16
Mudi dákamin kukuw mak utamumo, kale kuek di dákadámin sung uta ko.
Kale Fedasi so Seddusi so iyo tad nadiwe Yesus dawkuku dákadáluwo, abid tikin mudi mudín kukuw mak kanodayo afan aka Got amiyo kal tasane kalumo, kale dákadáliwe, aka yán ki bakoyam, “kilim kal kiba am atanim un bi bán teina kal keidomo, au bo am kuinane, kaleyábiw ade kiba katam fen abid tikin am ked taba kayo, au bo am kidel dánane, kaleyábiw ade kutim mak matam somo am lung fako nada midikala ka. Kale nadiwe am weiw tadongin keimano, kaleyábiw. Kale kiba abid ami kin nám ki atam nadiwade au, be kanomin am dána dána kaleyábiw ka. Kata kiba kamano Got ami kukuw kanaba umi mit uyo mak kiba kal keidongin banim. Kale kamano kinim mit teiniw kiba, mafak keimin kinim tein bidiw kayo, kiba Got aket kudawongin banim kei bidiw ade kiba mudi dákamin kukuw ki utam kal keidumo, kal bom fenbiw, kata naka mudi dákamin kukuw so mak kano kukuyamokabi bá, kata naka Got Yona ami mudi dádawsa sung uta kuw kukuyamokabi.” Kalbane, Yesus ayo imadá unsa ko.
Fedasi so Seddusi so im ís kalbiw ki dufo bom nadiwo kala kalin sung uta ko.
Bude ika wok mik yakan dá yak madik uniw, kata weng kidimin kinim ika aket lukuw imane wanin budet mak dew unongin banim dakosiw. Kale Yesus aka bakoyam, “Fedasi so Seddusi so imi íso kalbiw, be kiba dufo bom nadiwo,” yakeisa ko.
Kale ilim tudon weng bakodawa bakodawa bom nadiwe bakodiw, “am weng bakoyama, be watawo kaleyo bá, nuka wanin budet mak dew tadongin danim kayo bakoyamano.” Kalaniwe, Yesus aka imi weng baka bom mit abo bidiw uyo alam kal kei nadale aka bakoyam, “kiwta, kim aket afano kalin bo katiw tei. Watawo kale kiba kibilim tudon wanin budet banim buso kuwo, kalbiwe? Kiba budet auok kal kuw, kata kinim 5,000 kal ika ken wan bi galyamase uyo fukan dádongin banime? Ade budet bid liklik kudáliw umi men uyo utaw kal uta weinu kusidiwe? Bade kiba bumi mit uyo mak kal keidongin banime? 10 Ade budet kim fet kal kuw, kata kinim 4,000 kal ika ken wan bi gal imu bid liklik bi kudáliw, men utaw kal uta weinu fa budu mo kusidiwe? 11 Naka budet umi sung bakayabi bá. Kale kiba watawo kale be kal keidongin banim. Naka bakoyam Fedasi so Seddusi so imi íso kalbiw kauok ki kidela uta bom nadiwalo, yakbi bo.” Yakane, 12 beta ika weng mit kal kei nadiwe, “au, aka ís budet so fumin umi sung uta kitid weng bakaba, bá be. Kale nadiwade aket tet daudomo Fedasi so Seddusi so imi sawa kukumin umi sung weng kitid beta bakaba ka.” Kalesiw ko.
Bita Yesus dam weng bakodawsa sung uta ko.
13 Kale Yesus aka yak abe tam Sesadiya Filibai abiw bakan kal tam nadale aka alam weng kidimin kinim bakoyam, “wanang kinim ika im aket Got ami Kinim be kan atanako, akanábiwe?” Yakane, 14 ika weng fakadu bakodaw, “madik im weng ‘Yon wok ban bomin kinim atano,’ kal bidiw, madik itane bako nadiw, ‘Ilaitsayo,’ kal bidiw, wáw madik itane bako, ‘Yedimaya ata nam, lum senin kinim madik ita nam, kal bidiw,’ keimaliw.” Akiwe, 15 asik bakoyam, “kibilimi ayo naka kan atano nakanábiwe?”
16 Kala nade Bita asik weng atung fakadu bakodaw, “kabade Got Walusa Kinim ade Got Motabid ami Man ade kabalata buta.” Akane, 17 Beta Yesus ayo weng atung fakadu Bita bakodaw, “Saimon Yona min kaba, ken bán kidel tein bom kalfalbaw ka. Watawo kaleyo bá, kaba afan dam weng bakodaw be kinim mak ata kuw misun teikama bakodin taw audaw, kata be Natim abid tikin kayak alata kuw misun teikamano bakodaw. 18 Kale Saimon, naka bakokamon kala, kaba kam win be Tum.” Akeisa. Be Gadík weng Bita kalbiw. Kale naka tum abák bemi dim kal Got ami kinim gu uyo fabudu mo imudokabi ade fikalanámin adikum umi kitidim uyo tabe anik anik auyamoma banim. 19 Naka Got kasák gu tem biyámin yal dákadámin kí bidi faku kuyamokabi. Kale kiba yaknámin uta bakan kadák yal leidokabiw, Got akal katam kano yal leidokaba ade yaknámin uta bakan kadák kiba yal bisu kudokabiw Got akal kano katam yal bisudokaba.” 20 Kale beta Yesus ayo weng kidimin kinim weng anuyam nadale bakoyam, “kinim so mak bakoyam, naka Got Walusa Kinimo, yakin bá ko. Yakeisa.
Yesus alam fikale talá tabokaba bakoyamsa sung uta ko.
21 Kale kanabiw kabadák alo Yesus ayo weng kidimin kinim iyo weng kidásu bakoyamono kala ka. “Naka yak Yedusalem unokabi uyo Yu kayak imi gebom gebom so bokal kayak as fakiw dakádawin kinim so sawa kukumin kinim so imi teng ban dim abe kál funin dukum kudu nadile nanbidiw fikalokabi ade naka fom lung kal bi am alewbino kei nadile asiki talá tabokabi.” Kale bakoyamse ko.
22 Kata Bita aka Yesus ayo dew takas yak kaek abe nadale kitid weng bakodaw, “Kamokim kaba, kanodin kukuw bo kudálaw kanakamin bá ade bo atin kanokamodiw banim keidin kala.” Akane, 23 Yesus ayo dumade nadale Bita bakodaw, “Mafakim kaba, namadá sakabal kala! Kaba nam leiw uyo atinamin bá ade kam aket fukan dá bom kanabaw uyo kinim im aket fukanin uta fukanbaw ade bo Got ami aket fukanin bá.” Akei nadale 24 weng kidimin kinim bakoyam, “kan kinim ata nam yán aboda namti, alami aket uyo fukanin bá, lukuwu kudá nadale alami as dawing dakámin uyo kudew nami yán abodak kala. 25 Kan ata alam sinik so biyámin ki luk dudu be kaí, aka ken iw kulel keidokaba, kata yak kan ata alam luk duduyámin bu kudá, nam luk so weng kidel umi luk so ki dudulokaba, aka sinik so biyámin uyo iw kulel kei kudáloma banim. 26 Kinim mak aka mew bakan dim ufek ufek bo adikum kudulokaba, kata aka yak sun as kainin abiw unokaba. Be kene bade bá? Bábiyo, aka yaknámin ufek ufek uta kudu mo nadano asiki maek sun biyámin uyo kudulokaba?
27 Got ami Kinim aka alam Alaw ami lamlam tem, alam ensel so tadokabiw, kabadákal aka adikum wanang so kinim so iyo ilim kanamusiw umi yán kukáyamokaba. 28 Kale naka atin afan dam weng bakoyamon kala, madik kamano tod bidiw kiba fikalongin dako alom nadiwo Got ami Kinim alam kasák gu so madák aba atamokabiw kala.” Yakeisa ko.