22
Ado besula udia neahalea molö giala daiala negeila säi
(Ulugu 14.15-24)
Yesuea ado besula ilima bu elö sähalea, Hebeni Beaha Maadela Sigi Neebea amida gowe gadoi dialea. Beaha aligilo gini afädëa ïe malö udia neasebegi, molö giala daiala negei. Daiala negesa maadelahilä, ea ïe hamoi hamolasilo amolima sähalea, Udia dolö giwi säi amoli walio misiäia bea mosaloi. Bea asi gaso, giwi säi amoli moholö haboi. Habosebegi, ea hamoi hamolasilo odoama mosalolahilä sähalea, Na giwi säi amolima gomalä sämalo. Molö molö daiala negei dialea. Nïe sugua gao gawalige, üdïli odoa säfei hedabige giala dagabodasila negela, nelebo sulubadela daiala negei dialea. Udia neaseweïe molö molö misiäiala sämalola säi. Amala säla awäsebegi, giwi säi amolia auaulahilä afiai. Dolö afädëda, hïle sagaia asi. Amase, elöda hïle sidua mosöa asi. Odoa made asi amoliada ïe hamoi hamolasilo amoli gaulahilä, nafadela nufudala baagoi. Amala hamosebegi, beaha aligilo gini amea mihalälahilä, ïe ami dolö amoli mosalolahilä, ilia nufidelo dolö amoli nufudala baagosa maadela, ilile mosö gobesa maadei.
Amala mosalolahilä, ea ïe hamoi hamolasilo amolima sähalea, Molö giala daiala negesi dialea gaso, na giwi säi amolida dofea made gabu. Idi osogoloa ami awälahilä, udia dolö gausiasebe amolima, udia neaseweïe molö molö misiäiala sämolö mosalola säi. 10 Amala säsebe amo nabala, hamoi hamolasilo amolia idigi awäla, udia dolö gausiai amoli sulubadela neala gegedosebegi, nafadege hedabige maala, molö molöïe mosö amo nobai.
11 Udia dolö mofiaha maadesebegi, beaha aligilo gini amea mofiai sefolalebe amoli bimolöïe digalahilä beahamelebe, dolö afädë udia neahalea fagulo gälo amo made gäi misi sebe melï. 12 Amo bealahilä ea nabahalea, Nedoo, udia neahalea fagulo gälo amo made gäi goda, abilia misi saleala nabi. Amala nabasebegi, dolö amea ado säla obëgëla made sulo. 13 Ado säla made obëgësebegi, beaha aligilo gini amea ïe hamoi hamolasilo amolima sähalea, Ïe naabo emole helegela nafodolahilä, gasimi sagai dibea ami sadia idogomo. Amida, ili dïisalea bese ali nalëgësa namolömelëla säi.
14 Yafie wei gaso, afädë afädëla memelei gabiola säi.
Dagisi muni negemolö gabule, ma made negemolö gabulela nabi
(Maga 12.13-17, Ulugu 20.20-26)
15 Felesi dolö nefolalo amoli awälahilä, ado afädë negemolöïe didiähalea, Yesuea ado säsebe amoïe abilia säla oodomolödula didiäha dilo. 16 Amala didiälahilä, ilia ilile bëgëla aulo nefolalo amolige, Heledoïe sosogo nefolalo amolige, Yesu neebea mosalosebegi, ilia ema sähalea, Säla Olelelo-o, nilïa helësësaleada, dia ado dofämu sälo. Amase, dia Godeïe mala säla olelese goda, mogolafalï säla olelesa. Dia dolö odoabalä made bedälo ameada, dia mogoimu olelelola helësësamelë. 17 Amalo gabugi, dia helësësebe amo nilïma säla ïmäia. Beaha aligilo Gini Sisa neebe amomada, dagisi muni ïmolö dialeale ma maadelela nabi. 18 Amala nabasebegi, Yesuea ilile asigi nafade amo helësëlahilä, ea ilima sähalea, Asigi fea negelola dilia, edoïe ne fedogola beaha. 19 Muni dagisi negelo giwi gogi nema olemola säsebegi, ilia giwi afädë ema ï. 20 Ïasebegi, ea ilima nabahalea, Muni giwi egowegi dolö busa dibe gowege, ëi dëdëi dibe gowege, nowëïe gabula nabi. 21 Amalebe ilia sähalea, Sisaïela säi. Amala säsebegi, Yesuea ilima sähalea, Nelebo Sisaïeda Sisa hïma ïmalo. Godeïeda Gode hïma ïmalola säi. 22 Amala säi amo nabala ili fudugilahilä, e dïgïla bahïla asi.
Sadiusi dolö amolia Yesuma baagoi nowelo amoïe nabi
(Maga 12.18-27, Ulugu 20.27-40)
23 Segeyo amo galamu, Sadiusi dolö nefolalo amolia Yesuma afädë nabulöïe e neebea misi. Sadiusi ilia udia dolö baagoi amoli made nowemolöla sälo. 24 Ilia nabahalea, Säla Olelelo-o, Mosesea sähaleada, Dolö baagoi amea malö made sogobala baagoi galëda, baagoi amoïe edooea udia didalo amo bedefala nealahilä, edoo baagoi amoïe malö sogobamolö dialeala säla dëdëla negei dialea. 25 Amaimo, nilïgi edoolali gifalädalïa nefolalo amoli, abulümi amea udia nii amo malö made sogobala baagosebegi, ëoea udia amo nii. 26 Neala nea, edoo agedu amoge amo gadola wäla hamosebegi, edoo osoda amoge baagolebe, sosogo gifalädalïa amoli sulubadela baagola mimisa maadei. 27 Amala baagosa maadeibua, udia amo hobealafalï baagola wagai. 28 Amo gadola hamoi amo, ili sulubadelaea udia afädë amomu neala nelo. Amai, hobea baagoi nowesolo amo gala, malö gifalädalïa amoligi udia amoda abodoweïe udia samolödula nabi. 29 Amala nabasebegi, Yesuea ilima säla obëgësalea, Ado säla dëdëla negei dibe amoge, Godeïe geloi dibe amoge made dawadigi neebe goeada, dilia asiala helësëla säsebego. 30 Amoïeda, udia dolö baagoi amoli nowela galaseda, udia made nimolöge, dolö made fimolöge. Selesaia fii ili selesaia mosöa nefolalebe amoli gadoi namolömelë. 31 Amalo amo, baagoi amoli neala nowelasimolö amoïeda, Godea dilima ado säla dëdëla negei dibe amoda, aso, nidela made neale. 32 Ea sähalea, Neda Abalahama, Aisaga, Yeigabala ilile Gode neawela säla dëdëla negei dialea. Gode eda baagoi amolile Gode made, eda nefolalebe amolile Gode neamelëla säi.
33 Amala säsebegi, udia dolö gegedoi nefolalo amolia nabalahilä, ea säla olelesebe amogi asigigi fudugisa nefolalo.
Godea nilïa hamomalai dibe amogi, edefadeda abododula nabi
(Maga 12.28-34, Ulugu 10.25-28)
34 Yesuea ado säi amea, Sadiusi ilia säla obëgëmolöi made nefolaleamelëla säi amo nabala, Felesi dolö nefolalo amoli gegedolahilä, 35 ili sosogo amoligi dolö afädë mala säla negei amo olelelo amea, Yesu fedogola bimolöïe ema ado afädë nabi. 36 Dolö amea nabahalea, Säla Olelelo-o, Ado säla negei amogi, nilïa hamomalai dibe edefadeda abododula nabi. 37 Amala nabasebegi, Yesuea ema säla obëgësalea, Dafidilo Geloi dïe Gode neebe amo dïe bobaeage, gesamiage, asigiage, boba hamomalo. 38 Nilïa hamomalai dibe amoligi, edefadeda amomelë. Amoda dafidilomelë. 39 Amase, agedu gowege amo gadoimelë. Dihïdi boba hamolo amo gadola, odoa dibalä nefolalebe amolige boba hamomalo. 40 Mosesea Ado sulubadela säla negei dibe amoge, bea sälo nefolalo amolia bea säla negei dibe amoge, nilïa hamomalai ado äudä amolegimu begedidigila gosai dialeamelëla säi.
Afädë Memelei moholömelëla säla negei amoïe nabi
(Maga 12.35-37, Ulugu 20.41-44)
41 Felesi dolö amoli gegedoi nefolalebegi, Yesuea ilima nabahalea, 42 Afädë Memelei amoïeda, dilia abilia helësësa. Eda nowëïe malö neala nabi. Amala nabasebegi, ilia säla obëgësalea, Debidiïe malöla säi. 43 Amala säla obëgësebegi, ea ilima nabahalea, Amai galëda, Godeïe Gesamia Debidima adolasisebegi, Debidia ema Dafidilo Geloila säi amoda abiliadu. Debidiada gomalä säimelë.
44 Dafidilo Geloia nïe Dafidilo Geloima sähalea, Dïe ado nii nefolalebe amoli dïe emoea daiasamäia, na neala ifosidelä, dida nïe naabo dafädimadi beaha samialola
säi. 45 Debidia hï ema Dafidilo Geloila säi galëda, eda Debidiïe malöda abeahäladula nabi. 46 Amala nabasebegi, afädëa ema ado säla obëgëmolöi made melï. Amasebegi, segeyo amila nofela, ili bedähalea, afädëa ema ado bu made nabelo.