3
Yesus am abin be atin dukum, Mosus abin be madák so kalin sung uta ko.
1 Kaleyo nalam Got afan kalin nikil fikal kiba, Got aka walu imu nada im kinim dá abem kei imuse. Kale kiba Yesus alam aket ayo seng kuw fukanin kala. Kale aka Got ata num abin abem kayak keidako, kale dabadála tase kayo nuka aka afano akbuw ka.
2 Got aka bemi wok ata fakudako, kale walu dause ade Got alam aket aka kanamako, akeise ayo adikum kanose. Kale aka Mosus alataw Mosus ami Got wanang kinim kin moyámsa uyo Got am aket akal kanamalo, akanámsa, bo adikum kanamámsa.
3 Kale nuka Yesus win kufámin ata atin makso tamso kei naduwo Mosus win kufámin bo katiw so keiduk kala. Watawo kaleyo bá, kinim wanang ika kinim mit kayak ami win ata atin tamso kufáda bom nadiwe kinim láw dá imusa im win ata katiw kufáyamábiw kayo kala. Kale bemi alataw wanang kinim ika Yesus win ata atin makso tam so kufáda bom nadiwo Mosus win kufámin ata katiw so keiduk kala.
4 Kale kinim mit low dása bude kinim mak ata low dása, kata Got alata kinim mit kayak kala.
5 Kale Mosus aka Got ami kinim mit low wok fakuyam bom kin dimamámsa. Kale aka Got ami yanol katow weng bakodokaba umi sung uta bakanámsa.
6 Kata Kadais aka Got alam Min kayo aka Got alam kinim mit uyo kin dimam kin mo be kinim. Kale nuka ulum kano Got ami muduw keidokabuw. Be nuka atud fakadá, sun kuw nulum atin kano kudokabuw kalin umi mimin dok diyámin fakudokabuw beta ko.
Got wanang kinim im finuyámin bakan bu umi sung uta ko.
7 Got Sinik Abem aka Got ami godin tem bako,
“kiba kamano atan ayo Got weng kidiliw namti,
8 kiba yonin bá, ade kilim kawadik kasal im kuásusulsiw taw keiyámin bá. Kawadik kasal ika anang iwán sed gisa bakan kámámsiw kawákal Got ayo dawkukumsiw.
9 Kale ika itol deng sanung mak ade bako tade tam kin kal be kim kawadik kasal ika anang iwán sed gisa bakan ká bidiw naka kukuw seng seng kukuyamsi, kata ika nalami so nalam dakbuyámin so uyo imkukumsiw.
10 Beta kaleyo nam atin aket kus keinama weng abem takadá weng kitid bako nadino, ‘kinim wanang bidi nam weng kidinamámongin banim kei nadiwade ika atin nam kukuw leiw uyo mak maek tadoliw banim kei bidiw,’
11 kayo nam aket kus keinama keimin Got nalam win dawsonu nadi bako, ‘ika yak nam finuyámin bakan kidela kusi uyo yak mak unodiw banim.’ ”
Kalesa.
12 Kala kaleyo nalam nikil fikal kamane kiba kidela ata bom nadiwo kala, masi makuw mak kiba aket fukanin leiw mafak mit kei nadiw kibilim aket tem uyo afan kaloliw banim kei nadiwe Got Motabid ayo ibik umudawodiw kala.
13 Amsino kanam matam bokabu bo num kal banim. Kale kamane tein bidiw ki, kiba kawkinum kasal afan kalin iyo daw kitid modawa modawa bom nadiwo sun kuw afan kal bom nadiwo kala masi kanamiwe, ban keimin uyo tad aket wakwayamu ken kukuw kanabuwo, kale nadiwe yak Got mit tem unemin leiw uyo kudáloliw kala.
14 Nuka Yesus aket afan kalin uyo alam kano kamakikiw kanosuduw taw ki keidokabuw, beta Got alam ufek ufek Yesus kudawsa uyo nuluso makuw adikum kikiw kudulokabuw.
15 Tam dil bakoduw uyo bako,
“kiba kamano atan uyo Got weng kidiliw namti, kudáyámin bá.”
Yakeisa.
16 Kale kiba Isadael imi kanoyamsu uyo kidela utamin kala. Kale Mosus bude ilim gebom ade ata waktudo imadewa Isiw bakan uyo kudá matam abiwe, Got alam weng kano be ki ilim dim bakanyamsa, “kata yanol kawák am weng bo kidilawoduw báno.” Kal bidiwo kayo.
17 Got ayo kus ita bada bi itol deng mak bako tam kin kal keisiw ayo kinim kan ata ban keidiw, ika anang iwán sed gisa bakan kawákal fikalanámsiw kala.
18 Kale be watawo kaleyo bá, Got aka kusa nadano kayo weng kitid kuw bako nada, “kiba nam weng bako nadi bakan mak kuyamokabino.” Yakeisi “kata kiba atin yak mak unodiw banimo.” Yakeisa. Kaleyo Got ami kanodin weng bakaba bo kan bakadaba? Kale am bakaba be yak wanang kinim kan ita Got weng yonbiw im bakayabi ka.
19 Beta kaleyo nuka kal keidomo, ika afan kalongin banim keidiwo, Got ayo imadála yak finkanin bakan uyo yak unongin banim keisiw kala kalbuw.