6
Ɓay ko men gollidooɓe, men wakkilinii on wota on jaɓir sulfu Alla on meere. Ko fii himo daali:
«Mi jaabinanii ma ka saa'i sulfu,
ka ɲalaande kisiyee mi faabike ma.»d
Awa mi andinii on ko fewndo ɗoo woni saa'i sulfu on, awa kadi ko ɲalaande kisiyee nden nii.
Fii Tampereeji Puulusa ɗin
Awa men wonataa sabu peggal woo e hoore hay gooto, fii wota golle amen ɗen wonu huunde felniinde. E kala huunde men ɓanginay ko men kurkantooɓe Alla, e nder ŋaɲɲanɗe buy, e nder tampereeji ɗin e ŋakkireede, e nder anndeeji, e nder pigge e kaseede e murtaneede, e golleeji sattuɗi e angal ɗoyngol e heege. Meɗen feɲɲinira ɗun laaɓal e gandal e muɲal e moƴƴuki e *Ruuhu Seniiɗo on e giggol ngol alaa faasiqankaaku, wondude e daaluyee goongaajo on e bawɗe Alla ɗen, peewal ngal wona aala amen haɓirɗo e hiwitorɗo. E hoore meɗen teddinee e meɗen hoynee, meɗen wowlee ko boni e meɗen wowlee ko moƴƴi. Meɗen jogoree wa fenooɓe, hara-le ko men wowlooɓe goonga. Men jogoree wa ɓe andaaka fii kala meɗen andaa, wa wonɓe maayude e hin-le meɗen wuuri, maa wa wonaaɓe letteede fii kala men waraaka, 10 wa sokolnaaɓe e hin-le saa'i kala meɗen weltii, wa ɓilliiɓe hara-le meɗen alɗinde ɗuuɗuɓe, wa ɓe alaa huunde e hin-le meɗen mari fow.
11 Ko onon yo ɓe Korenti, men haalanii on ko woni e amen kon, meɗen yaɲɲani on ɓerɗe amen ɗen. 12 Men faaɗinanaali on ɓerɗe amen ɗen, kono ko onon tigi faaɗinani men ɓerɗe mon ɗen. 13 Awa miɗo yewtira on wa fayɓe an: onon kadi waɗiranee men wano men waɗirani on non, udditanon men ɓerɗe mon ɗen!
Fii Woɗɗitagol ko Boni
14 Wota on humondir e ɓe gomɗinaa ɓen. Ko fii ko humondiral hongal woni hakkunde peewal ngal e angal peewal ngal? Maa ko kawtital hongal woni hakkunde ndaygu e niwre? 15 E ko nanondiral hongal woni hakkunde *Almasiihu on e Ibuliisa?ɗ E ko geɓal hongal gomɗinɓe ɓen e ɓe gomɗinaa ɓen hawti? 16 E ko *ahadi hondi wondi suudu Alla ndun e sanamuuji ɗin? Ko fii, ko enen woni suudu Alla Wuuruɗo on, wano Alla daaliri non:
«Mi hoɗay, mi jinda hakkunde maɓɓe,
mi wona Alla maɓɓe, ɓe wona jamaa an.»e
17 Ko ɗun waɗi si Joomiraaɗo on daali:
«Iwee e hakkunde maɓɓe, seedon,
wota on meemu ko laaɓaa,
min mi jaɓɓoyto on.
18 «Mi wonanay on Baaba,
onon wonanon mi ɓiɓɓe worɓe e ɓiɓɓe rewɓe.
Ko Joomiraaɗo Jom Bawgal on daali ɗun.»f
d 6:2 6.2 Isa. 49.8 ɗ 6:15 6.15 Ndee innde Ibuliisa ɗoo e haala Gereeki ko «Beliyar». e 6:16 6.16 Lew. 26.11-12 e Haz. 37.27 f 6:18 6.17-18 Isa. 52.11, Haz. 20.34-41, 2Sam. 7.8-14