2
Yesus ami fibuyamsa umi sung uta ko.
1 Kale kim Yesus Kadais so biyámin be kitid dauyamsene? Kilim aket kudawa kudawain be ken ilil dudáyamsene? Kiba Sinik Abem so makuw dek amki bidiwe? Kiba aket budunin so kukuw kidel fakuyámin so be kudusidiwe?
2 Bo adik kudusiw namti, naka mun dáyamino, kiba atin kanonamiw kalfalono, kali ayo ki num aket fukanin makuw kei, aket daudawa daudawain makuw kei, weng mit makuw kikiw kanamumo, kalin keidum kala.
3 Kiba ufek ufek mak kanamiw namti, sanung wanin keiyámin so kilim win kufámin so uta imadáliw, im kin moyámin bá. Kale kiba fibu nadiwe madik imi win kufáyamin uta ta bom kibilim win kufámin uyo akamamu nade
4 makuw makuw kiba kilimi aket kidelámin uta kuw aket fukanin bá, kata yak madik imi aket kidelámin so uta aket fukanin kala.
5 Kale kiba aket fukanin kukuw uyo Yesus Kadais ami aket fukanin kukuw taw beta keimin kala.
6 Kale aka madák bakan tadongin danim be aka Got so kal biyámsa ade aka atin Got alata. Bude afan ilim abin abem makuw teinámin, kata aka alam aket uyo abin abem bo kudálono, kalese.
7 Kata aka naka kanodin kinim buyo kalese bá, aka alami abin abem kaw tam uyo kadis kudá nada aket tet dau madák kinim nulutaw kei nada wok fakudin kinim kal wakuduse. Wanang kinim ika atamomo, aka sák kinim madik ilitaw ka. Akeisidiw.
8 Kale aka alam win uyo kufodin banim keidano, Got weng bakodaw, “kaba kudalaw kinim ita kanbidokabiw.” Akane, aka Alaw weng kidilaw nada madák tada kinim ika anew yak as dawing dákamin dim dawti sil biki atin fatom leiw so keidawiw fikalese kala.
9 Kaleyo Got ayo dakfo dew tam atin abin abem dukum wakudaw nadale win dukum kudawse uyo bakan dim kinim win adikum akayamsa uta takudaw nadale adikum kinim iyo imadew yak Yesus Kadais alam kitid akfak tem imtisa.
10 Kale beta kanodano ufek ufek adikum kinim so ensel so sinik mafak so abid tikin bidiw so bakan bidiw so kuin dákaw bid bidiw so iyo tad alam akfak tem nadiw alam weng kidilawokabiw ko.
11 Ade adikum bidi kinim wanang im kin dim kadákal weng fok bako nadiwe, “Yesus Kadais be afan Kamokim dukum kala.” Kal bidiwe, beta tabe win dukum uyo Natim Got kudawokabiw.
12 Kala kaleyo kamane kiba, Yesus ami aket fukanin uyo utamasidiw, kayo nalam nafadow kasal kiba, nalam kiwso tein bidi nalam weng kidinam bom wok fakusidiw ulutaw be ki naka imadá sikam teinbi, kata kiba ulum kanom weng kidiyamokabiw, beta atin iwkuk kala. Kale kiba ulum kano kail bá takeikuyamámin umi wok uyo adik wakadábiw uyo aket banbinso fingánin so kei bom fakudin kala.
13 Watawo kaleyo bá, Got aka kilim kidin tem wok faku bom nada kitid dauyamano, kiba Got alam aket kanodino, yakba uyo aket tet dau nadiwo beta ufek ufek uyo kidel kuw kanamokabiw.
14 Kale kiba ufek ufek adikum uyo kus kusin so wengal so kei bom kanamin banim keidokabiw,
15 beta itamomane, kiba kinim kidelok kim weng fine banim, yakokabiw. Kale kiba Got ami man kidel kei bom wanang kinim kamane tein bom nadiw kukuw mafak leiw abo eibiw imi iwyak tem ken bom sun biyámin weng dawkáyabiw be kiwta im iwyak tem abid kayakin midilin tem lánin taw keidokabiw kala.
16 Kale kiba kanamokabiw kaí, naka Yesus tademin atan kawák naka kalfalyamokabi. Watawo kaleyo bá, buta kuku nadule nami wok adikum fakusi so nam mámin dákamusi so uyo ituwa tabongin banim kayo ko.
17 Kilim afan kalin uta kanoyamuno, kilim biyámin uyo Got kudaw wane ilulawin taw kei bom wok fakudabidiw. Kayo naka nanbidum, kaliw nam kaim fudálokabu, kim Got wane ilkádabiw so makuw keidokabu, kata bo kanonamum kalokabiw be naka atin kibiliwso kalfalokabi.
18 Kale bemi leiw taw be ki kiba nam fikali kaí, be kiba kibiliwso kalfal bom nadiwe naso idak teinin kala.
19 Kale naka atin Timoti ayo mewso dabadáyami tadako, kalbi kale Kamok am aket keno, nakokaba. Naka kanodokabi. Aka yak itam nadano alo kim sung uyo kudew tad bakonamokaba, naka nalaso idak teinokabi kala.
20 Naka kinim bidi Timoti alataw aket dauyam dakoyamono kalin kinim sono masi mak dabadáyami tadokaba bá.
21 Adikum kinim bidi ilim luk uta ki dudu bom nadiwade Yesus Kadais ami luk uta mak dudulongin banim keiyábiw.
22 Kata kiba Timoti am atin Got ami wok kidel faku be uyo kilim kal bute, watawo kaleyo bá, man alam alaw so wok fakanin taw, aka naso Got sung kidel uyo bakan kábuw kayo ko.
23 Kaleyo naka weng mit tufimin kinim iyo, wataw wataw nakiw kal keidi ka. Kale nadino nalam aket aka mewso wabising dabadáli tadako kanabi.
24 Ade naka nalami ata yanol kal tad itamokabi uyo nalam kal, be watawo kaleyo bá, Kamok am aket uyo, keno, nakokaba kayo ko.
25 Kata nalam nakanum Ibafadoddaitus nalaso wok faku bom sung kidel umi guew duduyámin kinim ade kilim kinim weng dew kámin kinim, kilim nam ufek ufek waktuwi dakonamumo, kale dabadáliw tase be naka dabadáyami tadako kanabi.
26 Kata am aket uyo adikum kiliwso kuw teinono, kal bom nadano alam aket uyo kim itamono, kalba. Be watawo kaleyo bá, kiba am asansa sung uyo kidisidiw kayo am aket masi aket luklakodiwo, kale nadano ko.
27 Ade bude atin afan aka asanom nada mewso fikalongin taw keiba, kata Got aka aket budunin daudaw kidel dauba. Kale be ata kuw bá, kata nakal nalaso kinkino, nakeiba. Watawo kaleyo bá, aka alam aket uyo kal keidomo, Ibafadoddaitas aka fikaleba nam, nam aket uyo fidinin dukum kuw keinaba kalongino ka. Kale nadano kayo alam aket uyo, kam fidinin dukum banim keidako, nakeiba kala.
28 Kaleyo naka atin nam aket, aka dabadáyami tadako, kanabi. Kale aka tad itamokaba, kiba idak teinokabiw ka. Natane, am aket seng fukanin banim keidokabi.
29 Kale kiba aket idak teinin dukum dim kal, ken tadawako? Akei bakodaw, “nuka kam Kamok wok fakudin uyo aket kalfalukamuwo.” Akino. Ade kiba kanodin kinim beta win uyo kufodawámin kuw kala.
30 Watawo kaleyo bá, aka Yesus Kadais alam wok fakudaw alom mewso fikalongin taw keiba kala. Kale aka alami uyo kudew yak kail tem kuek tade nam dakonamono, kale nadano kanoba, be watawo kaleyo kiba ken kano dakonamodiw banim kayo ka.