5
Fongtuw falfalin buk so Siwsiw man so imi sung uta ko.
1 Kale naka kaek fen kinim abin abem teinba teng miskuno be buk fong tuw falalin be weng godin ki wolo so dengo so godusiwo kalomo, buk be gom faktimin fet kal mo fakti tamo dausiw ka. Kalesi.
2 Kale naka ensel kitid soim mak weng dukum bakaba kala, akine bako, “kan ata winso namti, buk fewsa bela fingo dau atamokaba.” Kalesa.
3 Kata bakan dim kayak so kuin bid kayak so abid tikin kayak so bidi kinim mak winsono masi, buk bela fingo dau atamodiw banim. Kale be atam nadine
4 amanin kuw amanin kuw keimsi uyo watawo kaleyo bá, kinim teinu mánu iyo kinim win so mak beno masi, buk be bá nada kaek fen iwyak atamoma banim kayo ko.
5 Beta gebom kinim mak ata bakonam, “kálak fen, kaba amanin bá, busi layon Yudda kinim mito, Dewit ami low fikale talá tabe nada ufek ufek kitid akadaw tam tiw abese, ata kuw buk fewsa fet kal bela takela bisudokaba.” Nakeisa.
6 Kale nadine naka Siwsiw man anbidiw fikalese, kin gubu taw abin abem iwyak kal todba be kalomo kinim taw sinikso alalew keidiw gebom gebom keidiw ita dawo iw dá falfal daubiw ka. Yakeisi ko. Kale Siwsiw man aka idis fet kal mak ade kin fet kal mak be am dim kal bu ka. Akeisi. Kale kin fet kal bidi Got alami Sinik Abem kukuw fet kal ita kale bidi imadála bakan adik fakbusiw.
7 Kale Siwsiw man ayo tad abin abem teinba Kinim ami buk fongtuw falalin teng miskuno fakuba uyo kukidawsa ko.
8 Kale kudula nade Siwsiw man kibi idimo be kalomo, kinim taw sinikso alalew keidiw, gebom gebom mit dim kyáfako tade tow alalew kal keidiw iyo kutin dák bakan mikabu fakadi dák akfak tem unsiw bidi makuw alam tadám dukum so tum gol ningudin dis ufek ufek fudiw kain bom fiw kidel tabeba so fakuda fakuda aubiw ka. Kalesi. Be Got ami kinim abem imi suksukim uta ko.
9 Kale ika alokso fuw kutidawsiw uyo bako,
“kaba win soim, kawta fongtuw falalin buk bela ken bádolaw kinim, buk fewsa ayo gom takan keidolaw kinim, be watawo kaleyo bá, kaba kanbidiw fikalom nadawe kalam kaim tuw wanang kinim so kinim mit kukum kukum so weng kukum kukum bakodin so kinim atama banim so bakan kukum kukum kasel so iyo Got ami modawsaw.
10 Kale kaba kinim wanang be kanoyamaw, Got ami kasák gu kayak kei nadiwe Got wok fakudaw, bakan adikum be kin modokabiw ko.”
Kalsiw.
11 Beta alo naka kaek fen ensel seng seng denge fakiw denge fakiw ika abin abem falfal kuwo iw dábiwo kalomo kinim taw sinikso alalew keidiwe gebom gebom keidiw iyo ilá falal daubiw ka. Kalesi.
12 Ika fuw kitid kuw we bom bako,
“Siwsiw man anbidiw fikalese, aka win soim, kitid soim, kisol ufek ufek soim, guton sawa soim, madmed soim, lukluk soim, kin budusi soim, kalfalin soim, uta aka kudusa ko.”
Kalsiw.
13 Kale naka beta alo kidilono kale bediyo adikum sinikso biyámin abid bidiw so bakan bidiw so kuin bid bidiw so yol wok akfak tem bidiw so mew adikum kin bádu iyo fuw we bom nadiwe bako,
“win kufáyamin so win kalfalyamin so lamlam kukáyamin so kitid so uyo Abin abem teinba Kinim so Siwsiw man so ilimi sun sun keiyamuk kala.”
Kalsiw ko.
14 Kale kinim taw sinikso alalew iyo bako nadiw, “afan ko.” Kale sidiwo gebom gebom iyo tuw asin kutin dák abe nadiwe win kufáyamsiw ko.