2
येसु मना दंटातोर आंदुर
1 नावा पिलाल्कुनिटा! मिमेट पापम कियामन्नि इंचि नना इव पोल्लें मीकु रासेक मंतन. गानि ओक्कला बोरन्ना पापम कियानय्ते, मनाहेंदाल पेनबाबानतोनि वळ्कालय ओनगा वरोर सहायम कियानोर मंतोर, ओरे नीतिमंतुड येसु किरिस्तु आंदुर.
2 मना पापाल्क मापि आयाना इंचि ओर मनाहाटीं मोक्कु आतोर. ओर सिराप मना पापाल्क मापि आयानाहाटींगे आयो, पूरा दुनियातोरा पापाल्क मापि आयानाहाटीं मोक्कु आतोर.
3 मनम ओक्कला ओना आदेसकुन पीसि ताकानय्ते, ओन मनम बेस तेल्पिचकुत्तोम इंचि मनाकु बरोबर तेळियंता.
4 बोर अय्ते, “नना पेनदुन तेल्पिचकुत्तन,” इंचि इंतोर, गानि दाना आदेसकुन पीसि ताकोर ओर पोंगुळ आंदुर. ओनगा सत्तेम हिल्ले.
5 गानि बोर अय्ते पेनदा पोल्लेतुन पीसि ताकंतोर, ओनगा पेनदा पावरम निजमे पुरागा आता. दीनहेंदाले, मनम वरोनतोनि वरोर कलियसि उंदासि मंतोम इत्तद तेळियसि दांता.
6 बोर अय्ते, “नना पेनतोनि कलियसि पिस्सेक मंतन,” इंचि वेहंतोरो, ओर कुद्दु किरिस्तु पिसतसोंटा पिस्वर पिसागोम.
पूना तरिकाते पडाना आदेस
7 नावा पावरमगल्लोरिटा! नना इंदके मीकु पूना आदेस रासेक हिल्लेन, मोदोटाल मीकु तेळियसि मत्ता पडाना आदेसे आंदु.
8 अयना नना उंदि पूना आदेसतुन मीकु रासेक मंतन. इद किरिस्तुना लोप्पो, मीलोप्पो सत्तेमते मंता. बारित्ते हीकट माय्सि होनालय आसंता, सत्तेमता वेलगु अय्ते मेर्सेकेन मंता.
9 बोर अय्ते, “नना वेलगुने मंतन,” इंचि वेहकुंचि, ओना दंटा विस्वासिन हय्सोर, ओर इंकागुडा हीकटतेन मंतोर.
10 बोर अय्ते ओना दादन पावरम कींतोर, ओर वेलगुने निल्सि मनंतोर. ओनगा पापमते अर्रना लायकतद बदे पोल्ले हिल्ले.
11 गानि बोर अय्ते ओना दादन हय्सोर, ओर हीकटते मंतोर. हीकटतेन पिस्सेक मंतोर. हीकटहाटीं ओना कळ्कु दिस्साकोंटा आताहाटीं, ओर बेके होंचंतोरो ओनद ओन्के तेळियो.
12 नावा पिलाल्कुनिटा! किरिस्तुना पोरोलतेन मीकु मीवा पापाल्कुना मापि दोर्कुता. अदुनहाटींगे नना मीकु इव पोल्लें रासेक मंतन.
13 बाबोरिटा! मोट्टा मोदोल्ताल मत्तोन मिमेट तेल्पिचकुत्तिर, इंचि नना मीकु रासेक मंतन. लेय्युरिटा! मिमेट सेड्डातनमतुन गेल्सतिर, इंचि नना मीकु रासेक मंतन. पिलाल्कुनिटा! मिमेट पेनबाबान तेल्पिचकुत्तिर इंचि नना मीकु रासेक मंतन.
14 बाबोरिटा! मोट्टा मोदोल्ताल मत्तोन मिमेट तेल्पिचकुत्तिर, इंचि नना मीकु रासेक मंतन. लेय्युरिटा! मिमेट गट्टिपळतिर. पेनदा पोल्ले मीलोप्पो निल्सि मनंता. मिमेट सेड्डातनमतुन गेल्सतिर, इंचि नना मीकु रासेक मंतन.
15 दुनियातुन आयि दुनियाते मनना वस्तुकुन आयि पावरम कियमट. ओक्कला बोरन्नागिंटा दुनियातुन पावरम कियानय्ते, ओनगा पेनबाबाना पावरम हिल्ले.
16 बारित्ते दुनियाते मननव इत्ते, मेंदुल्ता इच्चा, कळ्कुना इच्चा आनि पिस्वरता गर्रा इव पेनबाबानगटाल वातव आयों. इव ई दुनियातवे आंदुं.
17 ई दुनिया, दुनियाताल वाता इच्चां, इव रोंडगुडा माय्सि होनानुं, गानि बोर अय्ते पेनदा पोल्लेपोर्रो ताकंतोरो, ओर मात्रम बस्केळ्क पिस्सि मनानुर.
किरिस्तुना पगातोर
18 पिलाल्कुनिटा! इद आकिरता वेला आंद, किरिस्तुना पगातोर वायानुर इंचि मिमेट केंजसि मत्तिर. अल्हेने इंदके किरिस्तुना वेल्लेटोरे पगातोर वातुर. इदुनहेंदाल, इद आकिरता वेला आंद इंचि मनाकु तेळियंता.
19 ओर लोकुल्क मना लोप्पोटाले पेय्सतुर, गानि ओर मनोर्क आयुर. ओर निजमे मनोर्क आसि मत्ते मनातोनि मंचि मन्नेर. ओर बोरे मनोर्क आयुर इंचि मनाकु तेळियानाहाटीं ओर अल्हा पेय्सि होत्तुर.
20 गानि मीवद अय्ते पवित्र मत्तोनहेंदाल अबिसेकम आता, अदुनहाटीं मिमेट अंटोर सत्तेमतुन एरपाट कींतिर.
21 मीकु सत्तेम तेळियो इंचि नना मीकु रासा हिल्लेन. मीकु सत्तेम एरपाटे मंता, इंका सत्तेमताहेंदाल बद्दे आबद्दम पोल्ले वायो इंचिगुडा मीकु तेळियसे मंता. अदुनहाटीं नना मीकु रासतन.
22 बोर अय्ते, येसुन “किरिस्तु” इंचि ओप्कुन्नोरो, ओर असल आबद्दम वळ्कानोर आंदुर. ओरे किरिस्तुना पगातोर आंदुर. ओर बाबन, मर्रिन ओप्कुन्नोर.
23 बोर अय्ते मर्रिन ओप्कुन्नोर, ओर बाबोनगुडा ओप्कुन्नोर. मर्रिन ओप्कुनानोर बाबोनगुडा ओप्कुंतोर.
24 मोदोलताल मिमेट बतल अय्ते केंजतिरो, अदुन मीलोप्पो बस्केळ्ताहाटीं इर्राट. अल्हा इर्रानय्ते, मिमेट मर्रि आनि बाबोनतोनि उंदासि मंदकिट.
25 किरिस्तु मनाकु बस्केळ्क पिस्सना पिस्वर हींतन इंचि पोल्ले हीतोर, अद इदे आंद.
26 मीकुन पसांचालय हूळना लोकुल्कुना बारेमते नना इव पोल्लें मीकु रासेक मंतन.
27 गानि बदुनतोनि अय्ते मीवा अबिसेकम आता, अद मीलोप्पो निल्सि मनंता. अदुनहाटीं बोर मीकु कराहना अवसरम हिल्ले. मीलोप्पो मनना अबिसेकम, मीकु अन्निटवुना बारेमते कराहंता. अद सत्तेम आंद, दाना कराहमळ आबद्दमतद आयो. अद मीकु बल्हा कराहंता, अल्हा मिमेट किरिस्तुना लोप्पो निल्सि मंटु.
28 अदुनहाटीं नावा पिलाल्कुनिटा! मिमेट किरिस्तुने निल्सि मंटु. अल्हा मत्ते, ओर बस्के अय्ते इद बूमिते मल्सि वायानुर अस्के, मनम वेर्रे हिल्वोरम आसि ओर वातंका ओना मुन्ने सिग्गु वायाकोंटा मंदा परकोम.
29 मिमेट ओक्कला किरिस्तु नीतिमंतुड इंचि तेल्पिचकुत्तोर आयानय्ते, सत्तेमता कबळ कियाना हरेक मनकल पेनदाहेंदाले पुट्तोर इंचिगुडा मीकु तेळियंता.