19
Jime jettooje Laamɗo ley alijenne
1 Caggal ɗum, nan-mi daaɗe toowɗe hono jamaa keewɗo iwri kam dow kammu, ana wiya:
«Halleluya!
Kisindam e teddungal e baawɗe
ngoodanii Laamɗo meeɗen,
2 sabi sariyaaji makko yo goongaraaji
yo pooccitiiɗi!
O sarii bamfaaru rewru anndaandu sanne
bonnirannoondu aduna oo fuu bamfaaraaku mum oo,
kasen duu o yoɓtii ƴiiƴam maccuɓe makko njuppaaɗam e mayru ɗam.»
3 Ɓe mbii ɗiɗoɓere:
«Halleluya!
Cuurki cumu ngalluure mawnde ndee kii
ana ŋabba faa abada!»
4 Mawɓe noogayon e nayon ɓee e kuɗɗe nay guurɗe ɗee, kippii e leydi cujidani Laamɗo jooɗiiɗo e bimmbeere laamu oo, ana mbiya:
—Aamiina! Halleluya!
5 Daande iwri to bimmbeere too, ana wiya:
—Njettee Laamɗo meeɗen, onon maccuɓe makko fuu, onon hulɓe mo fuu, tedduɓe e lo'uɓe!
Haala kuurtungu Njawdiri ndii
6 Non nan-mi ko wa'i no daande jamaa keewɗo nii, ko wa'i no dillere ndiyam keewɗam nii, ko wa'i no gidaali mawɗi nii, ana wiya:
«Halleluya! Sabi Laamɗo Joomiraaɗo meeɗen
Jom Baawɗe oo tabintinii laamu mum.
7 Mbelto-ɗen, ceyo-ɗen, teddinen mo,
sabi kuurtungu Njawdiri ndii yottiima,
kasen duu jommbaajo mayri lanndinike.
8 O hokkaama kaddule o ɓoornoo,
bagi ɗaatuɗo, jalboowo, laaɓuɗo.»
Ɗeen kaddule ngoni golleeji seniiɓe moƴƴuɗi ɗii.
9 Malaa'ika oo wii kam:
—Winndu: noddaaɓe e ɲiiri yannge Njawdiri ndii ɓee, mbelii hoore!
O wii kam kasen:
—Ɗii konngi yo goongaraaji, to Laamɗo ɗi iwi.
10 Kippii-mi e leydi yeeso makko faa mi sujidana mo, kaa o wii kam:
—Patti! Miin, mi maccuɗo hono maa hono sakiraaɓe maa tiiɗuɓe e seettanaade Iisaa ɓee. Sujidan Laamɗo!
Sabi ko woni annabaaku dee, yo seettanaade Iisaa.
Haala garol Almasiihu faa jukka taktakol
11 Caggal ɗum, njii-mi kammu ana udditii, non puccu daneejo ɓanngi. Baɗɗiiɗo mo oo ana wiyee Koolniiɗo ana wiyee Goongirante, goonga o sarirta, goonga o honirta.
12 Gite makko ana mba'i no metangal yiite nii, tenngaaɗe laamu keewɗe ana e hoore makko, innde ana winndii e makko nde fay gooto anndaa so wanaa kanko.
13 Omo ɓoornii saaya cuuwaaka e ƴiiƴam, innde makko yo: «Konngol Laamɗo.»
14 Konuuji kammu ɗii njokki e makko ana ɓoornii kaddule bagi ɗaatuɗe, daneeje, laaɓuɗe, ana mbaɗɗii pucci daneeji.
15 Kaafaawi mbelki ki mo soppirta leɲi ana yalta e hunduko makko. Mo durdan ɗi loocol naawngol, o dippan e ɓoosirde peguuje yaltinoore tikkere Laamɗo Jom Baawɗe mawnde.
16 Ndee ɗoo innde ana winndaa e saaya makko, ana winndaa e busal makko:
«Kaananke kaanankooɓe e Joomiraaɗo joomiraaɓe».
17 Non njii-mi malaa'ika ana darii e dow yitere naange. O eewnii faa toowi, o wii pooli diwooji dow mbeeyu ɗii fuu:
—Ngaree nootee ɲiiri yannge mawɗo mo Laamɗo waɗi oo,
18 faa nducciton tew kaanankooɓe e tew hooreeɓe sordaasi'en e tew jom'en semmbe e tew pucci e waɗɗiiɓe mum'en e tew yimɓe fuu – rimɓe e riimayɓe, tedduɓe e lo'uɓe!
19 Non njii-mi taktakol manngol ngol e kaanankooɓe aduna ɓee e konuuji mum'en ana kawriti faa kaɓa e baɗɗiiɗo puccu daneejo oo e konu mum.
20 Taktakol ngol honaa, kanngol e annabaajo peneejo gannooɗo kaayɗe yeeso maggol oo. E ɗeen kaayɗe o hoomtirnoo heɓunooɓe maande taktakol ngol ɓee, sujidanannooɓe tooru nanndundu e maggol ɓee. Ɓe ɗiɗon fuu, ɓe mbedaa eɓe nguuri e weendu yiite e sitti huɓɓooru nduu.
21 Heddiiɓe ɓee kalkiraa kaafaawi njaltannooki e hunduko baɗɗiiɗo puccu daneejo oo kii, pooli ɗii fuu ngari nducciti tewuuli maɓɓe faa kaari.