2
Quibojjisha quea mano nee nee jaa jeo mee caꞌyonaje
(Mateo 9.1-8; Noca 5.17-26)
1 Majoya quijje pishana Jesosa Capenaoma huasijje poe oꞌoyanaje. Jamajjeya pea cuaa jomajo nequiya huohui canaje jama baꞌa: —Jesosa poeꞌyonaje ojaya equi yasijje. ¡Cuaꞌa, ejjabaquiqui!
2 Jamajjeya quea huiso nee nee jjachichaquinaje ojaya equi yasijje. Dobiqui mee ajja quea dejja huisojojo. Esecuejo nequinaje; equi shajjaquibojo aequiana nequi canaje peaꞌai. Jesosaa oya cuana Eyacuiñajjija esohui huohui canaje.
3 Majoya pea dejja cuaa, ebeca pee peaꞌaiya, quibojjisha quea mano nee nee equipajaajjijo jaa sejjaiña majje Jesosa que dojo canaje.
4 O que poe meemee ajja, quea huiso equijo ejjachichaqui nequijojo. Jamajjeya oya cuanaa equi biajjejje quibojjisha dojosohuaqui canaje. Equi huejja caꞌyonaje. Huejjajje equipajaajji ecapashinei jeaoquea caꞌyonaje jjonojo.
5 Ma ba majje Jesosa jjashahuabaquinaje jama baꞌa: —Eꞌe, jiquio dejja cuana jjashahuabaquiani eya ejjaajaquimeeꞌyojji nei nei poani.
Jamajjeya quibojjisha nijje jama poanaje baꞌa: —Cha, ¡quea bihui nee pocue! Eyaya miquea mimishi cuana cuijeaꞌyonaje.
6 Jesosaja esohui shajjaajja majje Moisesija etehueꞌyo huohuijji poani jomajo ani quenequenenaje. Jesosa Eyacuiñajjija Bacua pojjeama posojo jjashahuaba taiquinaje jama baꞌa:
7 —¡De! Jiquio oya Eyacuiñajji pojjeama. ¿Apiojji Eyacuiñajji jayojja jama nei nei mimiani, de? Jamaya quea mimishi. ¿Aꞌa acuae ohuaya mimishi cuijea mee cajeꞌyo jjabaquiani? Chojja, Eyacuiñajji oe nei mimishi cuijeaꞌyojji poani —poanaje Jodio etii cuana, Jesosa Eyacuiñajjija Bacua Ejja pojjeama poso acanaje.
8 Jamajjeya Jesosa Jodio etiija ejjashahuaba taiquijji ba majje jama poanaje baꞌa: —¿Yajjajje acuae nequiana enijje quea quene poani soꞌo?
9 ¿Ache shai quibojjishajo quea camaja eyaya ajeꞌyo? ¿Aꞌa ojaya mimishi cuijeaꞌyojji quea camaja? ¿Aꞌa jja eyaya oya nequisohua meejeꞌyo? Baꞌajja —Jesosa poanaje—.
10 Jamajjeya eyaya ojjañaja Edoe Meseya miquianaya ba meeaña eya ca ca iña Emeshi Mese nei quea caꞌa nee nee nequi. Jamajjeya eyaya mimishi cuijeajeꞌyo nequianaja.
11 Majoya Jesosaa quibojjisha acanaje: —¡Nequisohuacue! ¡Miquea equipajaajji bebo majje miquea equi yasijje poquicue!
12 Jjeya nei quibojjisha nequisohua majje jeoꞌyonaje. Equipajaajji bebo canaje. Jeojeopoquiꞌyonaje oja equi yasijje. Jamajjeya ba majje ojjaña cuana quea bihui nee nee poanaje. Eyacuiñajji bihuia canaje jama baꞌa: —¡Eꞌe nei, joya quibojjisha jeoꞌyonaje jjeya nei! ¡Eꞌe, e, Eyacuiñajjiya Jesosa quea caꞌa nee po mee cani; emanojaa cuana huaquia mee caꞌyani! ¡Mimishi cuijea mee caꞌyani peaꞌai!
Jesosaa Mateo pea bajjani Nemi iyaa canaje onijje epoꞌyojji
(Mateo 9.9-13; Noca 5.27-32)
13 Majoya Jesosa poqui oꞌoyanaje meshijaji yasijje, bae sahua huasijje. Quea huiso nee nee o que poeyajo, oya cuana Eyacuiñajjija esohui huohui canaje.
14 Majoya Jesosaa poquijeya Apeoja bacua ejja Mateo ba canaje, ma Nemi peaꞌai bajjani. Oya yaninaje equi ejjeshejji jaahuanajjijo, ojjañaja emeshi meseja esohuijo jjeshe mee cani dejja cuana ebaꞌejji sosejje. Oya bejjo jjeshejji poani. Ba majje Jesosaa oya iyaa canaje: —Nemi, ¡enijje poꞌyocue!
Jamajje Nemi nequisohua majje Jesosa nijje poquiꞌyonaje.
15 Majoya Nemiya Jesosa iyaa canaje ojaya equi yasijje ijjiaꞌijjiaa. Jamajjeya Jesosa o shajjaꞌajjajji cuana nijje Nemija equi yasijje poquinaje ijjiaꞌijjiaa. Quea huiso dejja cuana Nemi jama bejjo jjeshejji poani, dejja mimishi cuana peaꞌai poquinaje. Ojee ijjiaꞌijjia aninaje Jesosa nijje, Jesosa shajjaꞌajjajji cuana nijje peaꞌai.
16 Jesosa ma dejja mimishi cuana nijje ijjiaꞌijjia ani ba majje Jodio esohui huohuijji Paniseo cuana bajjani, Moisesija esohui etehueꞌyo huohuijji cuana peaꞌai quea quene poanaje. Jesosa shajjaꞌajjajji cuana nijje mimijajinaje jama baꞌa: —¿Apiojji miquea esohui huohuijji ijjiaꞌijjiani bejjo jjeshejji cuana nijje, dejja mimishi nijje peaꞌai? ¿Apiojji, de?
17 Jesosaa oya cuana shajjaꞌajja canaje. Huohui canaje jama baꞌa: —¿Aꞌa dejja cuana quea mano pojjeama eshicuijji quia sa poani? Quea mano poanijo ca ca eshicuijji quia cajji. Oya jayojja eya dejja quea mimishi nijje jjapeequiani quea jaꞌa nee epo meeꞌyojji. ¡Bacue! Beca cuana jama poani baꞌa: “Eya ca ca iña quea pame nee, mimishiꞌama nei nei” poso jjabaquiani. Jamajjeya ma dejja cuana ecuea eꞌiyaajji pojjeama enijje ejjapeequiꞌyojji. Chojja, eya poeyanaje dejja quea mimishi iyaaa, mimishi pajea meeꞌyojji.
Bobi ijjia ajjajo huohuiꞌajja canaje cuaa
(Mateo 9.14-17; Noca 5.33-39)
18 Majoya Huani, ma ona besameejji poani, jeanobiajea canaje cuaa. Jamajjeya Jodio etiiquianaja esohui jama poanijo o shajjaꞌajjajji cuanaa bobi ijjia jjima aninaje Eyacuiñajjijo ejjashahuabaquijji, onijje emimijji peaꞌai. Jamaya Paniseo shajjaꞌajjajji cuana poa peaꞌai. Jamajjeya beca cuana Jesosa que poeyanaje. Jama huohuiꞌajjame acanaje baꞌa: —Jesosa, ecuana, Paniseo cuana peaꞌai, Jodio etiiquianaja esohui jama poanijo bobi ijjia ajja Eyacuiñajjijo ejjashahuaba neineiquijji. ¿Apiojji acuae mi shajjaꞌajjajji poani jama po ajja? —poanaje; beshahua nei tecuea canaje.
19 Jesosaa oya cuana acanaje jama baꞌa: —Chojja, ¡eya ecuea epeejji cuana nijje yanijo, caꞌijjia cahua! Ma jayojja jama baꞌa: Ejjahuanaquijjijo yahueja epeejji cuana onijje yanijo caꞌijjia cahua quea bihui nee. ¿Aꞌa yahueja epeejji cuana onijje yanijo quea yeno? Chojja, quea bihui nee.
20 Yahue poquiꞌyajo ca ca oe ojaya epeejji cuana ijjiaꞌijjia sa po ajja poaje. Quea yeno jjejojo jjashahuaba neineiquiani. Eya jiquio ecua yahue jama poani: Quijje eya poquiꞌyajo, ecuea epeejji cuana ijjiaꞌijjia ajja poaje, Eyacuiñajjijo ejjashahuaba neineiquijji, onijje emimi neineijji peaꞌai.
21 Majoya Jesosaa huohui canaje pea ejjashahuabaquimeejji: —Eseyaya baacojja eseeꞌyohua bishe eyacuajo caca ajja. Cho. Baacojja etii enajo nequi seeꞌyani, caꞌaꞌama poꞌyani. Jjasajajeaquijeꞌyo. Bishe ihuijeꞌyo. Bishe eyacuajo ca ca baacojja eyacuaa cacaña.
22 Pea esohui huohui canaje jama baꞌa: —Ena sese cuatatanijo iya ajja meshimisi etiijo. Ena sese cuatata neineianijo, meshimisi caꞌaꞌama jjaajajeaqui majje ena sese jjashojeajeaquijeꞌyo. Cho, ena sese cuatatanijo meshimisi eyacua quea caꞌajo iya cani cuaa —jamaya Jesosaa huohui canaje ejjashahuaba meequijji onijje jjapeequi majje eyacua cabaꞌyahua, yahuajo jama pojjeama, etiiquianaja esohui jama pojjeama.
Esohui epojja ejomishocajjijo
(Mateo 12.1-8; Noca 6.1-6)
23 Majoya Jodioja epojja ejomishocajjijo Jesosa o shajjaꞌajjajji cuana nijje ejiojjijje poquinaje. Que yiyejje poquije quea shoe poanaje. Quejo nequi anoso ai sejja canana majje oe pojji ijjia canaje, o shajjaꞌajjajjiya.
24 Maya Paniseo cuaa ba canaje. Jamajjeya Jesosa nijje mimijajinaje jama baꞌa: —¡Bacue oe! Mi shajjaꞌajjajji poani cuaa chaco cani. Anoso ai sejja cani esejaya epojja ejomishocajjijo. Esejaya etiiquiana Moisesija etehueꞌyo jama poani baꞌa: “¡Aꞌa chacojji epojja ejomishocajjijo!”
25 Jesosaa oya cuana acanaje jama baꞌa: —¿Aꞌa miquea ba jjima esohui etehueꞌyo emeshi mese Dabija, ojaya epeejji cuanaja peaꞌai?
26 Yahuajo nei nei Abiata Eyacuiñajji nijje emimijji etii poanijo, Dabija epeejji cuana quea shoe nee po majje Dabi Eyacuiñajjija equi yasijje dobiquia poa. Ijjia ca poa pahui, maya Eyacuiñajji yasijje quia ca poa cuaa o bihuiajji. Ojaya epeejji cuana ijjia mee ca poa peaꞌai. Jiquio ca oe Eyacuiñajji nijje mimianiya caꞌijjia cahua; pea cuanaja eꞌijjiajji pojjeama.
27 Majoya Jesosa ojjaña nijje jama poanaje baꞌa: —Dejja, epona peaꞌai pana majje Eyacuiñajjiya oe epojja ejomishocajji acaꞌyonaje dejja cuana jomishocajji. Aꞌa jjashahuabaquijji jama baꞌa: “Epojja ejomishocajjijo eya jamatii anije”. ¡Cho, quea pame nee acue ma pojjajo! —Jesosa poanaje—.
28 Eya, ma ojjañaja Edoe Mese Emeshi Mese nei poani. Jamajjeya eyaya eyaye nei huohuije epojja ejomishocajjijo: ¡Quea pame nee nee acue! ¡Pea cuana quea jea nee acue! —Jesosa poanaje.