3
Isu aeba Mosese asu againtiye
1 Pigoya, aota nao'mitaba, mantabi ubasikibe kina'mitaba, tigeba Isugaba aogima napiyiyo. Aeba tamatiti'enama nkagowama tabe aposorobe monota paitanta kiye yagararepe mima, Koti nkawamupa aogima wasintiye.
2 Piya, Kotiba pi ntugaraka otaogana, pai Mosese Koti nkawamu wasima Koti nkaokina'mi kayokaya'ena puntisa puma, Isuba Koti nkawamupa aogima wasima yogawapa puntiye.
3 Eya, nama kiyi ntagarama nkagewamaba pi ntamankama nkageba asu agasisa puma, Koti nkaobipa Isu nkagewamaba Mosese nkageba asu againtiye.
4 Piya, namapa wasanami nkiyapisa aborantegina, we, a'ya'waemaena aboranti ntagaraba Kotiwe.
5 Piya, Moseseba aeba Koti nkawamu wasima Koti nkaokinapa kabima mima, ainti aborakibintanaga awaga kamana umagina, aeba kayokaya yagaragana mintantiye.
6 We, Karaisitiba Koti nkawamu wasima Koti nkaokinapa kabima mimagina, aeba Koti Ntagaragana mintiye. Piya, taeba a'ya'ma yaga esegima aega'ma Kotiti atokaekenaga ta'mu puntapa, taeba Koti nkaokina mima namantanawapa pukune.
Isureyo kina'miba ata puntasapa a-piyo
7 Pigoya, pika Aota Awamuas'ama maya untiye:
Ibaba, tigeba Koti kamana abintiripa, aogima abiyo, iye.
8 Eya, Isureyo kina'miba ka'me mpari mima Koti amiyo'ena potama ago kamana akayumagini, igu akunintasa piyaba a-piyo, iye.
9 Eya, ka'me mpari tiyabamagiba 40-wa kabuba mima nae puwantanaba agantiniba namiyo puntane, iye.
10 Piya pugu, naeba igama pi kina'mika namo'enaba puma maya yuwe: Igu'amaba a'ya'ma yagaba kepa agasima antage'ena pumagini, nae kipa kampa agama nasewe, yuwe, iye.
11 Piya, igeka namo'ena puwaitamagi, mayama esegima yuwe: Igeba migarakenaenanetiba kampa ubasikibewe, yuwe, untiye, iye.
12 We, nao'mitaba, tigeba aogima kabiyiyo. A'yugu tikapisa ka'wainaba antabinti aguntaena puma amatiti'enawa kaite, miyaba Koti aka'intaesi potasanaga, aogima kabiyiyo.
13 We: Ibawe, untipa ma ntagawe. Piya, ibasa yagaba aguntaenama tikapisa ka'waina nkao airarikaeyakana antaba akunisanaga, tigeba kabima mima a'ya'ma yaga tiyo'mipa aogi kamana uwaimigini, napiyenawaipa igegano.
14 Piya, pai tamatiti puntompentana to esegi puma mirite wama nagariyeka, Karaisitintanabi ubasikune.
15 Eya, ibasa yagaga mono isa'amaba maya iye:
Ibaba, tigeba Koti kamana abintiripa, aogima abiyo, iye.
Eya, Isureyo kina'miba Koti nkago kamana akayumagini, igu akunintasa piyaba a-piyo, untiye, iye.
16 Pigoya, aya pume kina'mi Koti kamana abima ataena puma akayuntawe. Pipa Moseseba wawaya iba purite Isipi maba agaite waume kina'mi, ige akayuntawe.
17 Eya, aya pume kina'mi kamana akayuguna Koti 40-wa kabuba amo'enaba puwaitantiye. Pipa wawaya'mi aguntaena pume kina'mika Kotiba amo'enaba puwaitantegini, i'waipa ka'me mpari ware'nawaewantawe.
18 Aya pume kina'mika Kotiba: Igeba migarakenaenanetiba kampa ubasikibeweba, untiye. Pipa wawaya'mi kamana'wa akayuye kina'mika untiye.
19 Pi'na nkagoba taeba abune. Kampa imatiti pe'nagiba, igeba Koti mpigarakenaenawatiba kampa ubasikibewe.