Ɗerewol Yuhaana Ɗiɗaɓol
Haala Puɗɗirka
Woɓɓe e miili debbo e sukaaɓe ɓe Yuhaana batanta laati nun eklesiya gom e himɓe mum.
Haalaaji ɗi ɗerewol ŋol batata e nandi e ka artirkol bati. Haala ɓuruka semme der ɗerewol ŋol woni yidde, e hakkilango wayɓe Almasiihu e ekkitinooɓe fewrekuuɓe.
Tokkontirki haalaaji
1. Haala puɗɗirka 1-3
2. Gooŋa e yidde. 4-6
3. Hakkilango ekkitinooɓe fewrekuuɓe 7-11
4. Cannooje12-13
1
Sannoore
1 Min dottiijo, winni ɗerewol ŋol, mi winnanii maa an debbo mo Alla suɓi. Mi sannii maa an e ɓiɓɓe maa fu, onon ɓe jiɗum der gooŋa. Min tan bane yiɗi on, annuɓe gooŋa fu e yiɗi on,
2 gam sabbu gooŋa tabitiika der meeɗen, gonotooka der meeɗen faa abada.
3 Alla Baaba, e Ɓiɗɗo mum Yeesu Almasiihu hokka en moƴƴere e enɗam e jam, ɓeydana en gooŋa e yidde.
Gooŋa e yidde
4 Ɓerne am welii sanne, no nanumi ɓiɓɓe maa woɓɓe e yaha der gooŋa hande no Baaba ƴamiri.
5 Jooni, an yeeraajo, ko gonum emi winnanee hinaa ooda kesa, ooda ka keɓuɗen diga fuɗɗoode nun, mi eelii maa, accu jiɗontiren hakkune meeɗen.
6 Ko woni yidde nun, jahen der ooda Alla. Kanka woni ooda ka nanuɗen diga fuɗɗoode, kaanuka jahen dow mun.
Hakkilango ekkitinooɓe fewrekuuɓe
7 Majjinooɓe ɗuuɓɓe sankitake e duuniyaaru. Ɓe jaɓay Yeesu Almasiihu warii laatii neɗɗo. Ga'uɗo nun fu, majjinoowo nun, ganyo Almasiihu nun bo.
8 Kakkilanee ko'e mooɗon, gam to on majjin riiba golle amen heɓa keɓon joddi kebbuni.
9 Mo daraaki dow kollitol Almasiihu ko ƴaartii ŋol, walanaa Alla. Dariiɗo e maggol fu, e wonani Baaba e Ɓiɗɗo mum.
10 To goɗɗo wari caka mooɗon go waajaaki kollitol ŋol, to on jaɓee mo der wuro mooɗon, to on cannee mo bo.
11 Gam cannuɗo mo, hawti e makko der golle makko kalluɗe.
Cannooje
12 Ko Haani mi bata on e ɗuuɗi, amma mi yiɗaa winnango on ɗum ɗum fu der ɗerewol e dawa. Amma mi miili warugo to mooɗon, gam keɓen badden hunnuko e hunnuko, gam belɗum ɓerɗe meeɗen hebba.
13 Sukaaɓe miiraawo maa mo Alla suɓi sannii maa.