Paulus ni surat i nban-muri verin tamata ovi rorang Yesus rira sidovung naꞌa kota Tesalonika
Tbas afa ovi veki
Tamata ovi rorang Yesus naꞌa kota Tesalonika wol rfan-aran ma lolin obin naꞌa i, wean inba ma Duilaꞌa Yesus veka nma ewal lanit ivavan a (2 Tesalonika 2:1-2). Tamata boku tali ira ranovak ne, Duilaꞌa Ni amar nma roak. Boku vali wol rkarya roak, tevek ranovak ne, Duilaꞌa Yesus sarseri mane nma roak (3:6, 11-12).
Afa ovi rotu ma Paulus ralan nfalak ma ntulis surat i nban-muri ini verin tamata Tesalonika ra, labir mane wean watan afa ovi ralan nfalak naꞌa ni surat i ntulis lan roak a verin ira. Ia nfangrebat ralarira ra, boma rtahang nala naꞌa rira susa ra, ovu naꞌa naꞌut i tamata ra rwi-rwa ira (1:4-10). Ia nair ira naꞌa afa ovi veka rvotuk naꞌa amar i Duilaꞌa Yesus veka nma ewal a (2:1-12), ovu nsurak ira ma rorang lalawatan Duilaꞌa (2:13-15), deka rbosa, ovu musti rkarya ma rdava rira fanaꞌan-fanenu (3:6-15). Naꞌa surat ini, na Paulus baꞌi nfalak naꞌa amar i Duilaꞌa Yesus veka nma ewal a (1:7-10; 2:1-12).
Surat ini ihin a
1. Paulus ni vaivatul ovi ntulis lan a. (1:1-2)
2. Paulus nfalak fara weninyai verin Duilaꞌa, tevek tamata Tesalonika rira inorang nmela. Ia nfangrebat ralarira ra, boma rorang lalawatan Duilaꞌa, velik ne tamata ra rwi-rwa ira. (1:3-12)
3. Ia nair ira naꞌa afa ovi veka rvotuk naꞌut amar i Duilaꞌa Yesus veka nma ewal a. (2:1-17)
4. Ia nera ma tamata Tesalonika ra raflurut verin ia, ovu nsurak ira, boma deka rbosa. (3:1-15)
5. Paulus nala salam verin ira, ovu nera ma Ubu naflahar rir tinemun. (3:16-18)
1
Snurak verin tamata ovi rorang Yesus naꞌa kota Tesalonika
1 Yaꞌa Paulus, ususan surat ini, ma amtelu Silas ovu Timotius amala verin mia, sidovung tamata inorang ovi mnyaꞌa Tesalonika. Mia myorang Yamadida Ubilaꞌa ovu Duilaꞌa Yesus Kristus.
2 Amera ma fara Yamadida Ubilaꞌa ovu Duilaꞌa Yesus Kristus nala Ni rala lolin a verin mia, ovu notu ma bira vavaꞌat ra malinan watan.
Ubu veka nukun tamata ra naꞌut i Kristus newal Ia
3 Teramam-valimami averi naꞌa Yesus Kristus, amfalak fara weninyai lalawatan verin Ubu, tevek bira inorang a ntafal ma dawan. Bira silobang a verin iki watan ntafal vali.
4 Wean inyai bi, wean i ti ma amtuan tamata ovi rorang Yesus rira sidovung ra, na amfamalik mia lalawatan. Amfamalik ne, bira inorang a verin Yesus Kristus nangrebat, velik ne mtyuan susa dawan ovu tamata ra rwi-rwa mia. Mia mtyahang nal ralabira naꞌa susa avyai.
5 Amar ra veka rma ma tamata ra rsiꞌik ne, Ubu veka nfaleka inukun ovu Ni malolan ma inovan ovu afa ovi rotu ra. Mia mtyuan susa rivun roak tevek myorang Yesus, naꞌuk mtyahang nal ralabira, ba inovan ma nfadoku mia naꞌa Ni Fareta a.
6 Ubu notu lalawatan afa ovi rmalola ra, ba Ia veka nukun tamata ovi rotu sian mia, ma rtuan sian wean inyai vali.
7 Ia veka notu ma tamata ra wol rwi-rwa roak mia, ovu ami vali. Ubu veka notu wean inyai naꞌut i Duilaꞌa Yesus nsuta tali lanit ratan, ma nfavotuk tenan naꞌa lanit ivavan naꞌa yafongan ralan ovu Ni sansinir ngrebat ra tali lanit ratan.
8 Ia veka nsuta ma nukun tamata ovi rafena ma rorang Ubu, ovu rafena ma rorang Ni Ivar Lolin a naꞌa Duilaꞌa Yesus.
9 Duilaꞌa Yesus veka nukun tamata avyai ma rira matmatan wol ni wahan, ovu Ia veka nvatuk ira munuk ma wol rnaꞌa wahan ralan a. Ira wol rsiꞌik vali Ni ngrebat i nfitik nyadat a.
10 Naꞌut amar i Yesus veka nma, na Ia veka notu lahir afa avyai. Naꞌut inyai, na Ni tamata ovi rorang Ia munuk veka rfadawang Ia ovu ralang Ia. Tamata ovi rorang Ia munuk veka rtalkaka lahir. Mia veka myovu vali Ni tamata ra, tevek myorang roak afa ovi amfamalik verin mia.
11 Wean inyai bi, amaflurut lalawatan verin mia. Amera verin Ubu ma fara notu ma bira vavaꞌat ra inovan ovu afa ovi ralan nfalak a, wean i nera ovu nfili roak mia. Amera vali verin Ia ma nlobang mia ovu Ni ngrebat a, boma myot-nala afa ovi lolin ra, tevek myorang Yesus Kristus.
12 Amaflurut wean inyai, boma tamata ra raraning dida Duilaꞌa Yesus naran a, tevek bira inorang verin Ia, ovu rfadawang vali mia. Ia veka notu munuk afa avyai, tevek Ubu i traning a ovu Duilaꞌa Yesus Kristus Ni rala lolin verin tamata ra.