pea jjashajjaꞌajjaqui ajja cua
(Mateo 7.24-27)
46 Jesosaa pea esohui huohui ca cua jama baꞌa: —Miquianaaya eya huohui nishoaña jama baꞌa: “Emeshi Mese, eya shajjaꞌajja sa cuani miquea esohui”. Cho, ecuea esohuijo jjashajjaꞌajjaqui sa po ajja miquianaya —Jesosa cua—.
47 Eyaya miquianaya huohuije beca dejjajo jama baꞌa: Oe dejjaa equi iya bamebame canaje jayojja jama miquianaya jjashajjaꞌajja neineiquiani ecue esohuijo. Dejjaa equi iya canaje quea bame nee nee.
48 Ohuaya tio canaje jjani emaco huasijje. Quea doe nee tio canaje. Majoya quea caꞌa nee nee nequinaje equi yamajjana. Jama acanaje ojaya equi. Equi iya majje ena quea quemo cueyanaje, beni quea quemo cueyanaje peaꞌai. Cuei jjayehuequiꞌyajo jaabichaquiꞌyo jjima equi cuanaje. Quea caꞌa iyame jojoya mi jaabichaquiꞌyonaje —Jesosa cua—. Jamaya ecuea esohui shajjaꞌajja majje miquianaya quea caꞌa cuaje ma equi jayojjaya.
49 —Beca cuana jjashajjaꞌajjaqui ajja ecuea esohuijo jiquio ecua oe dejjaa iya tai canaje ojaya equi. Cuei sahuajo baꞌeꞌyonaje. Ohuaya tio canaje jjani sisi; doeꞌama. Ena quea quemo cuajo, beni quea quemo cuajo, cuei jjayehuequiꞌyajo ojaya equi jaabichaquiꞌyonaje; caꞌaꞌama equi cuanaje, de. Jamaya miquianaya caꞌaꞌama cuaje, ecuea esohuijo jjashajjaꞌajjaqui ajjajo —jamaya Jesosa cua.