4
Afan kalin adikum ika Yesus Kadais dam so tamo sidiwo kalin umi sung uta ko.
1 Kale naka sok gei tabebi, be watawo kaleyo bá, naka Kamok ami kinim kayo ko. Kale kiba Got walu imuda maek alam kinim kei bidiw. Kale naka kamane munyamino kiba Yesus Kadais afan kalin ilim biyámin taw keidin kala.
2 Kale kiba fibu bom nadiwe kinim falut kei bom nadiwe atin aket dakbuyá bom nadiwe kawkinum dakodawa dakodawa yokabiw beta kuku naduno kiba im aket dauyam bidiwe, kalokabu kala.
3 Kiba tada tada au nadiw Sinik ami dim abino, kalbiw. Kale kiba gadel kuw tabe nadiwe kanodin kukuw leiw be fakudin kala. Kale kiba abino kalin uta dabadáliwo adikum imak imak au imadew faku badano bin kala.
4 Kaleyo Kadais dam be makuw, Sinik Abem be makuw, ade Got aka gán dáyam mimin makuw dok didino, yakeise.
5 Kale Kamok be makuw ade afan kalin be makuw ade wok ban bomin be makuw
6 ade Got be makuw ade adikum mew teinu mánu numi Natim. Aka mew teinu mánu bo ata kin mobe, aka mew adikum bo am banim so kábu bá ade aka adikum mew teinu mánu im tem kal be.
7 Kale Kadais alam aket fukanin makuw makuw nuka kano kuyamon kalba ki abo nada num min gelemin kukáyaba.
8 Kale bemi mit uta Got ami godin weng uyo bako,
“aka atin unán bi tam katam be nadane wanang kinim seng seng wasi imadew faku sok gei imusiw iyo kanoyama tatun kuw alam ibik teiniwe, aka min gelemin uyo wanang kinim kuyamseno.”
Kalesu ko.
9 Unán bi tamo kalu ami mit ayo ki, aka dák kuin bid abe nadale
10 alo un bi tam abid akamam atin tam so abe nadano mew adikum ufek ufek teinu mánu uyo alata ki fakbu weinsa.
11 Kale Kadais ami min gelemin kukayaba be madik iyo walu imuda, weng dew kámin kinim keidiw, madik ita lum abem senin kinim keidiw, madik ita Got weng tuw aket dakfáyam kámin keidiw, madik ita Got ami kinim wanang gu kin modin keidiw madik ita Got weng kukumin kei bidiw keimino, kale kuyamsa.
12 Kale Kadais am kano kanaba umi mit ayo ki aka Got ami wanang kinim kidela Kadais kinim wanang gu imi wok ken kanamom nadiwo Kadais yán aboyámin uyo matam kitiduno,
13 kano suduw si nulum afan kalin so Got ami man kal keimin sung so uyo matam tada tada makuw kei naduwe matam kuákeiku Kadais alam kuákeiku be taw keidum kala kanaba kayo,
14 nuka alo man katiw taw keidoluw banim ade nuka gedul ta bom as kuk anbinoda kal unba kal unba keiba taw keidoluw banim. Kale gedul be kinim kasen kasen bom kukumin kinim bidimi kasen kasenin tuw wanang kinim tudo imadew leiw mafak unemin imi guton uta ko.
15 Kata nuka aket makuw kei naduwe aket kudawa kudawa bom afan kuw bakan bom naduwo fasu matam atin Kadais Got wanang kinim gu imi gebom ami dam keidum kala.
16 Kale alam kin moyámin akfak tem adikum kun teng yán dam takubu uyo atin kidel kuw taku una tad aubu ade alam dam takudin makuw makuw ika alam kukuw kukum faku dakodawa dakodawa áliw, beta kana bom nadiw dam be luk banim kidelok kuw bu ade aket kukámamin dim fasubu ko.
Wanang kinim alokso kukuw faku biyamodiw sung uta ko.
17 Kamok ami win dim naka kitid weng bakoyamon, kiba ulum kano wanang kinim Got im kal banim, itaw kei biyámin bá. Im aket fukanin bo umi dam banim uta bidiwade,
18 im kal keimin bo mada midilin tem kalbu ka. Ika Got ami biyámin kukuw kukáyamono, kalba be ika katiw so mak kudoliw banim. Watawo kaleyo bá, ika atin im kal banim ade ika kidiloduw, báyo, kaleyábiw kayo ko.
19 Ika ban keimábiw, kata ilim kál fatom so keimodiw banim. Ika ilim biyámin uyo kudew yak kukuw mafak kanamin umi tem tadeyabiw. Ika kanamin kukuw mafak mafak uyo atin makso makso kanamumo kanamaliw.
20 Be Kadais ami sung kal keisidiw alataw bá.
21 Kata atin afan am sung uyo kiba kidisidiw ade kiba alam yán abo kámin kinim kale weng tatun umi kukuyamsiw, be Yesus alam sung uta ka.
22 Kiba kibilim dil aket fukanin kukuw aboyámsiw, beta ta bom kanoyama faltimin aket wananya bom im mafak dákansa uyo yán tem tudo imadew yak alam dil ban keimsa kal unoma kala kaleyo kibilim dil aket fukanin dim biyámsiw uyo kudá dusikidin kala.
23 Kale kibilim aket so ulum fukanin so uyo atin alokso keiduk kala.
24 Kalam alokso ilim mikibaw taw, alokso sinik Got alataw uyo kudew yak kilim aket tem teidin kala. Kiba kanodokabiw beta kilim biyámin uyo abem kei nadule tatun keidu kinim wanang utamokabiw kala.
25 Kaleyo makuw makuw kiba, makso ibakamin bá, kata adikum kiba akanum afan kuw bakodawa bakodawain kala. Watawo kaleyo bá, adikum nuka kinim mit makuw keiduwe, Kadais Yesus ata num gebom keibe,
26 kayo kaba keng mak keikama namti, kaba keng ayo dabadálaw ata kamadewa yak ban kemin bá ade aket keng ki kuti badaw bi atan tadenemin bá, kala kaleyo
27 Mafakim ayo atin abin katiw so mak wakádalawin bá kala!
28 Kinim yakot wanin aka yakot wanin uyo kudá mit kei wok faku bom nadano kisol uyo alam yum kuw milá bom nadano alami kei bom nadale win banim iyo dakáya bom keimak kala.
29 Weng mak bakodono kalaw namti, kuok weng so bakanin bá, weng abál ki bakan badawo, kam weng abál bakanbaw uta tabe kam weng kidibidiw iyo dakoyamokabu ko.
30 Ade Got Sinik Abem ayo aket idum dawkádawin bá, be Got ami Sinik Abem be nalamino kalin kim dim sikit faktise. Kale nuka atin nulum kal, am mak dánokaba kawákal aka atin min talá imadálokaba.
31 Kale kal kuok keiyámin so aket keng so wengal kalin so ibik weng bakanin so uyo atin kudáliw banimuk kala. Kale sák kukuw mafak uyo atin makso kanamin bá.
32 Kata ken aket budunin uyo daudawa daudawa bom dafidin dáda dáda bom nadiwe Got Yesus dim nulum ban keimin lukuwá kudáyamse ulutaw ki kibil kawkinum ban keida kaí, lukuwá kudálawa kudálawain kala.