2
पेनदा लोकुल्क इत्ते जीवाते मनना बंडानसंटोर
1 पेन बच्चोर दया कियानद आंद इंचि मिमेट अय्ते एरपाट कीतिट. अदुनहाटीं अन्नि तीरकुना तप्पु कबाह्क, अन्नि तीरकुना बोंकिचमळ, नडेह कियमळ, कळ्क पोतमळ, अन्नि तीरकुना अपमानम कियमळ इवुन होळसीम्टु.
2-3 इंदके पुटता पसिबाला बल्हा पाल उन्नालय तनलाळंता, अल्हेने मिमेटगुडा बेसता पाललेसीं मनना पेनदा पोल्लेताहाटीं तनलाळट. अल्हा तनलाळते मिमेट मुक्तिहाटीं पेनदा पोल्ले परकारम बेरस्सेक दांतिट.
4 मिमेट जीवाते मंदना बंडातसोंटा किरिस्तुनगा वट, मनकालोर्क ओन हय्सा हिल्लुर गानि ओर पेनदा लोप्पो पेरकुत्तोर आनि विलुवातोर आंदुर.
5 मिमेटगुडा जीवाते मंदना बंडानलेसीं पवित्र आत्माता लोन दोहचेक मंतिट. येसु किरिस्तुनाहेंदाल पवित्र आत्माता बक्तितुन मोक्कु हीताप पेनदुक ओप्पनालायक मनालय, मिमेट पवित्र पेर्मालोरलेसीं निलाहतुर आंदिर.
6 बारित्ते दर्मसास्त्रमते पेन इल्हा इत्ता गदा:
“नना सियोनते सेंकुमूला बंडतसंटोन वरोन इरसेक मंतन,
ओन नना पेरतन, ओर वेल्ले विलुवातोर आंदुर.
ओनापोर्रो बोर अय्ते विस्वासम इर्रंतोर, ओर बस्केने सिग्गुना पाल आयोर.”
7 अदुनहाटीं मिमेट विस्वासम कीतिर इंचि अद बंडा मीक विलुवातद, गानि बोर अय्ते अदुन विस्वासम किय्युर, ओराहाटीं दर्मसास्त्रम इल्हा वेहता गदा:
“बद बंडातुन दोहानोर बतक ओज्जो इत्तुर,
अदे बंडा इंदके सेंकु मूलाता मोदोल बंडा आता.”
8 इंका दर्मसास्त्रमते इल्हा मंता गदा,
“अद बंडा लोकुल्कुंक दल्गंता, इंका पर्पु बंडा ओर्कुन हिळु अरहंता.
बारित्ते, ओर पेनदा पोल्लेने ताकवाहेंके, बंडा दल्गिसि हिळु अर्रंतुर.
ओर हिळु अर्रनाहाटींगे इल्हा निलाहमळ जर्गता.”
9 गानि मिमेट अय्ते पेन पेरकुत्ता वंसमतोर, राजुल्कुनसोंटा पेर्मालोर्क, पवित्र राज्येमतोर, पेनदा लोकुल्क आंदिर. अदुनहाटीं मिमेट दाना अद्बूतामाता कबाह्कुन वेहाना इंचि मीकुन हीकटताल अद्बूतामाता वेल्गुने तत्ता.
10 मुन्ने मिमेट पेनदा लोकुल्कगुडा मना हिल्लिर, गानि इंदके मिमेट पेनदा लोकुल्क आतिर. मुन्ने मीपोर्रो पेनदा दया मनाहिल्ले, गानि इंदके मीवापोर्रो पेनदा दया मंता.
11 नावा पावरमगल्लोरिटा, मिमेट वेरे देसेमतोर, वेरे नाटेनोर आसि मंतिर. अदुनहाटीं मी आत्माकु अड्डम मनानव दुनियातां अन्नि सेड्डा आसेनाल लक्कु मंटु इंचि विनंति कीसेके मंतन.
12 मिमेट अविस्वासुल्कुना नड्डुम मंतिट इंचि बेस ताकट. ओर मीकुन कराब लोकुल्क इंचि बदनाम किय्यिनागानि मीवा बेस कबाह्कुन हूळसि, पेन वायाना रोजुने ओर इंका पेनदा कदर कियानुर.
अदिकारम मत्तोर्कुना पोल्लें केंजना
13-14 मिमेट सामिनाहाटीं दुनियाते मनना अदिकारिल्कुना कय्दा हिळु मंटु. राजाल पेद्दोड इंचि ओना कय्दा हिळु मंटु. अदिकारिल्कुना पोल्ले केंजाट, बारित्ते बेसता कबळ कियानोर्कुंक मेच्कुनालय आनि कराब कियानोर्कुंक सिक्सा हियालय ओर्कुन लोहमळ जर्गता.
15 बारित्ते, मीवां बेसता कबाह्कुन हूळसि, तेल्वि तक्को लोकुल्कुना तोड्डि बंद कियाना इंचि पेनदा इच्चा मंता.
16 मिमेट बोना कय्दा हिळु हिल्वाप मना परांतिट गानि “बोना कय्दा हिळु हिल्लोम” इंचि मीवा मनसुंक वाताप कराब कबाह्कुने ताकमट, पेनदा सेवाकुल्कुनलेसीं ताकट.
17 अंटोरा कदर कियाना, मना दंटता विस्वासुल्कुन पावरम कियाना. पेनदुक वेरियसि ताकना, राजाना कदर इर्राना.
18 जीतागाह्कुनिटा, मिमेट मीवा मालकुंक पूरा कदर हीसेक ओरा कय्दा हिळु मंटु. सिराप बेसता गुनम, सादा सिंपल मत्तोरहेकेन आयो गानि कडक मनना मालकुनगा गुडा ओर वेहताप ताकट.
19 बारित्ते बोरे आयिर पेनदा लोप्पो ताकानेंके तप्पु हिलाकोन्ना गानि देब्बां तिन्निना, तिप्पल्क वायिना, ओप्के पीसि मनानय्ते अद मेच्कुनना पोल्ले आंद.
20 निमे तप्पु कीसि देब्बां तित्तिन, ओप्के पीसि मत्तिन, अय्ते अव्टे नीकु बता पायदा वाता? गानि निमे ओक्कला बेसता कबाह्क कीसि देब्बां तिंचि ओप्के पीसि मनानय्ते, पेनदुक नच्चानोन आंदिन.
21 इदुनहाटींगे मीकुन पेन केयता आनि किरिस्तु मीवाहाटीं तकलिप अरतोर, मिमेट इंका ओना अळगुने अळगु वाटसि ओना पज्जो तकलिप अर्सि ताकना इंचि उंदि उदाहरनलेसीं पेन मीकुन निलाहता.
22 ओर बतले पापम किया हिल्लोर, ओना तोळ्दाल बस्केने बोंकिच्चना पोल्ले पेय्सा हिल्ले.
23 ओन तेरहिना गानि दानकु बदुल ओर बोने तेरहा हिल्लोर. ओन बच्चोनो तकलिप कीतुर गानि दानकु बदुल ओर बोर्कुने बेदरिचा हिल्लोर, दानकु बदुल सत्तेमते न्यायम कियाना पेनदुक ओनद-ओर अप्पजेपतोर.
24 मनम पापाल्कुनाहाटीं हासि होंचि सत्तेमताहाटीं पिसागोम इंचि येसु ओना मेंदुल्तुन क्रुस पोर्रो हीतोर. ओर तित्ता देब्बाना हेंदाल मना बिमार्क बेस आतां.
25 मुन्ने मिमेट हर्रि तप्ता गोर्रेनलेसीं तिरियसेक मत्तिर. गानि इंदके मीवा जीवातुन कापाळसि कोहानोनगा मल्सि वातिर.