3
Esohui eꞌe jojo nei quea pame nee
1 Ecuea epeejji nei cuana, jjeya eyaya pea esohui tehueje miquiana que. ¡Emeshi Mese neijo quea bihui nee pocue, miquianaya! Yahuajo eyaya esohui miquiana que huohuinaje. Jjeya oyaya tehue oꞌoyaña quea bihui nee miquiana Jesosa Quitoja epeejji quea caꞌa nee nee epo meejji. Jamajjeya pea cuaa miquianaya edasiajji pojjeama.
2 Jodio esohui huohuijji nisho cuana ¡aꞌa shajjaꞌajjajji! Oya edasiajji cuana, iñaehua quea mase jjaꞌijjiaquiani jama. Jesosa Quito nijje jjapeequi ajja. Miquea cuiishasha jee biso nei jehuisejjajea mee sa acani huohuime acani ca ohua.
3 Cuiishasha biso nei jehuisejjajea mee majje maya dejja cuana jjapee nishoquiani Eyacuiñajji nijje. Eseya ca ca Eyacuiñajjija epeejji eꞌe jojo nei. Eꞌe, Edojjoshahua Pameya eseya Eyacuiñajji bihuia meesahua cani. Jamajjeya eseya quea bihui nee nee jjapeequiani Jesosa Quito nijje. Ohuaya, Jesosa Quitohua ca ca oe eseya mimishiꞌama po mee cajeꞌyo.
4 Pea dejjaa aje oe Jodio etiiquianaja esohui jama amajje jjashahuaba quehuaquiani jama baꞌa: —Eya Eyacuiñajjija epeejji quea pame nee.
Chojja de. Yahuajo Jodio etiiquianaja esohui jama quea huiso eyaya aꞌyonaje. Ma esohui quea huiso nee nee yahuajo jama amajje ¿aꞌa eya quea pame nee? Chojja.
5 Yahuajo aje eyaya jama anaje baꞌa: Jodio etiiquianaja esohui etehueꞌyo jama acanijo, eya me oejje pea beca peejjima cahuime, 8 cahuime etiijo, ecuea cuiishasha biso nei jehuisejjajea caꞌya poa cuaa. Eya Isaeni dejja. Jamaya ecue chii poa. Ecuea etiiquiana Bejami bajjani. Jamajjeya eya Jodio nei Bejami cuana nijje. Jamajjeya eya Emeo esohui mimiani. Eya Jodio etiiquianaja esohui jayojja jama poanaje pea Jodio esohui huohuijji Paniseo bajjani cuana nijje.
6 Jodio etiiquianaja esohui cuana quea jea nee nee poa ecuea. Jamajjeya eyaya Jesosa Quitoja epeejji cuana janobajjima nei napanaje; etiiquianaja esohui a sa po ajjajojo napanaje. Eꞌe, eyaya ma esohui cuana jayojja jama aneineiꞌyonaje yahuajo. Jamajjeya Jodio dejja cuana enijje mimijaji jjima poa.
7 Jodioja esohui quea huiso shajjaꞌajja majje eya jjashahuaba taiquinaje jama baꞌa: —Eya quea pame nee nee baꞌe —poso jjabaquinaje.
Jjeya ca ca Jesosa Quitoja esohui yaꞌyojji eyaya Jodioja esohui cajaa aꞌyonaje.
8 Eꞌe, eya jjashahuabaquiani jama peaꞌai baꞌa: Ojjaña aquiana quea pame cuana oe pojji sosejje, sosemaꞌ, shabo jama cajaa aña. Jesosa Quito ca ca aquiana quea sose huiso nee nee jayojja eyaya baña. Jamajjeya aje iña oe jama jjashahuabaquime poani baꞌa: Jesosa Quito, ecuea Emeshi Mese nei nijje jjapeequianijo eya quea pame nee nee poani. Quea sose huiso nee nee eyaya Jesosa Quito baña.
9 Eꞌe, Jesosa Quitoja epeejji poanijo, eya ohuaya onijje nequi tiitii mee cajeꞌyo; quea boejeaꞌyo nee nequi mee cajeꞌyo. Jodioja esohui cuana jama amajje eya quea boejeaꞌyo pojjeama. Eya Jesosa Quito nijje eꞌe jojo nei jjapeequianijo, ohuaya eya quea boejea po mee caꞌyani. Eꞌe, Eyacuiñajjiya huohui cani: —Ojjaña Jesosa Quitoja epeejji cuana eyaya quea boejeaꞌyo po mee yaña.
10 Eꞌe, yahuajo Jesosa Quito ecuea eba pishana poanaje. Jjeya eya o ba neineiꞌyo sa poani. Eyacuiñajji quea caꞌa nee poanijo ohuaya Jesosa Quito shequi mee ca oꞌoyanaje. Jamajoya eya o jayojjaya cabaꞌe mee caꞌyahua. Ma ecua oya napa ca poa jama jayojjaya eya acajeꞌyo pea cuaa, Jesosa nijje jjapeequianijo mo cuia cajeꞌyo cuaa pojjaꞌa o jayojjaya. ¡Jamatii mo caꞌa caꞌyahua!
11 Jamajjeya jjeya eya jjashahuabaquiani jama baꞌa: —Eyacuiñajjiya eya shequi mee caje oꞌoya. Jesosa Quito nijje baꞌe tiitii mee cajeꞌyo Jesosa Quito jayojjaya, quea boejea baꞌejeꞌyo onijje tii.
Pabohua Jesosa Quitojo chaco tiitii cani
12 Eya Jesosa Quito jayojja jama pojjeama. Oya quea pame nee nee, quea caꞌa nee nee peaꞌai. Eya quea caꞌa pishana. Jjeya eyaya janobajjima nei chacoaña Jesosa Quitojo. Jamajjeya ohuaya eya ojaya epeejji quea caꞌa po mee cani. Eꞌe, Jesosa Quitohua eya jjesheꞌyo majje onijje jjapee tiitii meequi caꞌyani.
13 Ecuea epeejji cuana, ¡shajjaꞌajjacue! Ecuea ejjashahuabaquijji jama baꞌa: Eya Jesosa Quitoja epeejji quea caꞌa nee, quea pame nee nee pojjeama. Eya ca ca jamaya poani baꞌa: Eya jjashahuabaqui tiitii ajja ecuea esohuijo ma eya yahuajo anajejo. Jjeya eya jjashahuabaquiani jama baꞌa: Jesosa Quitohua eya chaco meesahua caje janobajjima nei ojo. Jamaya eyaya a sa neineiaña.
14 Eyaya janobajjima nei chaco tiitiiaña Jesosa Quitojo. Jamajjeya quijje Eyacuiñajjiya ecuea echaco sosejje sosequia cajeꞌyo. Jamaya acaje Jesosa Quitohua eya eyahuasijje iyaaꞌyo majje onijje ebaꞌe tiitiiꞌyojji.
15 Jamajjeya eseya, Jesosa Quitoja epeejji quea caꞌa cuana Jesosa Quitoja ejjashahuabaquijji jayojja jama jjashahuabaquiani tii tii. Eꞌe pojjaꞌa miquianaya jamaya po ajja. Eyacuiñajjiya miquianaya jjashahuabaqui mee cajeꞌyo quea jaꞌa nee o jayojjaya.
16 Eꞌe nei, eseyaya Eyacuiñajjija esohui quea huiso ba huichaꞌa huichaꞌaña. Jamajjeya ¡ojaya esohui jayojja jama ejjaꞌa tiitiiqui!
17 Ojjaña ecuea epeejji cuana, ¡e jayojja baꞌecue! ¡Pea dejja cuana babacacue; ma ecua eyaya miquiana nijje nequiya anaje jamaya caꞌa cahua cuaa! ¡Onaya oe jamaya atiitiicue, miquianaaya!
18 Yahuajo eyaya miquianaya huohui majamajanaje pea dejja cuana quea mimishi nee nee poanijo. Jjeya quea yeno nee eyaya huohuije oꞌoya ma dejja cuanajo. Jesosa Quito acui ecueataꞌapeejo manoꞌyonaje. Oya cuana ca ca Jesosa Quitoja esohui jayojja jama po ajjajo o quecuaꞌyojji epo jayojja poani.
19 Jamajjeya ma dejja cuana cuaqui yasijje poquijeꞌyo. Ojaya aquiana huisojo jjashahuaba tiitiiquiani. Eyacuiñajjijo jjashahuabaqui sa poꞌyo ajja. Oya cuana oja mimishijo bichoꞌama, quea bihui nee poani. Eꞌe, jjashahuaba tiitiiquiani quea tai.
20 Eseya ca ca jamaya baꞌe ajja; Jesosa Quito nijje eyajo baꞌe tiitiijeꞌyo. Jesosa Quitohua eshahua eseya mesena pajea mee caꞌyonaje. Eꞌe de, esejaya Emeshi Mese nei Jesosa Quito poeje oꞌoya. O poe oꞌoyajji eseyaya ishoaꞌajjaña quea bihui neeya.
21 Esejaya eyami caꞌaꞌama. Jesosa Quitohua poe oꞌoya majje esejaya eyami quea caꞌa nee nee panacuaji cajeꞌyo ojaya eyami jayojja jama quea caꞌa nee nee epoꞌyojji tii tii. Jamaya po mee cajeꞌyo ohuaya quea caꞌa nee nee poanijo. Eꞌe, quea caꞌa nee poanijo ohuaya ojjaña huoojea tiitii cani. Ojjaña aquiana cuiña cani, Jesosa Quitohua.